2018 ގެ ރިޔާސީ އިންތިޚާބުގެ ކެމްޕޭން ދުވަސް ވަރާއި ހަމައަށް އައިއިރު ރާއްޖޭގެ އިދިކޮޅު ހުރިހާ ސިޔާސީ ފަރާތްތަކާއި، ސަރުކާރާއި ދެކޮޅަށް ބަސްބުނި ކޮންމެ މީހަކު އޮތީ ޖަލުގައި ކަމަށާއި، ނަމަވެސް މިއަދު އެހާލަތު ބަދަލުކުރެވިފައިވާކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު ވިދާޅުވެއްޖެއެވެ.
ގުރައިދޫ ދާއިރާގެ ކެމްޕޭނަށް ކުރައްވާ ދަތުރުގައި، ގުޅިއަށް ވަޑައިގެން ގުޅީ ރައްޔިތުންނާއި މުޚާތަބް ކުރައްވާ ރައީސް ޞާލިހު ވިދާޅުވީ 2018ގެ ރިޔާސީ އިންތިޚާބުގައި ކަންކަން އޮތް ގޮތާއި، މިއަދު 2023 ވަނަ އަހަރުގެ ރިޔާސީ އިންތިޚާބުގެ ދުވަސްވަރު ކަންކަން އޮތްގޮތް ވަޒަން ކޮށްލުމުން ރައްޔިތުންނަށް ކަންކަން ސާފުވާނެކަމަށެވެ.
ސިޔާސީ ކަމެއްގައި އޭރުގެ ސަރުކާރާއި ދެކޮޅަށް އަޑު އުފުލި ކޮންމެ މީހަކު، އެއީ ފަނޑިޔާރެއް، ސިޔާސީ މީހެއް، އާންމު ރައްޔިތެއް ތަފާތެއް ނެތި އޭރު ލީ ޖަލަށް. މަޖިލީހަށް އަޅުގަނޑުމެން ވަންނަން ދިޔާމަ ސިފައިން ފޮނުވައިގެން ނުވެއްދި. މަޖިލީހުގެ 12 މެމްބަރެއްގެ ގޮނޑި ގެއްލުވާލި. ފަނޑިޔާރުގެއެއް އޭރުވީ ގޮތް ކިޔާދޭކަށް ނުޖެހޭ.
– ރައީސް ޞާލިހު ވިދާޅުވިއެވެ.
ރައީސް ވިދާޅުވީ ރާއްޖޭގެ ރައްޔިތުން ބޭނުންވަނީ އަމާން ކަމާއި ސުލްހަވެރި ކަމާއިއެކު ދިރި އުޅެންކަމަށެވެ. ސިޔާސީ ވެރިންނާއި، ނޫސްވެރިންނާއި، ފަނޑިޔާރުން ޖަލަށް ލައިގެން އުޅުމަކީ ރައްޔިތުން އެދޭ ގޮތެއް ނޫންކަމަށެވެ. މިވެރިކަމުގައި ދިވެހި ރައްޔިތުންނަށް ހޯދައިދިން ޔަގީންކަމަކީ އަނިޔާވެރިކަމާއި ދުރު ތަރައްޤީގެ ކުރިމަގެއް ހޯދައި ދިނުންކަމަށާއި، އެކަން މިއަދު ދިވެހި ރައްޔިތުންނަށް ޔަގީން ވެފައިވާކަމަށް ރައީސް ޞާލިހު ވިދާޅުވިއެވެ.
ރައީސް މިހެން ވިދާޅުވި ނަމަވެސް އިދިކޮޅު ފަރާތްތަކުން ދަނީ އިދިިކޮޅު ލީޑަރު ރައީސް ޔާމީން ޖަލަށް ލާފައިވުމަކީ އެތަކެއް ރައްޔިތުންނަށް ދެވޭ ބޮޑު އަނިޔާއެއްކަމަށް ވިދާޅުވަމުންނެވެ.
