ކޮންމެ އަހަރަކު ބާއްވަމުންދާ ކުޅުދުއްފުށީ މަށި މާލެ ޕެރޭޑުގައި މިފަހަރުވެސް ރައްޔިތުންގެ މެދުގައި އެންމެ މަގުލޫ ކަންކަމަށް ބަލައި މާލިތައް ނެރެފިއެވެ.
މިފަހަރު މާލިތަކުގެ ތެރެއިން އެންމެ ބޮޑު ސަމާލުކަމެއް ހޯދި މާލިތަކުގެ ތެރޭގައި އާރުޑީސީއާއި ގުޅުންހުރި 3 މާއްޔެއް ވަނީ ނެރެފައެވެ. އޭގެ ތެރޭގައި ހިމެނެނީ އާރުޑީސީގެ ތިޖޫރީ ދެތިން ފަހަރެއްގެ މަތީން ފަޅާލާފައިވާތީ އެކަމަށް ޚާއްސަކުރި މާއްޔަކާއި، އާރުޑީސީން މަގު ހެދުމުގައި ގެންގުޅޭ އާލާތްތަކާއި، ސްޕީޑާއި، އަދި އާރުޑީސީގެ މަސައްކަތަށް ބޭނުން ކުރާ އާލާތްތައްވެސް ވަނީ ދައްކާލާފައެވެ.
އާރުޑީސީގެ ތިޖޫރީ ވަނީ 3 ފަހަރަކު ފަޅާލާފައެވެ. ތިޖޫރީ ފަޅާލި މައްސަލާގައި މީހަކު ހައްޔަރު ނުކުރާއިރު ގެއްލުނު ފައިސާތަކަށް ވީގޮތެއްވެސް މިހާތަނަށް ނޭގެއެވެ.
މީގެ އިތުރުން ރަށްރަށުގައިި އާރުޑީސީން ހިންގާ ތާރު އެޅުމުގެ މަޝްރޫޢުތައް އެންމެ އެކަށީގެންވާ ގޮތަށް ނުދާކަންވެސް މިމާލިތަކުން ވަނީ ދައްކާފައެވެ. އެގޮޮތުން ކުޅުދުއްފުށި ސިޓީގައި ތާރު އެޅުމުގެ މަސައްކަތް ކުރާ ސްޕީޑާއިމެދު މިމާލިތަކުން ވަނީ ދައްކާލާފައެވެ.
މިމާލިތަކުގެ ފަހަތުގައި ގިނަ އަދަދެއްގެ މާލިތައް އާރުޑީސީގެ މަސައްކަތު ފޭރާމުގައި ތިބޭތަންވެސް ފެނެއެވެ. މީގެ ބޭނުމަކީ ގިނަ ބަޔަކު ތިބެމެ މަސައްކަތް އެންމެ އެކަށީގެންވާ ގޮތަށް ނުހިނާކަން ދެއްކުމެވެ.
ކުޅުދުއްފުށީގެ މިއަހަރުގެ މާލި ޕެރޭޑަށްވެސް ބޮޑު ތަރުހީބެއް ވަނީ ލިބިގެން ގޮސްފައެވެ.
