މީހުންގެ އަބުރަށް އަރައިގަނެ، ހިތުހުރި އެއްޗެއް ގޮވައި ދޮގު މަޢުލޫމާތު ފެތުރުމަކީ ޑިމޮކްރަސީ ދަންނަ ކަމެއް ނޫންކަމުގައި ރައްޔިތުންގެ މަޖިލީހުގެ މެޖޯރިޓީ ލީޑަރު މުޙައްމަދު އަސްލަމް ވިދާޅުވެއްޖެއެވެ.
ބްރޯޑްކާސްޓިން ކޮމިޝަން މެދުވެރިކޮށް ޗެނަލް 13 އަށް ބިރު ދައްކާ އިންޒާރުދި ހަދާ ކަމަށް ބުނެ ރައްޔިތުންގެ މަޖިލީހަށް ހުށަހެޅި މައްސަލަ މަޖިލީހުން ބޭރުކޮށްލުމާއި ގުޅިގެން މަޖިލީހުގައި ހިމެނޭ އިދިކޮޅު ފަރާތްތަކުގެ ބޮޑެތި ފާޑުކިޔުންވަނީ ސަރުކާރަށް އަމާޒުވެފައެވެ.
ނައިފަރު ދާއިރާގެ މެމްބަރު އަހުމަދު ޝިޔާމް ހުށަހެޅުއްވި މައްސަލަ ބަލައިގަންނަން ވޯޓު ދެއްވީ 20 މެމްބަރުން ނެވެ. ނުފެންނަ ކަމަށް 26 މެމްބަރުން ވޯޓު ދެއްވި އެވެ. އެހެންކަމުން އެ މައްސަލަ ބަލައިގަނެ ބަހުސްކުރާކަަށް ފާހެއް ނުވިއެވެ. ޗެނަލް 13އާ ގުޅޭ ކުއްލި މައްސަލައެއް ޝިޔާމް ހުށަހެޅުއްވީ ރައީސް އިބްރާހިމް މުހައްމަދު ސޯލިހަށް "ޗޯރަށް" ގޮވި ކަމަށް ބުނެ އެޗެނަލްގެ މައްސަލަ ބްރޯޑްކާސްޓިން ކޮމިޝަން (ބްރޯޑްކޮމް) އިން ބަލަން ފެށުމުންނެވެ.
މަޖިލީހުގެ ޖަލްސާގައި އިދިކޮޅު މެމްބަރުން ދެއްކެވި ވާހަތަކާއި، އަދި މިކަމާ ގުޅޭގޮތުން ދެކެވުނު ވާހަކަތަކަށް ރައްދު ދެއްވައި މަޖިލީހުގެ މެޖޯރިޓީ ލީޑަރު އަސްލަމް ވިދާޅުވީ ޑިމޮކްރަސީއަކީ އެއްވެސް ޙާލެއްގައި މީހަކު ހިތުހުރި އެއްޗެއް ކިޔައި، ދޮގު މައުލޫމާތު ފެތުރުން ނޫންކަމަށެވެ. އެމްޑީޕީއަކީ ޑިމޮކްރަސީއަށް ތަބާވާ، ޑިމޮކްރަސީގެ ހަމަތަކުން މަސައްކަތްކުރާ ޕާޓީއެއް ކަމަށާއި، މީހުންގެ އަބުރު ނަގާލައި ދޮގު މައުލޫމާތު ފެތުރުމަކީ ޑިމޮކްރަސީ ދަންނަ އެއްޗެއް ނޫންކަމަށް އަސްލަމް ވިދާޅުވިއެވެ.
ޑިމޮކްރަސީ ދަންނަ އެއްޗެއްނޫން ދޮގު މައުލޫމާތު ފެތުރުމަކީ، ޑިމޮކްރަސީ ދަންނަ އެއްޗެއް ނޫން، މިސް އިންފޮމޭޝަނާއި، ޑިސް އިންފޮމޭޝަން ފިތުނަ ފަސާދަ އުފެއްދުމަކީ. ޑިމޮކްރަސީ ދަންނަ އެއްޗެއްނޫން މީހުންގެ އަބުރު ކަތިލުމަކީ. އެހެންކަމުން ޑިމޮކްރަޓިކް ވެއްޓެއްގައި އެމްޑީޕީ އަބަދުވެސް މަސައްކަތް ކުރާނީ ޑިމޮކްރަސީގެ ހަމަތަކުގައި.
– އަސްލަމް ވިދާޅުވިއެވެ.
މަޖިލީހުގެ ތަޅުމުން ކުއްލި މައްސަލަ ބަލައިނުގަތުމަށް ނިންމެވި ނިންމުމާ ގުޅޭގޮތުން އަސްލަމް ވިދާޅުވީ އެ މައްސަލައަކީ މަޖިލީހަށް އެޖެންޑާ ކުރެވެންޖެހޭ މައްސަލައެއް ކަމަށްވެސް ދެކެވަޑައިނުގަންނަވާ ކަމަށެވެ. އޭނާ ވިދާޅުވީ މި ސަރުކާރަކީ ނޫސްވެރިކަމުގެ މިިނިވަންކަމަށް ހުރަސްއަޅައި، ނޫސްވެރިންނަށް ދެރަ ގޮތެއް ހަދާނެ ސަރުކާރެއް ނޫންކަން މިހާރު ވެސް ހާމަވާނެކަމަށެވެ.
ނޫސްވެރިކަމުގެ މިނިވަންކަން ގެއްލިދާފަދަ އެއްވެސް ކަމަކީ އަޅުގަނޑުމެން ތަރުހީބު ދޭނެ ކަމެއްނޫން. ހިތުހުރިހާ އެއްޗެއް ގޮވަންވީއެއްނޫން. ކޮންމެ މީހެއްގެވެސް އަބުރަކާއި އިއްޒަތެއް އޮންނާނެ. އަދި އެއީ ސިޔާސީ އުކުޅެއްކަމުގައި އަޅުގަނޑު ނުދެކެން.
– އަސްލަމް ވިދާޅުވިއެވެ.
ޝިޔާމް މިއަދު ހުށަހެޅުއްވި މައްސަލައިގައި ވިދާޅުވީ ގާނޫނު އަސާސީގެ 27 ވަނަ މާއްދާއިން ,މިނިވަންކަމާއެކު ފިކުރުކުރުމާއ،ި އިސްލާމްދީނުގެ އަސްލަކާއި ހިލާފުނުވާ ގޮތެއްގެމަތީން އެމީހެއްގެ ބުއްދިއަށް ފެންނަ ގޮތްތަކާއ،ި ހިޔާލުތައް ދުލާއި ގަލަމުން އަދި މިނޫންވެސް ގޮތްގޮތަށް ފާޅުކުރުމުގެ މިނިވަންކަން އިސްތިސްނާއެއް ނެތި ހުރިހާ ދިވެހިރައްޔިތުންނަށް އޮތީ ދީފައި ކަމަށެވެ.
ހަމަ އެހެންމެ ގާނޫނު އަސާސީގެ 28 ވަނަ މާއްދާއިން ނޫސްވެރިކަންކުރުމާއި މުއާސަލާތީ ވަސީލަތްތައް ބޭނުންކުރުމާއ،ި ހަބަރާއި މައުލޫމާތާއި ފެންނަ ގޮތްތަކާއ،ި ހިޔާލުތައް ފާޅުކުރުމާއ،ި ޝާއިއުކުރުމާއި ފެތުރުމުގެ މިނިވަންކަން ފުރިހަމައަށް ދިވެހިންނަށް އޮތީ ގާނޫނު އަސާސީން ފޯރުކޮށްދީފައި ކަމަށެވެ.
އެެހެންކަމުން ސަރުކާރުން ޕުރެޝަރުކޮށްގެން ބްރޯޑްކާސްޓިން ކޮމިޝަން މެދުވެރިކޮށް ގާނޫނު އަސާސީއާއ،ި އަސާސީ ހައްގުތަކާއި ޑިމޮކްރެޓިކް އަގުކުރުންތަކާއ،ި ވެރިކަން ހިންގުމުގެ ރަނގަޅު އުސޫލުތައްކަމަށް ބައިނަލްއަގުވާމީ މުޖުތަމައުން ބަލައިގަނެފައިވާ މިންގަނޑުތަކާއ،ި 2018 ވަނަ އަހަރު އުފެދުނު އެމްޑީޕީގެ ސަރުކާރު އެމައްޗަށް ބިނާކުރާނެކަމަށް ބުނި އުސޫލުތަކާއި އަސާސްތަކާއި ހިލާފަށް މިނިވަން މުއައްސަސާއަކަށް ނުފޫޒު ފޯރުވައިގެން ޗެނަލް 13 އަށް ބިރުދެއްކުމާއި އިންޒާރުދިނުމަކީ ދަށު ދަރަޖައިގެ އަމަލެއް ކަމަށް ޝިޔާމް ހުށަހެޅުއްވި މައްސަލައިގައި ވެއެވެ.
