އެމްޑީޕީ ދެބައިވެ އެޕާޓީން ވަކިވި މެމްބަރުން އުފައްދާފައިވާ "ދަ ޑިމޮކްރެޓްސް"އަށް ނަޝީދު ސޮއިކުރުމަށް ޚާއްސަ ޖަލްސާއެއް ބޭއްވުމަށް އެ ޕާޓީން ހަމަޖައްސައިފިއެވެ.
"ޚަބަރު އޮންލައިން"އަށް މައުލޫމާތު ދެމުން "ދަ ޑިމޮކްރެޓްސް"ގެ އިސް ބޭފުޅަކު ވިދާޅުވި ގޮތުގައި ނަޝީދު އެޕާޓީއަށް ސޮއިކުރުމަށް ބާއްވާ ޖަލްސާ ބާއްވާނެ ތާރީޚެއް ވަރަށް އަވަހަށް އިއުލާން ކުރާނެއެވެ.
"ދަ ޑިމޮކްރެޓްސް" އުފެއްދުމަށް ބޭއްވި ޖަލްސާ ބާއްވާފައިވަނީ މިމަހުގެ 5 ވަނަ ދުވަހުގެ ރޭއެވެ. އެ ޖަލްސާގައި ބައިވެރިވެވަޑައިގެން ނަޝީދުވަނީ ވާހަކަވެސް ދައްކަވާފައެވެ. އެޖަލްސާގައި ވާހަކަ ދައްކަވަމުން ނަޝީދު ވިދާޅުވެފައިވަނީ އެމްޑީޕީގެ ބޮޑުބައި އޮތީ "ދަ ޑިމޮކްރެޓްސް"ގައި ކަމަށާއި، އެއީ އެމްޑީގެ %80 އަށްވުރެ ބޮޑުބައި ކަމުގައެވެ.
ދަ ޑިމޮކްރެޓްސް ޕާޓީ އުފެއްދުމަށް ޢިޔާސުއްދީން ސްކޫލުގައި މިމަހުގެ 5 ވަނަ ދުވަހުގެރޭ ބޭއްވި ޖަލްސާގައި ވަނީ އެޕާޓީގެ ވަގުތީ ދެއަރޕާސަންއަކަށް ރައްޔިތުންގެ މަޖިލިހުގެ ހެންވޭރު ހުޅަނގު ދާއިރާގެ މެމްބަރުން ހަސަން ލަތީފުގެ އިންތިޚާބު ކޮށްފައެވެ.
އޭގެ އިތުރުން ވަނީ އެ ޕާޓީގެ ވަގުތީ ޗެއަރޕާސަންގެ ނާއިބުންވެސް ހޮވާފައެވެ. ވަގުތީ ޗެއަރޕާރސަންގެ ނާއިބުންނަށް ހޮވާފައިވާ މެމްބަރުންނަކީ:
1- ނ.އަތޮޅު ކައުންސިލްގެ ރައީސް މުހައްމަދު ބަޝީރު
2- އެންވަޔަރްމެންޓް މިނިސްޓްރީގެ ކުރީގެ ޑެޕިއުޓީ މިނިސްޓަރު މުހައްމަދު އަންސަރު
3- އެލްޖީއޭގެ ކުރީގެ ސީއީއޯ އަފްޝަން ލަތީފު
އޭގެ އިތުރުން ދަ ޑިމޮކްރެޓްސް އުފެއްދުމުގެ ބޭއްވި އާންމު ޖަލްސާގައި ވަނީ އެޕާޓީގެ ޕާޓީގެ ނަމާއި، ލޯގޯއާއި، ކުލަ ފާސްކޮށްފައެވެ.
