ރައީސް ނަޝީދުގެ ގާތް ބޭފުޅުން އެމަނިކުފާނުގެ އިރުޝާދުގެ ދަށުން އުފެއްދި ދަ ޑިމޮކްރެޓްސްގެ ރިޔާސީ ޕްރައިމަރީއަކަށް ޝައުގުވެރިކަމެއް ނެތް ކަމަށް، ރައީސް ނަޝީދު މިއަދު ވިދާޅުވެއްޖެއެވެ.
އެ މަނިކުފާނާއި ޖުމްހޫރީ ޕާޓީގެ ލީޑަރު ގާސިމް އިބްރާހިމް އަދި އެމްއެންޕީގެ ލީޑަރު މުހައްމަދު ނާޒިމާ އެކު، ގާސިމްގެ އިސްނެންގެވުމަށް ބޭއްވި ބައްދަލުވުމަށް ފަހު، ޑިމޮކްރެޓްސްގެ ރިޔާސީ ޕްރައިމަރީގައި ވާދަކުރުމުގެ ޝައުގުވެރިކަން ހުރިތޯ ނޫސްވެރިއަކު ސުވާލުކުރުމުން ނަޝީދު ވިދާޅުވީ އެ ޝައުގެއް ނެތް ކަމަށެވެ.
ރައީސް ނަޝީދު ވިދާޅުވީ އެމަނިކުފާނާއި، އަދި އެހެން ލީޑަރުންވެގެން މަޝްވަރާ މިކުރީ ވެރިކަން ބަދަލުކުރުމަށް، ކުރަންޖެހޭ މަސައްކަތް ކުރަން ކަމަށާއި، އެއީ އިދިކޮޅުން އެއްކެނޑިޑޭޓަކު ނެރުންކަމަށެވެ. އެމަސައްކަތް ކާމިޔާބު ކުރުމަށްޓަކައި ޕީޕީއެމްގެ އާބަސް ހޯދުމަކީ މުހިންމު ކަމެއްކަމަށް ރައީސް ނަޝީދު ވިދާޅުވިއެވެ.
ޑިމޮކްރެޓްސްގެ މުއައްސިސް އަދި ހެންވޭރު ހުޅަނގު ދާއިރާގެ މެންބަރު ހަސަން ލަތީފް ވިދާޅުވީ ޑިމޮކްރެޓްސްއިން ރިޔާސީ ޕްރައިމަރީއަކަށް ހުޅުވާލާން މަސައްކަތް ކުރަމުން އަންނަ ކަމަށާއި ޕާޓީގެ ރިޔާސީ ކެންޑިޑޭޓަކު ހޮވާނީ ޕްރައިމަރީއަކުން ކަމަށެވެ. މިދިޔަ ބުރާސްފަތި ދުވަހު ނަޝީދު ޑިމޮކްރެޓްސްއަށް ސޮއިކުރުމާއި ގުޅިގެން ގިނަ ބަޔަކު ބުނަމުންދަނީ ޑިމޮކްރެޓްސްގެ ކެންޑިޑޭޓަކަށް ވާނީ ރައީސް ނަޝީދު ކަމަށެވެ. އެހެންނަމަވެސް އެޕާޓީން އެކަމާމެދު އެއްވެސް އެއްޗެއް ނުބުނެއެވެ.
ރައީސް ނަޝީދު އާއެކު އެމްޑީޕީއަށް ނިސްބަތްވާ ގިނަ މެންބަރުން ވަނީ އެމްޑީޕީ ދޫކޮށް ޑިމޮކްރެޓްސްއަށް ސޮއިކޮށްފައެވެ.
