އެމްޑީޕީގެ ކުރީގެ ރައީސް މުހައްމަދު ނަޝީދު މާދަމާރޭ ޑިމޮކްރެޓްސް ޕާޓީއަށް ސޮއި ކުރައްވާ އެޕާޓީއާއި ގުޅިވަޑައިގަތުމަށް ހަމަޖެހިފައިވާކަމަށް "ޚަބަރު އޮންލައިން" އަށް މައުލޫމާތު ލިބިއްޖެއެވެ.
"ދަ ޑިމޮކްރެޓްސް" ޕާޓީ އުފެއްދުމަށް މިމަހުގެ 5 ވަނަ ދުވަހު އިއްޔާސުއްދީން ސްކޫލުގައި ބޭއްވުމަށް ހަމެޖެހިފައިވާ ޖަލްސާގައި ބައިވެރިވެވަޑައިގަންނަވާނޭކަމަށް ވިދާޅުވެ ނަޝީދުވަނީ މީގެ ކުރިން ޓުވީޓު ކުރައްވާފައެވެ.
ޑިމޮކްރެޓްސް ޕާޓީ އުފެއްދުމަށް ބާއްވާ ޖަލްސާގައި ނަޝީދު ބައިވެރިވެވަޑައިގަންނަވާނޭކަން އިއުލާން ކުރައްވާފައިވާއިރު، އެޕާޓީ އުފެއްދުމުގެ ހުއްދަ އިލެކްޝަންސް ކޮމިޝަނުން ދޫކޮށްފައިވަނީ މިއަދުއެވެ. ހުއްދަ ލިބުމާއެކު، ޕާޓީ އުފެއްދުމަށް ބާއްވާ ޖަލްސާ މިމަހުގެ 5 ވަނަ ދުވަހުގެ ރޭ 8:30 ގައި އިޔާސުއްދީން ސްކޫލުގައި ބޭއްވުމަށް ހަމެޖެހިފައިވާކަން އެޕާޓީގެ މުވައްސިސް އަދި ރައްޔިތުންގެ މަޖިލިހުގެ މެމްބަރުން ހަސަން ލަތީފު ވަނީ އިއުލާން ކުރައްވާފައެވެ.
ދަ ޑިމޮކްރެޓްސް އަކީ ރައީސް ނަޝީދަށް ތާއިދު ކުރައްވާ ފަރާތްތަކުން އުފައްދަވަން މަސައްކަތް ކުރައްވާ ސިޔާސީ ޕާޓީއެކެވެ. ދަ ޑިމޮކްރެޓްސް' އުފެއްދުމުގެ މަސައްކަތް ކުރުމުގެ ހުއްދަ އިލެކްޝަންސް ކޮމިޝަނުން ދީފައިވަނީ 2023 މެއި 24 ވަނަ ދުވަހުއެވެ. ހަފްތާއެއްގެ ތެރޭގައި ޕާޓީ އުފެއްދުމަށް ބޭނުންވާ އަދަދަށް ސޮއި ހަމަކޮށް ޖޫން 1 ގައި 3،560 ފޯމު އެ ޕާޓީން އީސީއަށް ހުށަހަޅާފައިވެއެވެ.
