ވެރިކަމަަށް އައުމަށްޓަކައި އޭރު އުފެއްދި ކޯލިޝަން މިހާރުވެސް ދެމި އެބައޮތް ކަމަށާއި، މިއަހަރުގެ އިންތިޚާބު ކާމިޔާބު ކުރެއްވުމަށް އުފައްދަވާފައިވާ ކޯލިޝަންވެސް ދަމަހައްޓަވާނޭ ކަމުގައި ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު ވިދާޅުވެއްޖެއެވެ.
ރާއްޖޭގެ އެންމެ އާބާދީ ކުޑަ އަތޮޅު ވ.އަތޮޅަށް ރައީސް ޞާލިހު ކުރައްވަމުންދާ ދަތުރުފުޅުގައި މިއަދު ވަ.ކެޔޮދޫއަށް ވަޑައިގެން އެރަށުގެ ރައްޔިތުންނާއި ވާހަކަފުޅު ދައްކަވަމުން ވިދާޅުވީ ވ.އަތޮޅަކީ އާބާދީ ކުޑަކަމުގައި ވީނަމަވެސް ތަރައްޤީ ނުކުރެވި އޮތް އަތޮޅެއް ކަމަށެވެ. ނަމަވެސް މިސަރުކާރުން ވެރިކަމަށް އައިސް އެކަން ބަދަލުކޮށްލާފައިވާނެ ކަމަށް ރައީސް ވިދާޅުވިއެވެ.
ރައީސް ވިދާޅުވީ މިސަރުކާރުން ރާއްޖެއަށް ގެނައި ތަރައްޤީގެ އެންމެ ބޮޑު ހިއްސާއެއް އޮތީ ގައުމުގައި އޮތް ހަމަޖެހުންކަމަށެވެ. އެހަމަޖެހުން ދެމިއޮތީ ވެރިކަމަށް އައުމަށް 2018 ވަނަ އަހަރު އެކުލަވާލި ކޯލިޝަން ދެމި އޮތުމުންކަމަށް ރައީސް ވިދާޅުވިއެވެ. އޭރު ވެރިކަމަށް އައުމަށް ކޯލިޝަން ހެދީ، ޖުމްހޫރީ ޕާޓީއާއި، އަދާލާތު ޕާޓީއާއި، އެމްއާރުއެމްއާއި އެކުގައިކަން ފާހަގަކޮށް ރައީސް ވިދާޅުވީ މިއަދުވެސް މިކޯލިޝަން ދެމި އޮތްކަމަށެވެ.
އޭރު ވެރިކަމަށް އައީ ޖޭޕީ، އެމްއާރުއެމް އަދާލަތު ޕާޓީއާއިއެކު. މިކޯލިޝަން ދެމެހެއްޓުމަކީ މިހާތަނަށް ގައުމުގެ ހަމަޖެހުން ގާއިމް ކުރެވުމުގެ އަސްލު. މިއަދުވެސް ކޯލިޝަން ދެމި އެބައޮތް. އަދިވެސް ވެރިކަން ކުރެވޭނީ ގިނަ ސިޔާސީ ޕާޓީތަކުގެ ޚިޔާލާއި ވިސްނުމާއިއެކު.
– ރައީސް ވިދާޅުވިއެވެ.
ރައީސް ވިދާޅުވީ މިހާރު އޮތް ކޯލިޝަނަކީ ރާއްޖޭގެ އައުލަބިއްޔަތު ބޭނުންވާ ސަރުކާރެއް އުފައްދާނެ ކޯލިޝަނަކަށް ވާނެކަމަށެވެ. އެގޮތުން އަދާލަތާއި، އެމްޑީއޭއާއި އެކު އުފައްދާފައިވާ ކޯލިޝަނަކީ ރާއްޖެއަށް ހެޔޮ ބަދަލެއް ގެނުވޭނެ ކޯލިޝަނަކަށް ވެގެންދާނެކަމަށް ރައީސް ވިދާޅުވިއެވެ.
ރައީސް ވިދާޅުވީ ވެރިކަމަށް ވަޑައިިގެން ވީ ވައުދުތަކުގެ 90 އިންސައްތަ ވައުދުތައް ފުއްދިފައިވާކަމަށެވެ. އަދި ކެޔޮދޫގެ ގިނަ ތަރައްޤީގެ މަޝަރޫޢުތައް ނިމިފައިވާކަމަށެވެ. ދެން ހުރި މަސައްކަތް ތަކުގެ ތެރެއިން ފުޓުބޯޅަ ދަނޑާއި، ވޮލީ ކޯޓާއި އަދި ސިއްޚީ ޚިދުމަތް ރަނގަޅު ކުރުމަށްޓަކައި ހެލްތު ސެންޓަރުގެ މަސައްކަތް ވަރަށް އަވަހަކަށް ފަށާނެކަމަށް ރައީސް ވައުދުވިއެވެ.
