އެތުލެޓިކްސް އެސޯސިއޭޝަނުން އަސާސީ ގަވާއިދާ ހިލާފަށް އަސާސީ ގަވާއިދު ބަދަލުކުރި ކަމަށް ތުހުމަތުކޮށް ރައްޔިތުންގެ މަޖިލީހުގައި އެމްޑީޕީގެ ޕާލިމެންޓްރީ ގްރޫޕްގެ ލީޑަރު، މެދު ހެންވޭރު ދާއިރާގެ މެންބަރު ޢަލީ އާޒިމް ދެއްކެވި ވާހަކަފުޅު އެ އެސޯސިއޭޝަނުން ދޮގުކޮށްފިއެވެ.
އެތުލެޓިކް އެސޯސިއޭޝަނުން ނެރުނު ބަޔާނުގައި ވަނީ އާޒިމް ވިދާޅުވެފައިވާ ގޮތަށް އެސޯސިއޭޝަންގެ އިންތިހާބު ބޭއްވުމުގެ ކުރިން އެސޯސިއޭޝަންގެ ގަވާއިދަށް އެއްވެސް ބަދަލެއް ގެނެސްފައި ނުވާ ކަމަށެވެ. އަދި އިންތިހާބުގެ ކުރިން އަސާސީ ގަވާއިދަށް އިސްލާހު ގެނައުމަކީ މަނާ ކަމެއް ވެސް ނޫން ކަމަށެވެ.
އެ ބަޔާނުގައިވާ ގޮތުން އެންމެ ފަހުން އެސޯސިއޭޝަންގެ އަސާސީ ގަވާއިދަށް ބަދަލެއް ގެނެސްފައިވަނީ 2015 ގައެވެ. އެއީ 2015 ގައި ވުޖޫދު ކުރެވުނު ކުޅިވަރު ގާނޫނުގައި ކުޅިވަރު އެސޯސިއޭޝަންތައް ރަޖިސްޓްރީ ކުރަން ޖެހޭތީ ގެނައި ބަދަލެކެވެ. ކުރިން ހޯމް މިނިސްޓްރީގައި ރަޖިސްޓްރީ ވާން އޮންނާތީ ގަވާއިދު އޮތީ އެ ގޮތަށެވެ.
އެތުލެޓިކްސް އެސޯސިއޭޝަނުން ބުނީ މަޖިލީހުގެ މެޖޯރިޓީ ލިޑަރު ކަމަށް ވިޔަސް މަޖިލީހުގައި ވާހަކަ ދައްކަވާއިރު ހާމަ ކުރައްވަން ވާނީ ތެދު މައުލޫމާތު ކަމަށެވެ. އަދި އެ އެސޯސިއޭޝަނާ މެދު ހަގީގަތާ ހިލާފު ވާހަކަތައް ނުފެތުރުމަށް ވެސް އެތުލެޓިކްސް އެސޯސިއޭޝަނުން އިލްތިމާސްކުރާ ކަމަށް އެ ބަޔާނުގައި ވެއެވެ.
އާޒިމް ވިދާޅުވީ ޖުލައި މަހު 29 ގައި އެތްލެޓިކްސް އެސޯސިއޭޝަންގެ އިންތިހާބު ބޭއްވުމުގެ އެއް ދުވަސް ކުރިން އަސާސީ ގަވާއިދަށް ބަދަލު ގެނެސްފައިވާ ކަމަށެވެ. އޭރު ދެ ދައުރު ފުރިހަމަކޮށްފައިވާ އެތުލެޓިކްސް އެސޯސިއޭޝަންގެ ރައީސް މުޙައްމަދު ތޮލާލް ތިން ވަނަ ދައުރަކަށް އިންތިހާބު ކުރުމަށް މަގުފައިވާ ގޮތަށް އާސާސީ ގަވާއިދަށް ބަދަލު ގެނައި ކަމަށް އާޒިމު ތުހުމަތު ކުރެއްވިއެވެ. މި ގޮތުން ރައީސަށް އަދާ ކުރެވޭނީ ދެ ދައުރަށް ކަމަށް ބަޔާންކޮށް ކުރިން އޮންނަ މާއްދާއެއް ބަދަލުކުރީ ކަމަށް އާޒިމް ވަނީ ތުހުމަތުކޮށްފަ އެވެ
އެސޯސިއޭޝަންގެ ރައީސަށް ގިނަވެގެން އަދާކުރެވޭނީ ކިތައް ދައުރު ކަމެއް އަސާސީ ގަވާއިދުގައި އެއްވެސް އިރެއްގައި ނެތް ކަމަށް ވެސް އެތުލެޓިކްސް އެސޯސިއޭޝަންގެ ބަޔާނުގައިވެއެވެ.
ކޮމެންޓު ފޮނުވާ