ޔުއެފާ ޗެމްޕިއަންސް ލީގުގެ ޗެމްޕިއަންކަން ފުރަތަމަ ފަހަރަށް ހޯދުމަށްފަހު, އެނބުރި އިންގްލަންޑަށް ދިޔުމުން މެންޗެސްޓާ ސިޓީގެ ސަޕޯޓަރުން ހޫނު މަރުހަބާއެއް ކިޔައިފިއެވެ.
ސިޓީގެ ސަޕޯޓަރުން ވަނީ އެ ޓީމަށް މަރްހަބާ ކިޔުމަށްޓަކައި މެންޗެސްޓާ އެއާޕޯޓް ދޮށަށް އެއްވެފައެވެ. އެއާޕޯޓުން ހޫނު މަރްހަބާއެއް ކިޔާފައިވާއިރު ސިޓީން މިސީޒަންގައި ކާމިޔާބުކުރި ތިން ތަށި އާންމުކޯށް ސަޕޯޓަރުންނަށް ދައްކާލުމަށް ބޭއްވުމަށް ހަމަޖެހިފައިވާ މަގުމަތީ ޕެރޭޑްގައި އެ ޓީމަށް ތާއީދުކުރާ އެތައް ހާސް ސަޕޯޓަރުންނެއް، މެންޗެސްޓާގެ މަގުތަކަށް އެއްވާނެކަމަށް ވަނީ ބެލެވިފައެވެ.
ސިޓީގެ ކުޅުންތެރިންނާއި އޮފިޝަލުން ތަށިތައް ދައްކާލުމަށްފަހު ޕެރޭޑް ނިންމާލާނީ އެޓީމްގެ ކޯޗް ޕެޕް ގާޑިއޯލާ އާއި އޭނާގެ ކުޅުންތެރިން އެކުލެވޭގޮތަށް ބާއްވާ ސްޓޭޖް އިވެންޓަކަށްފަހުއެވެ.
ސިޓީން ވަނީ ޗެމްޕިއަންސް ލީގުގެ ފައިނަލްގައި އިންޓަރ މިލާނާ ބައްދަލުކޮށް އެއް ލަނޑު ސުން ލަނޑުން މެޗު ކާމިޔާބުކޮށް، އެ ކްލަބްގެ ތާރީހްގައި ފުރަތަމަ ފަހަރަށް މިމުބާރާތް ކާމިޔާބުކޮށްފައެވެ. އަދި މިސީޒަންގައި އެފްއޭ ކަޕާއި އިނގިރޭސި ޕްރިމިއަރ ލީގުގެ ތަށި ކާމިޔާބުކޮށް އެއް ސީޒަނެއްގައި މިތިން ތަށި ކާމިޔާބުކުރި އިންގްލަންޑުގެ ދެވަނަ ޓީމަށްވެސް ސިޓީވަނީ ވެގެން ގޮސްފައެވެ.
މީގެ ކުރިން ޗެމްޕިއަންސް ލީގުގެ ތަށި ހިމެނޭ ގޮތަށް ތިން ތަށި ކާމިޔާބުކޮށްފައިވަނީ 1999 ވަނަ އަހަރުގެ ސީޒަނުގައި ވާދަވެރި މެންޗެސްޓާ ޔުނައިޓެޑުންނެވެ.
