މޯލްޑިވްސް ރިފޯމް މޫވްމަންޓުން ރިޔާސީ އިންތިހާބަށް ކެންޑިޑޭޓަކު ނެރެން ނިންމައި، ޕްރައިމަރީގައި ވާދަ ކުރުމުގެ ފުރުސަތު މިއަދު ހުޅުވާލައިފިއެވެ.

އެމްއާރުއެމުން ނެރުނު އިއުލާނެއްގައި ބުނީ ކުރިއަށް އޮތް ރިޔާސީ އިންތިހާބުގައި އެމްއާރުއެމްގެ ޓިކެޓުގައި ވާދަކުރުމަށް ބޭނުންވާ މެމްބަރުން އެކަމަށް އެދި ހުށަހެޅުމުގެ ފުރުސަތު މިއަދުން ފެށިގެން އަންނަ ބުރާސްފަތި ދުވަހުގެ ހަވީރު ހަތަރަކާ ހަމައަށް ހުޅުވާލާފައިވާ ކަމަށެވެ.

އެމްއާރުއެމް އިން ބުނީ އިންތިހާބަށް ކުރިމަތިލުމަށް އެދޭ ފޯމް ހުށަހަޅަން ޖެހޭނީ ޕާޓީގެ އޮފީހަށް ކަމަށެވެ. އެޕްލިކޭޝަން ފޯމާއި އިންތިހާބުގެ ޓައިމްލައިން އެމްއާރުއެމްގެ ވެބްސައިޓުން ފެންނަން ހުންނާނެ ކަމަށް ބުނެފައިވެއެވެ.

އެ ޕާޓީގެ ޕްރައިމަރީގައި ވޯޓުލެވޭނީ އެމްއާރުއެމްގެ ދަފްތަރުގައި ހިމެނޭ މީހުންނަށެވެ. އެ ޕްރައިމަރީގައި ވާދަކުރެވޭނީ އެ ޕާޓީގެ މެމްބަރެއްގެ ގޮތުގައި ހުންނަތާ އެއް އަހަރު ވެފައިވާނަމަ ކަމަށް އެމްއާރުއެމްއިން ބުންޏެވެ. އެމްއާރުއެމްއިން ބުނިގޮތުގައި ރިޔާސީ ޕްރައިމަރީގެ ވޯޓުލުން އަންނަ މަހުގެ ފުރަތަމަ ދުވަހު ބާއްވާނެއެވެ. އެ ވޯޓަކީ އޮންލައިންކޮށް ނަގާ ވޯޓެއް ކަމަށް ވެސް އެމްއާރުއެމް އިން ބުނެއެވެ.

ރިޔާސީ ޕްރައިމަރީގައި ވާދަކުރަން އެމްއާރުއެމްއިން އިއުލާން ކުރިއިރު، ކުރީގެ ރައީސް މައުމޫން އަބްދުލްގައްޔޫމްގެ ދަރިކަލުން ފާރިސް މައުމޫން ވަނީ އިންތިހާބުގައި ވާދަކުރައްވަން ކުށުގެ ރެކޯޑް ސާފުކުރުމުގެ މަސައްކަތް ފައްޓަވައިފައެވެ.

ސެޕްޓެމްބަރު 9 ގައި އޮންނަ ރިޔާސީ އިންތިހާބުގައި އެމްއާރުއެމް އާއި ޖުމްހޫރީ ޕާޓީ ގުޅިގެން ވާދަކުރުމުގެ މަޝްވަރާތަކެއް މިހާރު ދަނީ ކުރަމުންނެވެ.