މި ސީޒަން ނިމުމުން ފްރެންޗު ލީގުގެ ޗެމްޕިއަން ޕެރިސް ސެއިންޓް ޖަރމެއިނަށް ކުޅޭ އާޖެންޓީނާގެ ކެޕްޓަން އަދި ދުނިޔެ ދުށް އެންމެ މޮޅު ކުޅުންތެރިންގެ ތެރޭގައި ގޮތުގައި ގިނަ ބަޔަކު ޤަބޫލުކުރާ ލިއޮނެލް މެސީ އެޓީމްގައި މަޑު ނުކުރާނެކަން ޕީއެސްޖީގެ ކޯޗް ކްރިސްޓޮފަރ ގާލްޓިއަރ ޔަގީން ކޮށްދީފިއެވެ.
ގާލްޓިއަރ ބުނިގޮތުގައި ޕީއެސްޖީ މާދަމާ ރޭ ލީގުގައި ކުޅޭ ފަހު މެޗަކީ އެޓީމަށް މެސީ ކުޅޭ ފަހު މެޗަށް ވެގެންދާނެކަމަށެވެ. 2021 ވަނަ އަހަރު އެފްސީ ބާސެލޯނާއިން ޕީއެސްޖީއަށް ބަދަލުވި މެސީ ވަނީ ދެ ސީޒަންގައި ޕީއެސްޖީއަށް ލީގު ކާމިޔާބު ކޮށްދިނުމުގައި އެހީތެރިވެފައެވެ.
ގާލްޓިއަރ ބުނިގޮތުގައި ދުނިޔޭގައި އުފެދުނު އެންމެ މޮޅު ކުޅުންތެރިޔާއަށް ކޯޗް ކޮށްދިނުމުގެ ޝަރަފް އޭނާއަށް ލިބިގެން ގޮސްފައިވާކަމަށެވެ. އަދި ޕާކް ޑި ޕްރިންސްގައި މާދަމާ ރޭ ކުޅޭ މެޗަކީ އޭނާގެ ފަހު މެޗް ކަމުން އޭނާއަށް ސަޕޯޓަރުންގެ ފަރާތުން ހޫނު މަރުހަބާއެއް ކިޔާނެކަމަށް އުންމީދު ކުރާ ކަމަށެވެ. ފަހަކަށް އައިސް ޕީއެސްޖީއަށް ހޯދިފައިވާ ބައެއް ދަށް ނަތީޖާތަކުގެ ސަބަބުން އެޓީމްގެ ބައެއް ކުޅުންތެރިންނަށް ސަޕޯޓަރުންގެ އުނދަގޫ އަންނަނީ ކުރިމަތިވަމުންނެވެ. މިގޮތުން އެކަމަށް ކުރިމަތިލާން ޖެހިފައިވާ ކުޅުންތެރިންގެ ތެރޭގައި މެސީވެސް ހިމެނެއެވެ. ޕީއެސްޖީން ލޯރިއެން ބައްދަލުކޮށް ބަލިވި މެޗަށް ފަހާއި، މެސީ ހުއްދަ ނެތި ސައުދީ އަރަބިއާއަށް ކުރި ދަތުރަށް ފަހު މެސީ، ނޭމާ، މާކޯ ވެރާޓީ އަދި ކޯޗް ގާލްޓިއަރގެ ގޭ ކައިރީ ސަލާމަތީ ކަންތައްތައް ވަރުގަދަ ކޮށްފައިވެއެވެ.
މެސީ ވަނީ ޕީއެސްޖީގައި ހޭދަކުރި ދެ ސީޒަންގައި މިހާތަނަށް 74 މެޗް ކުޅެދީ 32 ލަނޑު އެޓީމަށް ކާމިޔާބުކޮށްދީފައެވެ. މިގެތެރޭގައި މިސީޒަންގައި ކާމިޔާބުކޮށްދިން 21 ލަނޑާއި 20 އެސިސްޓް ހިމެނެއެވެ. މެސީގެ ކަންތައްތައް ދިރާސާ ކުރަމުންދާ ބައެއް ފަރާތްތަކުން ހާމަކުރާގޮތުގައި މެސީ އޭނާގެ މުސްތަގްބަލާއި މެދު ވަރަށް އަވަހަށް ގޮތެއް ނިންމާނެއެވެ. އަދި އޭނާގެ ކުރީގެ ކްލަބް ބާރސާއިން މެސީ ގެންދިއުމަށް މަސައްކަތް ކުރަމުންދިޔަ ނަމަވެސް އެއީ ބާސާއަށް ނުވާނެކަމަށްވެސް އެފަރާތްތަކުން ބުނަމުންދެއެވެ.
