އެމްޑީޕީގެ ރިޔާސީ ކެންޑިޑޭޓް، ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙުގެ ކެމްޕޭނަށް، އެމަނިކުފާނު މިއަދު މާލޭގެ ބައެއް ގެތަކަށް ދޮރުންދޮރަށް ހިނގަން ހަމަޖެހިފައިވާ ކަމަށް އެ ޕާޓީން ބުނެފިއެވެ.
މިކަމާއި ގުޅިގެން އެމްޑީޕީން ބުނީ، ރައީސް ޞާލިހުގެ ކެންޕެއިނަށް ބާއްވާ ދޮރުން ދޮރަށް ކެންޕެއިން ހަރަކާތަށް މާލޭގެ ގަލޮޅުގެ ގެތަކަށް އެމަނިކުފާނު މިއަދު ވަޑައިގަންނަވާނެ ކަމަށެވެ. އަދި މި ހަރަކާތް ފެށުމަށް ހަމަޖެހިފައިވަނީ ހަވީރު 3:50 ގައި، ބޮޑު ރަސްގެފާނު މަގު/ ނިރޮޅުމަގު ޖަންކްޝަން ކައިރިން ކަމަށްވެސް ބުނެފައިވެއެވެ.
ކުރިއަށް އޮތް ރިޔާސީ އިންތިހާބުގައި ރައީސް ޞާލިހަށް ތާއީދު ހޯއްދެވުމަށް އެމްޑީޕީން މިހާރު ވަނީ އަތޮޅު ތެރޭގައިވެސް ކެންޕެއިން ހަރަކާތްތައް ފަށާފައެވެ. އަދި އެމްޑީޕީއާއި އެކު ކޯލިޝަން ހަދާފައިވާ އެމްޑީއޭ އާއި އަދާލަތު ޕާޓީންވެސް އަންނަނީ ރައީސް ޞާލިހުގެ ކެންޕެއިން ހަރަކާތްތައް ކުރިއަށް ގެންދަމުންނެވެ.
އެމްޑީޕީގެ އިތުރުން، ޕީޕީއެމް އިން އެ ޕާޓީގެ ރިޔާސީ ކެންޑިޑޭޓް ރައީސް ޔާމީން އަބްދުލްގައްޔޫމްގެ ކެންޕެއިނަށް މާލޭގެ ބައެއް ގޭގެއަށް ދޮރުން ދޮރަށް ހިނގުމުގެ ހަރަކާތެއް ނިމުނު ހަފްތާގައި ވަނީ ކުރިއަށް ގެންގޮސްފައެވެ.
ރިޔާސީ އިންތިޚާބުގައި އެމްޑީޕީގެ ފަރާތުން ވާދަކުރައްވާނެ ކެނޑިޑޭޓެއް ކަނޑައަޅުއްވާފައިވަނީ އެޕާޓީގެ ތެރޭގައި ބޭއްވު ރިޔާސީ ޕްރައިމަރީއަކުންނެވެ. މިއީ މިފަހަރުގެ ރިޔާސީ އިންތިޚާބުގައި އެތެރޭގެ ޕްރައިމަރީއަކުން ރިޔާސީ ކެނޑިޑޭޓަކު ކަނޑައެޅި ފުރަތަމަ ޕާޓީވެސް މެއެވެ. ރިޔާސީ ޕްރައިމަރީއަށްފަހު ކެމްޕެއިން ހަރަކާތްތައް އެމްޑީޕީން ދަނީ މާލެއާއި އަތޮޅު ތެރޭގެ ރަށްތަކުގައި ކުރިއަށް ގެންދަމުންނެވެ. މިދަތުރުތަކުގެ ބޭނުމަކީ ރިޔާސީ އިންތިޚާބަށް އެމްޑީޕީން އެކުލަވާލާ މެނިފެސްޓޯއަށް ބޭނުންވާ މައުލޫމާތުތައް އެއްކުރުމާއި، ރަށްރަށުގައި ހުރި ކަންބޮޑުވުންތައް ސަރުކާރާއި ހަމައަށް ގެނެސް ދިނުމެވެ.
