މިއަދު ކުރަންޖެހޭ އެންމެ ބޮޑު އެއް އިންވެސްޓްމަންޓަކީ، ކުޑަކުދިންގެ ހަައްޤުތައް ފުރިހަމައަށް ޙިމާޔަތްކޮށް އެކުދިންނަށް އިސްލާމީ ރިވެތި އަޚްލާޤުގެ ފުރިހަމަ ތަރުބިއްޔަތުދީ އެއީ މުޖުތަމަޢަށް ބޭނުންތެރި ބަޔަކަށް ހެދުން ކަމުގައިި ޖުމްހޫރީ ޕާޓީގެ ލީޑަރު އަދި އެޕާޓީގެ ރިޔާސީ ކެނޑިޑޭޓް ޤާސިމް އިބްރާހިމް ވިދާޅުވެއްޖެއެވެ.
ކުޑަކުދިންގެ ދުވަހުގެ މުނާސަބަތުގައި ޤާސިމް ކުރެއްވި ޓުވީޓެއްގައި ވިދާޅުވީ ޤައުމުގެ މުސްތަގުބަލަށް ކުރަން އޮތް އެންމެ ބޮޑު ހޭދައަކީ މިއަދުގެ ކުޑަކުދިންނަށް ރަނގަޅު ތަރުބިއްޔަތެއްދީ އިސްލާމީ ރިވެހި އަޚުލާގުގެ ތެރެއިން ތަރުބިއްޔަތު ކުރެވޭ ބަޔަކަށް ހެދުންކަމަށެވެ. އެމަސައްކަތް މަސައްކަތްކޮށް މުސްތަގުބަލަށް އެކުދިން ތަރުބިއްޔަތު ކުރެވިއްޖެނަމަ މުސްތަގުބަލު އޮތީ ފަހިކޮށް ކަމުގައި ޤާސިމް ވިދާޅުވިއެވެ.
ބައިނަލް އަޤްވާމީ ކުޑަކުދިންގެ ދުވަހުގެ އެންމެހާ ހެޔޮ އެދުންތައް ދުނިޔޭގެ އެކިކަންކޮޅުތަކުގައިވާ އެންމެހާ ކުޑަކުދިންނަށާއި އެކުދިންގެ މައިންބަފައިންނަށް ފޮނުވަން. އުޖާލާ މާދަމާއެއް ހޯދުމަށްޓަކައި ދިވެހި މައިންބަފައިންނާއި ބެލެނިވެރިން މިއަދު ކުރަންޖެހޭ އެންމެ ބޮޑު އެއް އިންވެސްޓްމަންޓަކީ، ކުޑަކުދިންގެ ހަައްޤުތައް ފުރިހަމައަށް ޙިމާޔަތްކޮށް އެކުދިންނަށް އިސްލާމީ ރިވެތި އަޚްލާޤުގެ ފުރިހަމަ ތަރުބިއްޔަތުދީ އެއީ މުޖުތަމަޢަށް ބޭނުންތެރި ބަޔަކަށް ހެދުން.
– ޤާސިމް ވިދާޅުވިއެވެ.
ޤާސިމް ވިދާޅުވީ މުޅި މުޖުތަމައުގެ އެންމެ ބޮޑު އަޅާލުމެއް ދޭންޖެހޭ ބަޔަކީވެސް ކުޑަކުދިންކަމަށެވެ. ކުޑަކުދިންގެ ހައްގުތައް ކަށަވަރުކޮށް މާދަމާގެ މުޖުތައުމު އުޖާލާ ކުރުމަށްޓަކައި އެކުދިންނަށް ރަނގަޅު މަގެއް ދެއްކިއްޖެނަމަ ފައިދާ ކުރާނީ މުޅި ރާއްޖެއަށް ކަމުގައި ޤާސިމް ވިދާޅުވިއެވެ.
އުފާވެރި އަދި ބާއްޖަވެރި މާދަމައެއް އެދޭނަމަ މުޅި މުޖުތަމަޢުގެ ހިފެހެއްޓުމެއް ނެތް ލޯތްބާއި އަޅާލުން އެންމެ ބޮޑަށް ލިބިދޭން ޖެހޭނީ މާދަމާ މި ޤައުމުގެ އެންމެހާ ކަންކަމެއްގައި ބަސްކިޔާން ތިބޭނޭ މިއަދުގެ ކުޑަކުދިންނަށް.
– ޤާސިމް ވިދާޅުވިއެވެ.
ކުޑަކުދިންނަކީ ޤައުމުގެ މުސްތަޤުބަލެވެ. ކުޑަކުދިންގެ ރައްކާތެރިކަން ކަށަވަރުކޮށް، އެކުދިންގެ ޖިސްމާނީ އަދި ނަފްސާނީ ދުޅަހެޔޮކަން ޔަޤީންވެގެންދިޔުމަކީ، ޙަގީގީ މާނައިގައި ޤައުމެއްގެ ތަރައްޤީ ވަޒަންކުރެވޭނެ މުހިއްމުކަމެކެވެ. ދުނިޔޭގެ ހުރިހާ ޤައުމަކުންވެސް މަސައްކަތްކުރަމުން އަންނަނީ އެޤައުމެއްގެ ކުޑަކުދިންނަށް އަމާން ރައްކާތެރި މާޙައުލެއް ޤާއިމުކޮށްދިނުމަށެވެ. ރާއްޖޭގައިވެސް މިމަސައްކަތް އަންނަނީ ކުރަމުންނެވެ.
ކުޑަކުދިންނަކީ މުޖުތަމަޢުގެ ހުރިހާ ފަރުދުންގެ އަޅާލުމާއި ލޯބި ކަށަވަރުކޮށްދޭންޖެހޭ ބައެކެވެ. އެކުދިންގެ ސަލާމަތާއި ރައްކާތެރިކަން ކަށަވަރުކުރުމަށް ކުރިމަތިވާ ހުރަސްތައް ނައްތާލާ، އެކަންކަމަށް ޙައްލުގެނައުމަށް ރާއްޖެއިންވަނީ ބައިނަލްއަޤުވާމީ އެކި މުޢާޙަދާތަކުގައި ބައިވެރިވެ އެއްބަސްވެފައެވެ. ރާއްޖޭގައި ކުޑަކުދިންގެ ޙައްގުތައް ކަށަވަރުކުރުމަށް ކުޑަކުދިންގެ ޙައްގުތައް ރައްކާތެރިކުރުމާއި ބެހޭ ޤާނޫނާއި، ކުޑަކުދިންގެ ޢަދުލުގެ ޤާނޫނާއި، ތަޢުލީމުގެ ޤާނޫނު މިހާރުވަނީ ތަސްދީޤުކޮށް ތަންފީޒުކުރަން ފަށާފައެވެ.
