ރާއްޖޭގެ އެކި ކަންކޮޅުތަކުން ފެންނަމުންދާ މަންޒަރުތަކުން ފަށާފައިވާ ދަތުރު، އިތުރު ފަސް އަހަރަކަށް އަނެއްކާވެސް ގެންދެވޭނެކަމުގެ ޔަޤީންކަން ލިބެމުންދާކަމުގައި ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު ވިދާޅުވެއްޖެއެވެ.
ރައީސް މިހެން ވިދާޅުވީ ފީއަލީގައި އަލަށް އިމާރާތް ކުރެވުނު އިންޖީނުގެއާއި، އޮފީސް އިމާރާތް އަދި އައިސް ޕްލާންޓް ހުޅުވުމުގެ ރަސްމިއްޔާތުގައި ވާހަކަފުޅު ދައްކަވަމުންނެވެ. ރައީސް ވިދާޅުވީ ފީއަލީގައި އަލަށް ޤާއިމުކުރެވުނު އިންޖީނުގެއާއި، ފެނަކައިގެ އޮފީހާއި، އަދި އައިސް ޕްލާންޓެއްގެ މަސައްކަތް ނިމި، އެ ޚިދުމަތް ދިނުން ރަސްމީކޮށް ފެށުމުން އޭގެ ފައިދާ ފީއަލީ ރައްޔިތުންނަށް ވަރަށް ބޮޑަށް ކުރާނެކަމަށެވެ.
ރައީސް ވިދާޅުވީ ފީއަލީގެ ކުރިއެރުމަށާއި ތަރައްޤީއަށް ފީއަލީގެ ރައްޔިތުން އަބަދުވެސް އެދިއެދި ތިބޭކަމަށެވެ. ރިޔާސީ އިންތިޚާބުގައިވެސް، މަޖިލިސް އިންތިޚާބުގައިވެސް، ކައުންސިލް އިންތިޚާބުގައިވެސް އެމް.ޑީ.ޕީ.އިން ނުކުމެ މަސައްކަތް ކުރިއިރުގައި، މި ވާހަކަތައް ދެކެވުނުކަމަށާއި، ފީއަލީގައިވެސް ދެން އޮތް އެންމެބޮޑު އެއް ބޭނުމަކީ، ރައްޔިތުން ބޭނުންވާ އެއްކަމަކީ ބިން ހިއްކުން ކަމަށް ރައީސް ވިދާޅުވިއެވެ.
ބިން ހިއްކުމަށްޓަކައި އެމް.ޓީ.ސީ.ސީ. އިން ވާންޖެހޭ ތައްޔާރީތައް މިހާރު އެދަނީ ވަމުން. ބަންޑްވޯލް ޖަހައި ނިމޭތަން ތިޔަބޭފުޅުންނަށް ފެނިވަޑައިގަންނަވާނެ. އަދި މިހާރު ހިއްކަން އެ ނިންމާފައި އޮތް ޕްލޭނަށް ބަދަލުތަކެއް ގެނައުމުގެ ވާހަކަ އަޅުގަނޑަށް އެބަ އަޑުއިވޭ ރައްޔިތުންގެ ފަރާތުން. އިރާދަކުރެއްވިއްޔާ، އެ ގެންނަންޖެހޭ ބަދަލުތައްވެސް އެއީ ޕްލޭންގައި ހިމެނޭނެ ކަމެއްތޯ ބެލުމަށްފަހުގައި، ޕްލޭނިންގ މިނިސްޓްރީއާއި އެމް.ޓީ.ސީ.ސީ.އާ ވާހަކަ ދައްކައިގެން، ރައްޔިތުން ބޭނުންވާގޮތަށް އެކަން ކުރުމަކީ އަޅުގަނޑު އެދޭގޮތް. އިރާދަކުރެއްވިއްޔާ އެ ބަދަލު ގެނެވޭނެ.
– ރައީސް ވިދާޅުވިއެވެ.
ރައީސް ވިދާޅުވީ މިހާރު ރާއްޖޭގެ އެކި ކަންކޮޅުތަކުން ފެންނަމުންދާ މަންޒަރުތަކުން ރިޔާސީ އިތުރު ދައުރެއް ލިބިގެންދާނެކަމުގެ އުންމީދު އާލާވަމުންދާކަމަށެވެ.
އިރާދަކުރެއްވިއްޔާ، އަޅުގަނޑުމެން ފަށާފައި މިވާ ދަތުރު، އިތުރު ފަސް އަހަރަކަށް އަނެއްކާވެސް ގެންދެވޭނެކަމުގެ ޔަޤީންކަން އަޅުގަނޑުމެންނަށް މިހާރު ރާއްޖޭގެ އެކި ރަށްރަށުން ފެންނަމުން އެބަދޭ. އަޅުގަނޑު އެދެނީ މި މަސައްކަތުގައި މި ދާއިރާ ބާކީނުވުން. އަޅުގަނޑުމެންނާ އެކީގައި ކުރިއަށް ގޮސް، މި ފަށާފައި ހުރި މަސައްކަތްތަކާއި، ރައްޔިތުން މި ބޭނުންވާ، ރާއްޖެއަށް މި ގެންނަން ބޭނުންވާ ތަރައްޤީގައި އެއްބައެއްގެ ގޮތުގައި ނުކުމެ މި މަސައްކަތް ނިންމާލުން.
– ރައީސް ޞާލިހު ވިދާޅުވިއެވެ.
ރައީސް ވިދާޅުވީ ފެނަކަ ކޯޕަރޭޝަން މެދުވެރިކޮށް ފީއަލީގައި އައު އިންޖީނުގެއަކާއި އޮފީސް އިމާރާތެއްގެ އިތުރުން މަސްވެރިންނަށް ބޭނުންވާ އައިސްޕްލާންޓެއް ގާއިމް ކުރެވިފައިވާއިރު، މިހާރުވެސް އެ ރަށުގައި ގިނަ މަޝްރޫއުތައް ކުރިއަށްގެންދާކަމަށެވެ. އަދި މިއަހަރުގެ ރިޔާސީ އިންތިހާބަށް އިޝާރާތް ކުރައްވައި، އެފަދަ ހުރިހާ ކަމަކާމެދު ވިސްނުމަށްވެސް ފީއަލީގެ ރައްޔިތުންގެ ފަރާތުން ރައީސް އެދިވަޑައިގެންނެވިއެވެ.
ރިޔާސީ އިންތިޚާބުގެ ކެމްޕޭނުގައި އަދިވެސް ފީއައްޔަށް ވަޑައިގަންނަވާނެކަން ފާހަގަކުރައްވައި ރައީސް ވިދާޅުވީ، އެ ރަށަށް ދެން ވަޑައިގަންނަވާނީ، ރައްޔިތުންނާ މަޝްވަރާކުރައްވައި ރައްޔިތުން ރަށުގައި ކުރިއަށްގެންދަން ބޭނުންވާ މަޝްރޫއުތައް ބެއްލެވުމަށްފަހު މި ސަރުކާރުން ދެވަނަ ދައުރެއްގައި ފީއައްޔަށް ކޮށްދެއްވާނެ ކަންކަމާއެކުގައި ކަމަށެވެ.
