އެހެން ޕާޓީތަކުން ވެރިކަން ހޯދަން މަސައްކަތްކުރާތީ ކަންބޮޑުވެ ވަޑައިގަންނަވާ ކަމަށާއި އެފަދަ ކަމެއްގައި ބައިވެރިނުވެވޭނެ ކަމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެއެވެ.
އެމަނިކުފާނު މިފަދައިން ވިދާޅުވީ ދަ ޑިމޮކްރެޓްސްގެ "ފަސޭހަ ވިޔަފާރި ސިޔާސަތު" ލޯންޗު ކުރުމަށް ބ. ތުޅާދޫގައި ކުރިއަށްދިޔަ އިވެންޓްގައި ވާހަކަފުޅު ދައްކަވަމުންނެވެ.
އެމްޑީޕީގެ ރިޔާސީ ޓިކެޓުގައި ވެރިކަމުގެ ދެވަނަ ދައުރެއް ހޯދެއްވުމަށް މި ފަހަރުގެ ރިޔާސީ އިންތިހާބުގައި ވާދަކުރައްވާ ރައީސް އިބްރާހީމް މުހައްމަދު ސާލިހަށް ފާޑުވިދާޅުވެ ރައީސް ނަޝީދު ވިދާޅުވީ އަމާޒަކަށް ވާންވާނީ ދެވަނަ ދައުރެއް ހޯދުމަށް މަސައްކަތްކުރުން ނޫން ކަމަށާއި އަޅުގަނޑުމެން ކުރަންވީ ކަމަކީ، ރައްޔިތުންގެ ދިރިއުޅުން އާރާސްތު ކުރުމަށް މަސައްކަތް ކުރުން ކަމަށެވެ. ނަޝީދުވަނީ ދެވަނަ ދައުރެއްގެ ބޭނުމުގައި ބައެއް ޕާޓީތަކުން ކެމްޕޭން ކުރާތީ ވަރަށް ބޮޑަށް ކަންބޮޑުވެވަޑައިގަންނަވާ ކަމަށް ވިދާޅުވެފައެވެ.
ވެރިކަމަށް ޓަކައި ކުރާ އެއްވެސް ކަމެއްގައި ބައިވެރިއެއް ނުވެވޭނެ. އެއްވެސް މީހަކު ތާއަބަދު ބޭނުންވާ ކަމަކީ ވެރިކަން ކަމަށް ވަންޏާ އަޅުގަނޑުމެން އެކަކަށް ވެސް ރަނގަޅު ގޮތެއް ނޫން.
– ރައީސް މުހައްމަދު ނަޝީދު ވިދާޅުވިއެވެ
ރާއްޖޭގައި ވެރިކަން ކުރުމުގެ ސަގާފަތް މިދިޔަ 15 އަހަރު އޮތް ގޮތަށް އިޝާރާތް ކުރައްވައި ނަޝީދު ވިދާޅުވީ ސަރުކާރު ހިންގެން އޮތީ ރައްޔިތުންގެ މަޖިލިހުގެ ރުހުން އޮވެގެންކަމަށެވެ. ނަޝީދު ވަނީ ނުރަނގަޅު އެތައް ކަމެއް ކޮށްގެން، މެންބަރުންނަށް ޕްރޮޖެކްޓްތައްދީ، ރައީސުލްޖުމްހޫރިއްޔާއަށް މަޖިލިސް ކޮންޓްރޯލް ކުރައްވަން ޖެހުމުން އެ ހެއްދެވެނީ ބޮޑު ގޯހެއްކަން ފާހަގަކުރައްވާފައެވެ.
ނަޝީދު ވިދާޅުވީ، މި ސަރުކާރުގެ ދަރިނިވެސް ވެގެން މި ދަނީ ވަކި އަތަކަށް މީހުން ލެންބުމަށް ބޭނުން ކުރާ ވަސީލަތަކަށް ކަމަށެވެ. އަދި މި ދޭ ފައިސާއަކުން ކަމެއް ހިންގާ ތަނެއް ފެނިގެން ނުދާ ކަަމަށްވެސް ނަޝީދު ވިދާޅުވިއެވެ. އެކަމާއި ގުޅޭ މިސާލު ޖައްސަވަމުން ނަޝީދު ވިދާޅުވީ، ގެސްޓް ހައުސްއެއް އަޅަން ލޯނެއް ލިބި، އެ ލޯނުން ގެސްޓް ހައުސް އަޅާ ނިމިގެން އޭގެން އާމްްދަނީއެއް ލިބި އެ ލޯނު އަނބުރާ ދެކެވޭނެ ތަނެއް ނުފެންނަ ކަަމަށެވެ.
އެހެންކަމުން މަޖިލީސްގެ ބޭނުންތެރިކަން ރައީސް ހޯދަން ޖެހިވަޑައިގަންނަވަނީ ނޭދެވޭ ގޮތްތަކުން ކަމަށާއި، ހިންގާ ކޮންޓެރްކްޓް ތަކެއްގެ ބޭނުން ކުރައްވައިގެން ކަމަށް ނަޝީދު ވިދާޅުވިއެވެ. އަދި އެއީ އެމަނިކުފާނު ދެކެވަޑައިގަންނަވާ ގޮތުގައި ތަރައްގީއަށް އެޅޭ ވަަރަށް ބޮޑު ހުރަހެއް ކަަމަށް ނަޝީދު ވިދާޅުވިއެވެ.
