އެމްއެމްޕީއާރުސީގެ ހިޔާނާތުގެ މައްސަލައިގައި ވިލިމާލެ ދާއިރާގެ ކުރީގެ މެމްބަރު އަހްމަދު ނިހާން ހުސައިން މަނިކުގެ މައްޗަށް ދައުލަތުން އުފުލާފައިވާ ދައުވާތަކާއި ގުޅިގެން ހިންގި ތަހުގީގުގެ ހުރިހާ ލިޔެކިޔުންތަކެއް އޭނައަށް ދޭން އަމުރުކޮށް، އޭގެ ފަހުން ޝަރީއަތް ފަށަން ނިންމައިފިއެވެ.
އެމްއެމްޕީއާރުސީގެ ހިޔާނާތުގެ މައްސަލައިގައި ނިހާންގެ މައްޗަށް ރިޝްވަތު ހިފުމުގެ 3 ދައުވާއަކާއި ރިޝްވަތަށް އެދުމުގެ 2 ދައުވާއަކާއި، މަނީ ލޯންޑަރިންގެ ދައުވާއެއް އުފުލާފައިވާއިރު، އެ ދައުވާތަކުގެ ޝަރީއަތް ވަނީ ކްރިމިނަލް ކޯޓުގައި މީގެ 2 އަހަރުން ކުރިން ކްރިމިނަލް ކޯޓުގައި ފަށާފައެވެ.
ދެ އަހަރުވީ މި މައްސަލަ މާބޮޑަށް ކުރިއަށްދާ ގޮތްވެފައިނުވާއިރު، މިއަދުވެސް ވަނީ މި ދައުވާތަކާއި ގުޅިގެން އަޑުއެހުމެއް ބާއްވާފައެވެ. ނިހާނަށް ކުރާ ދައުވާއާއި ގުޅިގެން މިއަދު ބޭއްވި އަޑުއެހުމަކީ މި މައްސަލައިގައި ދެފަރާތުން އިފްތިތާޙީ ބަޔާން ހުށައެޅުމަށް ބޭއްވި އަޑުއެހުމެކެވެ. އެހެންނަމަވެސް މި އަޑުއެހުމުގައި ނިހާންގެ ވަކީލު ވަނީ އޭގެ ކުރިން ބައެއް ކަންކަން ފާހަޖަކޮށްލެއްވުމުގެ ފުރުސަތަކަށް އެދިލައްވާފައެވެ.
ތަހުގީގު ފައިލުތައް ދިނުމަށް ސުޕްރީމް ކޯޓުން އެންގީ އެމްއެމްޕީއާރުސީގެ ބޮޑު ހިޔާނާތުގެ މައްސަލައިގައި ކުރީގެ ރައީސް ޔާމީންގެ އުފުލާފައިވާ ދައުވާއަކާ ގުޅިގެންނެވެ. ސުޕްރީމް ކޯޓުން އެ ގޮތަށް އުސުލު ކަނޑައެޅިއިރު އޭރު އެ މައްސަލާގައި ޝަރީއަތް ފަށައި އިފްތިތާހީ ބަޔާން ވެސް އޮތީ އިއްވައިފައެވެ.
ނިހާންގެ ވަކީލު ހުސްނީ އެދިވަޑައިގަތީ މި މައްސަލާގައި އަދި އިފްތިތާހީ ބަޔާން އިއްވާފައި ނެތުމުން، ތަހުގީގު ފައިލުތައް ދިފާއަށް ބަލަން ފުރުސަތު ދީފައި ޝަރީއަތް ފެށުމަށެވެ. ނަމަވެސް ދައުލަތުގެ ވަކީލު އީނާ މޫސާ ވިދާޅުވީ ފައިލުތައް ދޭން ޖެހުމަކީ އިފްތިތާހީ ބަޔާން މިއަދު އިއްވަން އޮތް ހުރަހެއް ނޫން ކަމަށެވެ.
ދެ ފަރާތުން ދެއްކި ވާހަކަތައް އަޑުއެހުމަށް ފަހު މައްސަލަ ބައްލަވާ ގާޒީ އަލީ އާދަމް ނިންމެވީ ތަހުގީގު ފައިލްތައް ބަލަން ފުރުސަތު ދީފައި އެހެން އަޑުއެހުމެއްގައި އިފްތިތާހީ ބަޔާން އިއްވަން އަލުން ފުރުސަތު ދެއްވުމަށެވެ.
އެކަމާ ގުޅޭގޮތުން ދެފަރާތުން ފާހަގަ ކުރެއްވި ކަންކަމަށް ރިއާޔަތް ކުރައްވައި މައްސަލަ ބައްލަވާ ގާޒީ އަލީ އާދަމް ނިންމެވީ، ދިފާއުން އެދިފައިވާ ގޮތަށް ތަހުގީގު ލޮގްތައް ދޫކުރުމަށް ހުރަހެއް ނެތް ކަމަށެވެ. އެހެންނަމަވެސް، ހެއްކާބެހޭ ޤާނޫނު ރަޖުއީކޮށް ތަތުބީޤު ކުރުމެއް ނެތްކަމަށް ގާޒީ ވިދާޅުވިއެވެ. ވުމާއެކު، ހެއްކާބެހޭ ޤާނޫނާ ޙަވާލާދީ އަލުން ހުށައެޅުންތައް ހުށައެޅުމުގެ ފުރުސަތު ނުދެއްވުމަށް ގާޒީ ނިންމެވިއެވެ.
ތަހުގީގު ފައިލްތައް ދައުލަތުން ހޯދުމަށް ފަހު ކޯޓުގައި ވަކި އަޑުއެހުމެއް ބާއްވަން ނިންމި އެވެ. އަޑުއެހުން ބޭއްވޭނެ ދުވަހެއް އިދާރީ މޭޒުން ފަހުން އަންގާނެ ކަމަށް ގާޒީ ވިދާޅުވިއެވެ.
ދައުލަތުގެ ވަކީލު އީނާ މޫސާ އެދިވަޑައިގަތީ ރަސްމީ މަސައްކަތު ދުވަހެއްގެ ބަދަލުގައި އެ އަޑުއެހުން ހޮނިހިރު ދުވަހު ބާއްވާ ދިނުމަށެވެ. ދިފާއީ ވަކީލު ހުސްނީ ވެސް އެދިވަޑައިގަތީ އެ ގޮތަށް ކުރިއަށް ގެންދިއުމަށެވެ.
ރައީސް ޔާމީންގެ ވެރިކަމުގައި ވެރިކަންކުރި ޕީޕީއެމްގެ ޕާލިމެންޓްރީ ގްރޫޕްގެ ލީޑަރުގެ މަޤާމު އަދާކުރެއްވި ނިހާނަށް ދައުވާ ކުރަނީ ރައްޔިތުންގެ މަޖިލީހުގެ މާލިއްޔަތު ކޮމިޓީގެ މުގައްރިރަކަށް ހުންނެވި ދުވަސްވަރު ކުރީގެ ނައިބް ރައީސް އަހްމަދު އަދީބުގެ ފަރާތްޕުޅުން ރިޝްވަތަށް އެދިވަޑައިގަތުމާއި ރިޝްވަތު ހިއްޕެވުމާއި އެގޮތަށް ހޯއްދެވި ފައިސާ ލޯންޑާރ ކުރެއްވުމުގެ ކުށުގައެވެ. ރިޝްވަތުގެ ގޮތުގައި ނިހާނަށް ލިބުނު ތަކެތީގެ ތެރޭގައި ރޮލެކްސް ބްރޭންޑްގެ ގަޑިއަކާއި އެއް ލައްކަ ފަންސާސް ހާސް ޑޮލަރު ހިމެނެއެެވެ. އަދި އެ ފައިސާ ލޯންޑަރކޮށްގެން ޕްލެޓިނަމް ރެސިޑެންޓް ފްލެޓެއް ގަނެފައިވާކަމަށްވެސް ދައުލަތުން ތުހުމަތުކުރެއެވެ. އަދި ދައުލަތުން ވަނީ ނިހާންގެ މިލްކިއްޔާތުގައި ޕްލެޓިނަމް ރެސިޑެންޓް ފްލެޓާއި، ރޮލެކްސް ބްރޭންޑްގެ ގަޑި ދައުލަތަށް ނެގުމަށްވެސް އެދިފައެވެ.
