މޯލްޑިވްސް ސްޓޭޓް ޝިޕިން (އެމްއެސްއެސް) ބޯޓުތަށް ކުރިޔަށް އޮތް ތަނުގައި އައްޑޫ ސިޓީގެ ބަނދަރަށް ސީދާ ދަތުރު ކުރާނެކަމުގައި ރައީސް ސާލިހު ވިދާޅުވެއްޖެއެވެ.
އައްޑޫ ސިޓީގެ ބިން ހިއްކުމުގެ ބިޔަ މަޝްރޫޢު ފައްޓަވާ ދެއްވުމަށް މިއަދު އައްޑޫ ސިޓީގައި ބޭއްވުނު ރަސްމިއްޔާތުގައި ވާހަކަ ދައްކަވަމުން ރައީސް ސާލިހު ވިދާޅުވީ ރައްޤީގެ ތުނޑުތައް، އެއްކަމާ ގުޅޭ އަނެއް ކަންތަކާ އެކުވެ ލާމެހެންޖެހޭ ކަމަށާއި، އެއްސޯބު އަނެއްސޯބާ ހިމުންވެގެން ހިނގާންޖެހޭ އެތައް ކަމަކުން މެނުވީ ތަރައްޤީއެއް ނުވެވޭނެ ކަމުގައެވެ.
މިގޮތުން ކޯވިޑުގައި ދުނިޔެ ހުއްޓުނު ވަގުތު، އަލަށް އުފެއްދި ސަރުކާރުގެ އާގުބޯޓު ކުންފުނި "ދުއްވައިގަތް"ކަން ފާހަގަ ކުރައްވަމުން ރައީސް ސާލިހު ވިދާޅުވީ އެއީ ސުމަކުން ފެށި މަސައްކަތަކަށްވި ނަމަވެސް، މިއަދު އެ ކުންފުނީގައި އަމިއްލަ ތިން އާގުބޯޓު އެބައޮތް ކަމުގައެވެ.
އިތުރު ބޯޓެއް، އަންނަ ޖުލައި މަހު އެ ކުންފުންޏަށް އިތުރުވާނެ. މިއީ ސީދާ އައްޑޫ ސިޓީގެ ސަރަޙައްދީ ބަނދަރަށް ދަތުރުކުރާނެ ބޯޓެއް. މި ބަނދަރުތަކުގެ ސޭލާތައް ހިންގުމަށް ބާރުދެނީ، މި ދެންނެވި އާގުބޯޓުފަހަރުގެ ސޯބު، އައްޑޫ ސިޓީ ޕޯޓުގެ ސޯބާ އެކުވެ ހިމުންވުމުން.
ކުރިޔަށް އޮތް ޖުލައިމަހު ސްޓޭޓް ޝިޕިން ކުންފުނިން ގެނައުމަށް ހަމަޖެހިފައިވާ އާގު ބޯޓު ރާއްޖެ ގެނައުމުން، އެބޯޓުގެ ދަތުރުތައް އައްޑޫސިޓީގެ ބަނދަރަށް ފަށާނެކަމަށް ހާމަކުރައްވަމުން ރައީސް ސާލިހު ވިދާޅުވިއެވެ.
ސަރުކާރުން އަލަށް އުފައްދާފައިވާ، ސްޓޭޓް ޓްރޭޑިންގ އޯގަނައިޒޭޝަން (އެސްޓީއޯ) ގެ ސަބްސިޑަރީ ކުންފުނި، މޯލްޑިވްސް ސްޓޭޓް ޝިޕިންގ (އެމްއެސްއެސް) އިން ގަތް ފުރަތަމަ ކޮންޓެއިނަރ ބޯޓެއް ރާއްޖެ އައިސްފައިވަނީ 2021 ވަނަ އަހަރުގެ އޮކްޓޯބަރު މަހުގެ 30 ވަނަ ދުވަހުއެވެ.
މިއީ ރާއްޖޭގައި ބޯޓް ދަތުރުކުރުމުގެ ދާއިރާ ވަޅުޖެހިފައި ވަނިކޮށް އެސްޓީއޯއިން އިސްވެ 2020 ވަނަ އަހަރު އުފެއްދި ޝިޕިންގ ކުންފުނިން ގަނެގެން ގެނައި ފުރަތަމަ ބޯޓެވެ. އެކުންފުނިން ޗާޓަރ ކޮށްގެން ގެނައި ފުރަތަމަ ބޯޓް ރާއްޖެ ގެނެސްފައިވަނީ 2020 ވަނަ އަހަރުގެ އޭޕްރީލް މަހުގެ ފަސްވަނަ ދުވަހުއެވެ.
ކޮމެންޓު ފޮނުވާ