ރައްޔިތުންގެ މަޖިލީހުގެ ނިލަންދޫ ދާއިރާގެ މެމްބަރު އަބްދުލް މުހުސިން ހަމީދާއި ގުޅޭގޮތުން ބައެއް މީޑިއާތަކުން ފަތުރަމުންދާ ޚަބަރުތަކަކީ އެއްވެސް ހަގީގަތެއްނެތް ދޮގު ވާހަތަކެއްކަމަށް އޭނާ ވިދާޅުވެއްޖެއެވެ.
ރައްޔިތުންގެ މަޖިލީހުގެ ދެވަނަ ދައުރެއް ފުރުއްވަމުންދާ މުސިން މަޖިލީހަށް އިންތިޚާބުވީ، މިނިވަން މެމްބަރެއްގެ ގޮތުގައެވެ. މިހާރު ފުރުއްވަމުންދާ 19 ވަނަ މަޖިލީހުގައި ޕީޕީއެމްގެ ޓިކެޓްގައި ވާދަ ކުރެއްވުމަށް މުހުސިން މަސައްކަތް ކުރެއްވި ނަމަވެސް ޕީޕީއެމްގެ ޓިކެޓް ލިބޭގޮތް ވަނީ ނުނެފައެވެ. ޕީޕީއެމްގެ ޓިކެޓް ނުލިބުނު ނަމަވެސް އޭނާ ވަނީ މިނިވަން މެމްބަރެއްގެ ގޮތުގައި ނިކުމެ މަޖިލިސް ގޮޑި ކާމިޔާބު ކުރައްވާފައެވެ.
މެމްބަރު މުހުސިން، ޖޭފޯ މިހާރު ވެރިކަން ކުރާ މައި ޕާޓީ އެމްޑީޕީއާއި ގުޅެން އުޅޭކަމަށް ފެތުރޭ ޚަބަރާއި ގުޅުވައިގެން ބައެއް މީޑިއާތަކުގައި ވަނީ މުހުސިން ސޮއި ކުރައްވަނީ އެސްޖޭގެ ލަގްޒަރީ އެޕާޓްމެންޓަކާއި، 5 މިލިޔަން ރުފިޔާއަށް ކަމަށް ބުނެފައެވެ. މިވާހަތަކާއި ގުޅިގެން މެމްބަރު ޖޭފޯ ވިދާޅުވީ މިއީ ކަނޑައެޅިގެން ފަތުރަމުންދާ ދޮގު ޚަބަރެއްކަމަށެވެ. މިފަދަ ވާހަތަށް މީޑިއާތަކުން ފަތުރާއިރުވެސް ކަމުގެ ހަގީގަތް އޮޅުން ފިލުވައިގެން ޚަބަރު ފެތުރުމަކީ އެންމެ ރަނގަޅު ގޮތްކަމަށް ޖޭފޯ ވިދާޅުވިއެވެ.
އެޕާޓްމަންޓްގެ ވާހަކަތަކާއި، 5 މިލިޔަން ރުފިޔާ އަޅުގަނޑަށް ދިންކަމަށް ބުނެ ދައްކާ ވާހަކަތަކީ ކަނޑައެޅިގެން ބޮޑު ދޮގެއް. މިފަދަ ވާހަތައް ފަތުރާއިރު ކަމުގެ ހަގީގަތް އޮޅުން ފިލުވުމަކީ މުހިންމު ކަމެއް.
– މެމްބަރު ޖޭފޯ ވިދާޅުވިއެވެ.
17 ވަނަ ރައްޔިތުންގެ މަޖިލީހުގައާއި، 19 ވަނަ ރައްޔިތުންގެ މަޖިލީހުގެ މެމްބަރުކަންވެސް ކުރައްވާ މެމްބަރު ޖޭފޯއަކީ ވަރަށް އާދައިގެ ދިރިއުޅުމެއް އުޅޭ މަޖިލިސް މެމްބަރުންގެ ތެރޭގައި ހިމެނޭ މެމްބަރެކެވެ. 17 ވަނަ މަޖިލިސް ނިންމާލުމަށްފަހު ޖޭފޯ ވަނީ ޔޫތު މިނިސްޓްރީގެ ނައިބުކަންވެސް ކުރައްވާފައެވެ.
މެމްބަރު ޖޭފޯ ވަނީ ދާއިރާގައި ރައްޔިތުންގެ ކަންބޮޑުވުން ގިނަ މައްސަލަތަކެއް މަޖިލީހުގެ ސަމާލުކަމަށް ގެނެސްފައެވެ. އަދި މަޖިލީހުގައި ވަޒީރުންނާއި ސުވާލު ކުރުމަށް ހުޅުވާލެވޭ ފުރުސަތު ތަކުގައާއި، މުހިންމު ބިލްތަކަށް މެމްބަރު ޖޭފޯ ދަނީ ބަހުސް ކުރައްވަމުންނެވެ. ޖޭފޯއަކީ މަޖިލީހަށް ބަރާބަރަށް ހާޒިރުވާ މަދު މެމްބަރުންގެ ތެރޭގައިވެސް ހިމެނޭ މެމްބަރެކެވެ.
