އަންނަ މަހުގެ 6 ވަނަ ދުވަހު އޮލިމްޕަހަށް ގެންނަން ތާވަލް ކޮށްފައިވާ އައިފިލްސް ގެ ދެވަނަ ފީޗާ ފިލްމު "ނީނާ" ގައި އޭގެ ޓައިޓްލް ރޯލު ކުޅުނު ނުޒުހަތު ޝުއައިބް (ނުޒޫ) އެ ރޯލު ކުޅެފައިވަނީ 150،000ރ. އަށް ކަމަށް ބުނެފިއެވެ.
ޓީވީއެމުން ރޭ ގެނެސްދިން "ވީކެންޑް ވައިބްސް" ޕްރޮގްރާމްގައި ނުޒޫ ބުނީ އެ ފިލްމުގެ މަސައްކަތަށް ހުސްވެގެން ހުންނާތީ، 2019 ވަނަ އަހަރުން ފެށިގެން މިހާތަނަށް މުޅި ޖުމްލަ 150،000ރ. އޭނާއަށް ލިބިފައިވާ ކަމަށެވެ.
މިއީ އާންމުކޮށް ދިވެހި އެކްޓަރުންނަށް ދޭ މުސާރައަށް ވުރެ ވަރަށް ބޮޑު އަދަދެކެވެ. މިހާތަނަށް ދިވެހި ފިލްމުސްޓާރަކަށް އެންމެ ބޮޑު އަގެއް ދީގެން ފިލްމެއް ކުޅުވީ 2010 ގައި ނުކުތް ފިލްމު "ނިއުމާ"ގަ އެވެ. ނިއުމާ" އިން ނިއުމާ އަށް ފީއެއްގެ ގޮތުގައި 175،000ރ. ލިބުނެވެ. އެހެންވެ އޭނަވެފައި ވަނީ ރާއްޖޭގައި މިހާތަނަށް އެންމެ ބޮޑު ބޮޑު އަގަކަށް ފިލްމެއް ކުޅުނު ތަރިއަށެވެ.
މިއީ ވަރަށް ތަފާތު އަންހެން ކެރެކްޓާއެއް ފެންނާނެ ކްރައިމް ތުރިލާއެކެވެ. "ނީނާ" ގައި ނުޒޫ ކުޅެފައި ވަނީ މީގެ ކުރިން ދިވެހި ފިލްމަކުން ބަތަލާއަކު ނުފެންނަހާ ތަފާތު ރޯލަކުންނެވެ. މި ރޯލަށް ތައްޔާރުވުމުގެ ގޮތުން އޭނަ މާޝަލް އާޓްސް ވެސް ދަސްކުރި އެވެ.
އާސިމް ޢަލީ އަދި އަޙްމަދު ވަހީދު ޕްރޮޑިއުސްކޮށް، 'އައި ފިލްމްސް' އިން ގެނެސްދޭ ނީނާ އަކީ 2019 ގެ ސައިކޮލިޖިކަލް ތުރިލާ "ބަވަތި" އަށް ފަހު އިއްލެ ގެނެސްދޭ ދެވަނަ ފީޗާ ފިލްމެވެ. މިފިލްމަކީ އިލްޔާސް ވަހީދު (އިއްލެ) ލިޔެ، ޑައިރެކްޓްކޮށްފައިވާ ކްރައިމް ތުރިލާއެކެވެ.
