ދިވެހި ދައުލަތަށް ގިނަދުވަހު ޚިދުމަތް ކުރެއްވި ބޭފުޅެއް ކަމަށްވާ ސ.ހިތަދޫ ބީޗްވިލާ މުހައްމަދު އިބްރާހީމްދީދީ (ތުއްބީގެ މުހައްމައިދީ) އަކީ ދިވެހި ދައުލަތުގެ ބޮޑު ރަމްޒެއް ކަމުގައިި އެމްޑީޕީގެ ރައީސް މުހައްމަދު ނަޝީދު ވިދާޅުވެއްޖެއެވެ.

މުހައްމަދު އިބްރާހީމްދީދީ (ތުއްބީގެ މުހައްމައިދީ) އަވަހާރަވީ އުމުރުން 86 އަހަރުގައި ރޭ ދަންވަރުގެ ވަގުތެއްގައެވެ. އެމަނިކުފާނު ވަނީ 43 އަހަރަށްވުރެ ގިނަދުވަހު، ދައުލަތަށް ޚިދުމަތް ކުރައްވާފައެވެ.

އިބްރާހިމް ދީދީ އަވަހާރަ ވުމާއި ގުޅިގެން ރައީސް ނަޝީދު ވިދާޅުވީ ތުއްބީގެ މުހައްމާދީ އަކީ ގިނަ ދުވަސްތަކަކު ދައުލަތަށް ޚިދުމަތް ކުރައްވާފަިއވާ މި ދައުލަތުގެ ބޮޑު ރަމްޒެއް ކަމަށެވެ. ރައީސް ނަޝީދު ވަނީ މާތް ރަސްކަލާންގެ މަރުހޫމަށް ސުވަރުގެ މިންވަރު ކުރައްވުމަށް އެދި ދުޢާ ކުރައްވާފައެވެ.

Thubbeege Muhammadi akee gina dhuvasthakaku dhaulathah khidhumaiy kuravvaafaiva mi Dhivehi dhaulathuge bodu ramzeh. Maaiy Allah marhoom ah suvaruge minvarukuravvashi. Aameen.

— Mohamed Nasheed (@MohamedNasheed) June 9, 2023

ރައީސް ނަޝީދުގެ އިތުރުން ރައީސް ޞާލިހުވެސް ވަނީ މުޙައްމަދު އިބްރާހީމް ދީދީ (ތުއްބީ ގެ މުޙައްމައިދީ) އަކީ ޤައުމަށާއި އަދި ހާއްސަކޮށް އައްޑޫއަށް އަގުހުރި ޚިދުމަތްތަކެއް ކޮށްދެއްވި ބޭފުޅެއް ކަމަށް ވިދާޅުވެފައެވެ. މާތް ރަސްކަލާންގެ މަރުހޫމުގެ ފުރާނައަށް ސުވަރުގޭގެ ނިޢުމަތް މިންވަރު ކުރައްވައި، މަރުހޫމުގެ ޢާއިލާއަށް އިޚްލާޞްތެރި ތަޢުޒިޔާ ރައީސް ވަނީ ދަންނަވާފައެވެ.

މުޙައްމަދު އިބްރާހީމް ދީދީ (ތުއްބީ ގެ މުޙައްމައިދީ) އަކީ ޤައުމަށާއި އަދި ހާއްސަކޮށް އައްޑޫއަށް އަގުހުރި ޚިދުމަތްތަކެއް ކޮށްދެއްވި ބޭފުޅެއް. މާތް لله މަރުހޫމުގެ ފުރާނައަށް ސުވަރުގޭގެ ނިޢުމަތް މިންވަރު ކުރައްވާށި. މަރުހޫމުގެ ޢާއިލާއަށް އަޅުގަނޑުގެ އިޚްލާޞްތެރި ތަޢުޒިޔާ ދަންނަވަން.

— Ibrahim Mohamed Solih (@ibusolih) June 9, 2023

މުހައްމަދު އިބްރާހިމް ދީދީ އަކީ ޖެންޑަރ މިނިސްޓަރު އައިޝަތު މުހައްމަދު ދީދީ އާއި ސިފައިންގެ ކުރީގެ ބްރިގޭޑިއާ ޖެނެރަލް އަދި ރައްޔިތުންގެ މަޖިލީހުގެ ހިތަދޫ މެދު ދާއިރާގެ ކުރީގެ މެންބަރު އިބްރާހީމް މުހައްމަދު ދީދީގެ ބައްޕާފުޅެވެ.

މުހައްމަދު އިބްރާހީމްދީދީވަނީ އައްޑު އަތޮޅު ހިތަދޫ ކަތީބުކަމާއި، ހިތަދޫ ބޮޑުކަތީބުކަމާއި، އަތޮޅުވެރިޔާގެ އެހީތެރިކަމާއި، އައްޑުއަތޮޅު އަތޮޅުވެރިކަން ކުރައްވާފައެވެ. އޭގެ ފަހުން، ރާއްޖެތެރޭގެ ޚާއްޞަ އެހީތެރިޔާކަމާއި، ރާއްޖެތެރޭގެ ވަކީލުކަމުގެ މަގާމުވެސްވަނީ އަދާކުރައްވާފައެވެ.

މުޙައްމަދު އިބްރާހީމްދީދީއަކީ، އައްޑުއަތޮޅުގެ ތަރައްޤީއަށް، ޚާއްޞަކޮށް ހިތަދޫގެ ތަރައްޤީއަށް ގިނަގުނަ ޚިދުމަތްތަކެއް ކޮށްދެއްވި ބޭފުޅެކެވެ. އެގޮތުން އައްޑުއަތޮޅު ހިތަދޫ ކުޑަކަތީބުގެ މަގާމުގައި ހުންނަވައިގެން ހިތަދުއަށް އެކި ރޮނގުރޮނގުން ތަރައްޤީއާއި ތަހުޒީބު ގެނެސްދެއްވުމުގައި އިސްދައުރެއްވަނީ އަދާކުރައްވާފައެވެ. މީގެ ތެރެއިންވެސް ހިތަދޫ ގައުކެޑިއާއި ހަންކެޑެ ގުޅައިލުމަށް އެޅުއްވި ފާލަމުގެ މަސައްކަތަކީ ފާހަގަކޮށްލެވޭ މަސައްކަތެކެވެ.

މުޙައްމަދު އިބްރާހީމްދީދީ، ސަރުކާރަށް ޚިދުމަތް ކުރެއްވި މުއްދަތުގެ ތެރޭގައިވަނީ އައްޑުއަތޮޅުގައި ސަރުކާރުން އޭރު ހިންގެވި ޢުމްރާނީ، އިޤްތިޞާދީ، ތަޢުލީމީ މަޝްރޫޢުތަކުގެ ކަންތައްތައް ބެލެހެއްޓެވުމުގައި އިސްދައުރެއް އަދާކުރައްވާފައެވެ. އެގޮތުން ހިތަދޫ ބޮޑުކަތީބުކަމުގައި ހުންނެވިއިރު، ހިތަދޫގައި ޤާއިމު ކުރެވުނު ސ.އަތޮޅު ތަޢުލީމީ މަރުކަޒު ބިނާކުރެވިގެން ދިޔައީ، މުޙައްމަދު އިބްރާހީމްދީދީގެ މަސައްކަތްޕުޅުންކަން ފާހަގަކޮށްލެވެއެވެ.

މުޙައްމަދު އިބްރާހީމްދީދީ، ދައުލަތަށް ކުރެއްވި ޚިދުމަތުގެ އަގު ވަޒަންކުރައްވައި 2021ވަނަ އަހަރު ސަރުކާރުންވަނީ ދިވެހި ދައުލަތަށް ޚިދުމަތް ކުރުމުގެ އިނާމް އަރުއްވާފައެވެ.

މުޙައްމަދު އިބްރާހީމްދީދީގެ ޖަނާޒާ ހުކުރު ނަމާދަށްފަހު ސ.ހިތަދޫ މަސްޖިދުލް އިކްރާމް(ފަޒާ މިސްކިތުގައި) ވަނީ ބާއްވާފައެވެ.