ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހުގެ ޒާތަށް އަރައިގަނެ، ކުރީގެ ރައީސް މުހައްމަދު ނަޝީދު ރޭ ދެއްކެވި ވާހަތަކަށް މަޢާފަށް އެދެންޖެހޭ ކަމުގައި މަޑުއްވަރީ ދާއިރާގެ ކުރީގެ މެމްބަރު މުހައްމަދު އަމީތު ވިދާޅުވެއްޖެއެވެ.

ޑިމޮކްރެޓްސް ހައުސްގައި ރޭ ބޭއްވި ޖަލްސާގައި ރައީސް ނަޝީދު ވަނީ ރައީސް އިބްރާހިމް މުހައްމަދު ސޯލިހަކީ ހިތުގެ އާލާސްކަންފުޅު ހުންނަ ބޭފުޅެއް ކަމަށާއި ކޮންމެ ދުވަހަކު ފަރުވާއަށް މުށުފުރާ ބޭސް ބޭނުން ކުރައްވާ ކަމަށް ވިދާޅުވެ، ރައީސް ޞާލިހަށް މަލާމާތްކޮށް ފުރައްސާރަ ކުރައްވާފައެވެ.

ނަޝީދު ދެއްކެވި ވާހަތަކާއި ގުޅިގެން ގިނަބައެއްގެ ފާޑުކިޔުން އަމާޒުވެފައިވާ މިދަނޑިވަޅުގައި އަމީތު ވިދާޅުވީ ތިމާ ބޭސްކާން ނުޖެހި އަނެކާ ބޭސްކާން ޖެހޭތީ އެކަމަށް މަލާމާތްކޮށް، ހަޖޫ ޖެހުމަކީ ވަރަށް ދެރަ ކަމެއް ކަމަށެވެ. ވަކިން ޚާއްސަކޮށް ރައީސުލްޖުމްހޫރިއްޔާއަށް ނިސްބަތްކޮށް މިފަދަ ގޮތަކަށް ވާހަކަ ދެއްކުމަކީ އެކަމަށް ރައީސް ނަޝީދު މަޢާފަށް އެދެންޖެހޭ ކަމެއްކަމަށް އަމީތު ވިދާޅުވިއެވެ.

ތިމާއަށް ބޭސްކާން ނުޖެހި އަނެކުންނަށް ބޭސްކާޖެހިފައި ވާކަމަށް ބުނެ، ތިމާގެ ހިތަށް "ސްޓެން" ލައްވަން ނުޖެހި، އެހެން މީހުންގެ ހިތަށް ސްޓެންޓް ލައްވަން ޖެހިފައިވާކަމަށް ބުނެ މަލާމާތްކޮށް މައްލަވަ ކުރުމަކީ ކިހާ ދަށު ދަރަޖައިގެ އަމަލެއްތޯ! ރައީސް ސާލިހުގެ ޒާތަށް ނިސްބަތްކޮށް ނަޝީދު ދެއްކެވި ދަށު ދަރަޖައިގެ ވާހަކަތަކަށް މާޢާފަށް އެދެން ޖެހޭނެ.

– އަމީތު ވިދާޅުވިއެވެ.

ހަރުގެ އަށް އެއްވެފައި ތިބި ޑިމޮކްރެޓުންނާއި ސަޕޯޓަރުންގެ ހުނުމާއި ހަޅޭކުގެ ތެރެއިން ދައްކަވަމުން ގެންދެވި ވާހަކައިގައި ނަޝީދު ވިދާޅުވީ ރައީސް ސޯލިހު މުސްކުޅިވެއްޖެ ކަމަށެވެ. ސަރުކާރުން ހިންގާ މަޝްރޫއުތަކުގެ ލަސްކަން ސިފަ ކުރައްވައި ނަޝީދު ވިދާޅުވީ "ދިއްދޫ މީހުން ބުނީ ޑިލޭ ސްޕްރޭ ޖަހާފައޭ" ކަމަށެވެ. ރައީސް ސޯލިހުގެ ސިއްހީ ހަލަތާ ގުޅުވައި ފާޑުވިދާޅުވުމަށް ފަހު ނަޝީދު ވަނީ ޑިމޮކްރެޓްސްގެ ރިޔާސީ ޕްރައިމަރީއަށް ކުރިމަތިލައްވާފައި ހުންނެވި ހަމައެކަނި ކެންޑިޑޭޓު، އިލްޔާސް ލަބީބަށް ތައުރީފު ކުރައްވައިފައެވެ.

ސެޕްޓެމްބަރު 9 ގައި ބާއްވާ ރިޔާސީ އިންތިހާބުގައި އެމްޑީޕީގެ ޓިކެޓުގައި ވާދަ ކުރައްވާ އުމުރުފުޅުން 61 އަހަރުގެ އިބްރާހިމް މުހައްމަދު ސޯލިހަށް ވުރެ، އެ މަނިކުފާނުގެ ކުރީގެ މިތުރު ހަގީ ފަސް އަހަރެވެ. ނަޝީދުގެ މިހާރު އުމުރުފުޅަކީ 56 އަހަރެވެ. އުމުރާ ގުޅުވައި ނަޝީދު ފާޑުވިދާޅުވިއިރު، ޖުމްހޫރީ ޕާޓީގެ ރިޔާސީ ކެންޑިޑޭޓު، ގާސިމް އިބްރާހިމްގެ އުމުރުފުޅަކީ 71 އަހަރެވެ. ޕީޕީއެމްގެ ރިޔާސީ ޓިކެޓު އަރުއްވައިފައިވާ، ކުރީގެ ރައީސް ޔާމީނުގެ އުމުރުފުޅަކީ 64 އަހަރުފުޅެވެ.

ޒުވާން ޖީލަކަށް ވެރިކަން ހަވާލުކުރަން ތާއިދު ކުރައްވާ މޭރުމުން މިރޭ ނަޝީދު ވާހަކަ ދެއްކެވި ނަމަވެސް ޖެނުވަރީ 28 ގައި ބޭއްވި އެމްޑީޕީގެ ރިޔާސީ ޕްރައިމަރީގައި އެމަނިކުފާނު ވަނީ ރައީސް ސޯލިހާ ވާދަ ކުރައްވައިފައެވެ. އެއިންތިޚާބުގައި ނަޝީދު ވަނީ ވަރަށް ބޮޑު ތަފާތަކުން ބަލިވެފައެވެ.