ކުރީގެ ރައީސްކަން ކުރެއްވި ބޭފުޅުން އުފައްދަވާ ކުޑަ ޕާޓީތަކުން އެކަކު ނިޔާވިޔަސް ޕާޓީ އުވިދާނެ ކަމަށް އައްޑޫސިޓީ މޭޔަރ އަލީ ނިޒާރު ވިދާޅުވެއްޖެއެވެ.
ނިޒާރު މިހެން ވިދާޅުވެ ޓްވީޓް ކުރައްވާފައިވަނީ ރައީސް ނަޝީދު އިސްވެ ހުންނަވައި "ދަ ޑިމޮކްރެޓްސް" ގެ ނަމުގައި ޕާޓީއެއް ރަޖިސްޓްރީ ކުރުމަށް އިލެކްޝަން ކޮމިޝަނަށް ހުށަހަޅުއްވުމާއި ގުލުވައި ކަމަށް ބެލެވެއެވެ. ނިޒާރުގެ ޓްވީޓްގައި ރާއްޖޭގައި ކުދި ޕާޓީތައް ހުރުމަކީ މައްސަލައެއް ނޫންކަމަށް ވިދާޅުވެފައިވެއެވެ.
ކުދި ޕާޓީތައް ހުރުން މައްސަލައެއް ނޫން. އެމެރިކާގައި ވެސް 420 ސިޔާސީ ޕާޓީ އޮވޭ. ރާއްޖޭގައި ވެސް ކަން އޮތީ މިހެން. ރައީސްކަން ކުރެއްވި ބޭފުޅުންގެ ކުޑަ ޕާޓީތައް 3000 ގައި ހިފަހައްޓަނީ ޕާޓީ އުފައްދަން ސޮއިކުރި އެންމެން ދުނިޔޭގައި ތިބީތީ. އެކަކު ނިޔާވިއަސް ޕާޓީ އުވިދާނެ.
– ނިޒާރުގެ ޓްވީޓްގައި ވިދާޅުވެފައިވެއެވެ.
ނިޒާރު މިމޭރުމުން ވާހަކަ ދައްކާފައިވާއިރު، ނިޒާރު އަކީ ރައީސް ސޯލިޙުގެ ސިޔާސަތުތަކަށް ފާޅުކަން ބޮޑުކޮށް ތަޢީދު ކުރައްވާ ބޭފުޅެއް ކަން މީގެ ކުރިން ހާމަކޮށްފައެވެ. އެގޮތުން އެމްޑީޕީގެ އެތެރޭގެ ރިޔާސީ ޕްރައިމަރީގައިވެސް ނިޒާރު ކެމްޕެއިން ކުރެއްވީ ރައީސް ސާލިޙް އަށެވެ.
ނަޝީދު އިސްކޮށް ހުންނަވައި ޕާޓީ ހައްދަވަން މިއަދު އިލެކްޝަންސް އަށް ހުށަހެޅުމަށް ފަހު އެ ޕާޓީގެ ތަރުޖަމާނު އަފްޝަން ވަނީ އެ ޕާޓީން ރިޔާސީ ކެންޑިޑޭޓެއް ނެރޭނެ ކަން ޔަޤީންކޮށްދެއްވާފައެވެ.
