"ވަންނާނެ ތަނެއް ނެތް، ދަރިންނަށް އަޅާލެވޭނެ ގޮތެއް ނެތް، މިރޭ ކެވޭނެ ގޮތެއް ނެތް، މެދަށް ހުރި ދަރި ގޭންގްއަކަށް ވަދެއްޖޭ ދޮށީ ދަރި ޑްރަގްގުގެ ވަބާގައި ޖެހިފަ، އަންހެން ދަރި ގެވެށި އަނިޔާގައި ހުރި ހިނދެއްގައި، މާލޭ ރައްޔިތު މީހާގެ ވޯޓު ގަނެލުމަށްޓަކައި ގޯއްޗެއް ދޭނަމޭ ކިޔާ ދޮގު ހެދުމަކީ އަޅުގަނޑު ދެކޭ ގޮތުގައި އެއްވެސް މީހަކު ކޮށްގެންވާނެކަމެއް ނޫން އަދި އެކަން ކުރާ މީހަކަށް އެއްވެސް ހާލެއްގައި މަޢާފު ދީގެންވެސް ނުވާނެ" ރައީސް ނަޝީދު ވިދާޅުވިއެވެ.
ރައީސް ނަޝީދު މިފަދައިން ވިދާޅުވީ ރައީސް ނަޝީދަށް ތާއީދުކުރައްވާ މަޖިލިސް މެންބަރުންތަކެއް އިސްވެ ތިއްބަވައިގެން އުފައްދަވާ ދަ ޑިމޮކްރެޓްސް ޕާޓީ އުފެއްދުމަށް ރޭ ޣިޔާސުއްދީން ސުކޫލުގައި ބޭއްވި ޖަލްސާގައި ވާހަކަދައްކަވަމުންނެވެ. ރައީސް ނަޝީދުގެ ވާހަކަފުޅުގައި ސަރުކާރަށާއި ރައީސް ޞާލިހަށް ވަރަށް ބޮޑަށް ފާޑުވިދާޅުވެފައިވެއެވެ.
ރައީސް ޞާލިހަށް ދަންނަވަން އޮތް ވާހަކައަކީ މާލެ ރައްޔިތުން އިންތިހާއަށް ބޭނުންވާ ކަމަކީ ބޯހިޔާވަހިކަމުގެ ވާހަކަ ކަމަށް އެމނިކުފާނުވެސް ރައީސް ޞާލިޙް އަރިހުގައި ތަކުރާރުކޮށް ދަންނަވާފައިވާނެކަމަށް ވިދާޅުވިއެވެ.
އެމްޑީޕީން ވެރިކަމަށް އައި ދެވަނަ ފަހަރަށް ވާއިރު، އެއްވެސް ވަރަކަށް ކަންކަން ހަރުދަނާ އުސޫލެއްގެ ދަށުން ކުރަމުން އަންނަ ތަނެއް ނުފެންނަ ކަމަށް ރައީސް ނަޝީދު ވިދާޅުވިއެވެ. އެމްޑީޕީއަށް ދެވަނަ ބުރަކަށް ރާއްޖޭގެ ވެރިކަން ލިބިފައިވާއިރު އެމްޑީޕީގެ ކުރީގެ ވެރިކަމުގައިވެސް ވަޒީރުކަން ކުރައްވާފައިވާ ވަޒީރުން މިހާރުވެސް އެބަ ތިބިކަން ފާހަގަކޮށް، ސަރުކާރުގެ ތެރެއިން ކަން ކުރަންވީ ގޮތް އެބޭފުޅުންނަށް ރަގަޅަށް އިނގޭނެކަމަށާއި ތަޖުރިބާ ހުންނާނެކަން ފާހަގަކުރެއްވިއެވެ.
"ދަންނަވަން އޮތީ ދައުރު ނިމެން ވިހި ދުވަހަށް ވީމައި، ގޯތި ދޭން އުޅޭތީ އެކަން ކުށްވެރި ކުރަން، އަދިވެސް މިސަރުކާރުގެ ބޯހިޔާވަހިކަމެއް ނުލިބޭ، ތަނެއް ލިބުނު މީހަކުވެސް ނެތް" ނަޝީދު ވިދާޅުވިއެވެ.
އެމްޑީޕީއިން ވަކިވެފައިވާކަމަށާއި، އެމްޑީޕީއަށް އެ ލިބުނީ ކުޑަ ބައިކަމަށާއި ރައީސް ނަޝީދާއި އެކު ދަ ޑިމޮކްރެޓްސްއާއި ގުޅިފައިވަނީ އެމްޑީޕީގެ ބޮޑުބައި ކަމަށް ރައީސް ނަޝީދު ވިދާޅުވިއެވެ.
ޑިމޮކްރެޓްސް އުފެއްދުމަށް ކުރިއަށް ގެންދިޔަ ޖަލްސާގައި ރައީސް ނަޝީދު ވިދާޅުވީ، އެ ޕާޓީއަކީ އެމްޑީޕީގެ އެއްބައި ކަމަށެވެ. އަދި އެ ޕާޓީ ދޫކޮށް އައި މެމްބަރުންނާއި އެކު ޑިމޮކްރެޓްސް އަކީ ރައީސް ނަޝީދު ވިދާޅުވި ގޮތުގައި އެމްޑީޕީގެ މެޖޯރިޓީއެވެ. ނުވަތަ އެއި އެ ޕާޓީގެ 80 އިންސައްތަކަމަށް ރައީސް ނަޝީދު ވިދާޅުވި އެވެ.
ރައީސް ނަޝީދު ވިދާޅުވީ، ވަކިވެގަނެ ވަކިން އެހެން ތަނަކަށް ޖަމާވާން ޖެހުނީ އުންމީދުތައް ގެއްލިގެން ދިއުމުން ކަމަށެވެ. ރާއްޖޭގެ ޝަރުއީ ނިޒާމު ދޯދިޔާވެ ރައްޔިތުންގެ އިތުބާރު ގެއްލިފައިވާއިރު މިއަދު މިނިވަން މުވައްސަސާއެއްގެ މަސައްކަތްތައް އެއީ އިހުލާސްތެރި ތެދުވެރި މަސައްކަތެއްކަމަށް ގަބޫލު ކުރާ ރައްޔިތެއް ނެތްކަމަށް ރައީސް ނަޝީދު ވިދާޅުވި އެވެ.
One Response
ކޮންމެ މީހަކުވެސް ކޮންމެވެސް ކަމެއް ކޮށްދޭނަމޭ ކިޔައިގެން ވެރިކަމަށް އަންނީ މުޅިންވެސް ރިޝްވަތު ދިނުމުގަ ތިމާ މީހާއަށްވެސް އެފަދަ ބާރެއް އޮތް ނަމަ ހަމަ އެކަން ކުރާނެ ބެއްޔާ. ޢެފަދަ ކަންތައް ކޮށްދޭން ބުނާނެ ވެރިކަމަށް އަންނަން އުޅޭ އިރު ވެތިކަމުގަ ހުންނަ މޯހާ ކުރާނީނއެއީ އޭނާއަށް ބާރު ލިބިފަ އޮތީމަ. ޔާ ﷲ ކެނެރީގޭ ނަޝީދު މިޤައުމުގެ ވެރިކަމުން ދުރު ކުރައްވާނދޭވެ! ޢާމީން.