އެމްޑީޕީގެ ކުރީގެ ރައީސް މުހައްމަދު ނަޝީދުގެ ސައިޒު ކުޑަވެ، ފަނޑުވަމުންދާ ވަރަކަށް ގޮވޭނީ ކޮސްކަމަށް އާރުޑީސީގެ މެނޭޖިން ޑިރެކްޓަރ މޫސާ އަލި މަނިކު ވިދާޅުވެއްޖެއެވެ.
އޭނާ މިހެން ވިދާޅުވީ ރައީސް ޞާލިހަށް އަމާޒުކޮށް ރައީސް ނަޝީދު ރޭ ދެއްކެވި ޒާތީ ވާހަތަކާއި ގުޅިގެން ގިނަ ބައެއްގެ ނުރުހުމާއި، ފާޑުކިޔުން ރައީސް ނަޝީދަށް އަމާޒުވެފައިވާ ދަނޑިވަޅެއްގައި ކުރެއްވި ޓުވީޓުގައެވެ. ރައީސް ނަޝީދު ވަނީ ރޭ ރައީސް ޞާލިހުގެ ސިއްޚީ ހާލަތާއި ގުޅޭގޮތުންނާއި ރައީސްގެ ސިޔާސަތު ތަކާއި ގުޅޭގޮތުން ބޮޑެތި ފާޑުކިޔުންތަކެއް ރައީސް ޞާލިހަށް އަމާޒުކޮށްފައެވެ.
މޫކޭ ވިދާޅުވި ރައީސް ނަޝީދު މިއަދު ދައްކަމުންދާ ވާހަކަތަކީ މިހާރު ދެން ދައްކަން ހުރި ހުރިހާ ވާހަކައެއް ދައްކާ ނިމުމުން ކިޔާނެ އެއްޗެއް ނޭގިގެން ދައްކަމުންދާ ވާހަތަކެއް ކަމަށެވެ. މިހާލަތުގައި ރައީސް ނަޝީދަށް ދެން ގޮވޭނީ ކޮށްކަމަށް މޫކޭ ވިދާޅުވިއެވެ. އޭނާ ވިދާޅުވީ މިހާރު ރައީސް ނަޝީދަކީ މާޒީ ކަމަށެވެ.
އަންނި އަކީ މާޒީ. ކުޑަ ވަމުން ފަނޑުވަމުން ދިޔަ ވަރަކަށް ކޮސް ގޮވުން ގިނަވާނެ.
– މޫކޭ ވިދާޅުވިއެވެ.
ހަރުގެ އަށް އެއްވެފައި ތިބި ޑިމޮކްރެޓުންނާއި ސަޕޯޓަރުންގެ ހުނުމާއި ހަޅޭކުގެ ތެރެއިން ދައްކަވަމުން ގެންދެވި ވާހަކައިގައި ނަޝީދު ވިދާޅުވީ ރައީސް ސޯލިހު މުސްކުޅިވެއްޖެ ކަމަށެވެ. ސަރުކާރުން ހިންގާ މަޝްރޫއުތަކުގެ ލަސްކަން ސިފަ ކުރައްވައި ނަޝީދު ވިދާޅުވީ "ދިއްދޫ މީހުން ބުނީ ޑިލޭ ސްޕްރޭ ޖަހާފައޭ" ކަމަށެވެ. ރައީސް ސޯލިހުގެ ސިއްހީ ހަލަތާ ގުޅުވައި ފާޑުވިދާޅުވުމަށް ފަހު ނަޝީދު ވަނީ ޑިމޮކްރެޓްސްގެ ރިޔާސީ ޕްރައިމަރީއަށް ކުރިމަތިލައްވާފައި ހުންނެވި ހަމައެކަނި ކެންޑިޑޭޓު، އިލްޔާސް ލަބީބަށް ތައުރީފު ކުރައްވައިފައެވެ.
ޑިމޮކްރެޓްސްގެ ރިޔާސީ ކެމްޕެއިން ފެށުމުން އުމުރުގެ ތަފާތު ފެންނާނެ ކަމަށާއި ރަށްރަށަށް ވަޑައިގެން ދެތިން މިނެޓުން ދައްކަން ބޭނުންވާ ވާހަކަތައް ހަމައެކަނި ދައްކާލެވޭނެ ކެންޑިޑޭޓަކީ ވެސް އިލްޔާސް ކަމަށް ނަޝީދު ވިދާޅުވިއެވެ.
