ރައްޔިތުންގެ މަޖިލިހުގެ ރައީސް މުހައްމަދު ނަޝީދު މަގާމުން ވަކިކުރަން އެމްޑީޕީން ހުށަހަޅާފައިވާ މައްސަލައިގެ 14 ދުވަހުގެ ނޯޓިސް އެ މަނިކުފާނަށާއި މެމްބަރުންނަށް މަޖިލިހުގެ އިދާރާ އިން އިއްޔެ ފޮނުވައިފިއެވެ.
މި މައްސަލަ މަޖިލީހަށް ހުށަހަޅުއްވާފައިވަނީ 56 މެމްބަރުން ތިއްބަވާ އެމްޑީޕީގެ ޕާލިމަންޓްރީ ގްރޫޕުންނެވެ. ރައްޔިތުންގެ މަޖިލީހުގެ ގަވާއިދުގައިވާގޮތުން މަޖިލީހުގެ ރައީސާއި ނައިބު ރައީސް މަގާމުން ވަކި ކުރެވޭނީ ޖަލްސާއަށް ހާޒިރުވެ، ވޯޓުގައި ބައިވެރިވާ މެމްބަރުންގެ އަޣުލަބިއްޔަތުން ފާސްކުރެއްވުމުންނެވެ. މަޖިލީހުގެ މެމްބަރުންގެ އަދަދަކީ 87 ކަމަށްވާއިރު، ހުރިހާ މެމްބަރުން ހާޒިރުވެ ވޯޓުގައި ބައިވެރިވެއްޖެ ނަމަ ނަޝީދު މަގާމުން ދުރުކުރައްވަން 44 ވޯޓު ބޭނުންވާނެއެވެ.
މަޖިލީހުގެ ގަވާއިދުގައި ބުނާ ގޮތުން، މަޖިލީހުގެ ރައީސްގެ އިތުބާރު ނެތްކަމުގެ މައްސަލައެއް ލިބުމުން، އެކަމުގެ ނޯޓިސް މަޖިލީހުގެ ރައީސަށާއި މެމްބަރުންނަށް ރަސްމީ ބަންދު ނޫން ތިން ދުވަހުގެ ތެރޭގައި ދޭންޖެހެ އެވެ. މަޖިލީހުގެ އިދާރާ އިން ބުނީ ނަޝީދުގެ އިތުބާރު ނެތް ކަމުގެ މައްސަލައިގެ ނޯޓިސް އިއްޔެގެ ވަގުތެއްގައި ފޮނުވާފައިވާ ކަމަށެވެ.
ރައީސް ނަޝީދަށް ފޮނުވާފައިވާ އިތުބާރު ނެތް މައްސަލައިގެ ނޯޓިސްގެ މުއްދަތު ހަމަވާނީ މިމަހުގެ 25 ވަނަ ދުވަހަށެވެ. މިމަހުގެ 22 ވަނަ ދުވަހުން ފެށިގެން މަޖިލިސް ޗުއްޓީއަށް ދާތީ މިދައުރުގައި މިމަސައްކަތް ކުރެވިދާނެ ކަމާއިމެދު ވަނީ ސުވާލު އުފެދިފައެވެ. މަޖިލީހުގެ ތިން ވަނަ ދައުރު ފެށޭނީ އަންނަ އޮގަސްޓު މަހުގެ 16 ވަނަ ދުވަހެވެ.
މަޖިލިސް ޗުއްޓީއަށް ދިޔަ ނަމަވެސް މަޖިލީހުގެ ދައުރުން ބޭރުން ޖަލްސާއެއް ބާއްވަން މެމްބަރުން އެދިއްޖެ ހާލަތެއްގައި ޖަލްސާއެއް ބޭއްވުމުގެ ފުރުސަތު އޮވެއެވެ.
މަޖިލީހުގެ ރައީސްގެ އިތުބާރު ނެތް މައްސަލައިގެ ނޯޓިން ފޮނުވާފައިވާއިރު، މަޖިލީހުގެ ނައިބް ރައީސް އީވާގެ މައްސަލައިގެ 14 ދުވަސް ހަމަވެ މިމައްސަލަ މަޖިލީހުގައި ކުރިއަށް ނުދެއެވެ. މަޖިލީހުގެ ރައީސް ވަނީ މިމައްސަލަ އެޖެންޑާ ކުރި ހިސާބުން ރިޔާސަތަށް އަރާ ވަޑައިގެން އުޒުރުވެރިވާކަމަށް ވިދާޅުވެފައެވެ.
