ފ.އަތޮޅުގެ ދެ ދާއިރާއަކުން ގިނަ އަދަދެއްގެ މެމްބަރުން ޖުމްހޫރީ ޕާޓީއާ ގުޅިއްޖެއެވެ.
މިގޮތުން މިއަދު ޖޭޕީއަށް ސޮއި ކޮށްފައިވަނީ ފ. ނިލަންދޫ ދާއިރާއިން 56 މެމްބަރުންނާއި، ބިލެއްދޫ ދާއިރާއިން 60 މެމްބަރެކެވެ. މި މެމްބަރުންގެ ފޯމްތަކާއި ހަވާލުވެފައިވަނީ ޖުމުހޫރީ ޕާޓީގެ ލީޑަރު، އަދި އެޕާޓީން ރިޔާސީ ކެނޑިޑޭޓު ގާސިމް އިބުރާހިމްއެވެ.
ފ. އަތޮޅުގެ ދެ ދާއިރާއަކުން ގިނަ އަދަދެއްގެ މެމްބަރުން މިއަދު ޖޭޕީއާއި ގުޅިފައިވާއިރު، ފ.އަތޮޅު ކައުންސިލްގެ ކުރީގެ ނާއިބު ރައީސް މަހްމޫދު އާއި ފ. ދަރަނބޫދޫ ކައުންސިލްގެ ކުރީގެރައީސް އަލީ މުޙައްމަދު އެމްޑީޕީ ދޫކޮށް މިއަދު ވަނީ ޖޭޕީއާއި ގުޅިފައެވެ.
ޖުމުހޫރީ ޕާޓީން މިހާރު ދަނީ ކުރިޔަށް އޮތް ރިޔާސީ އިންތިޚާބަށް ތައްޔާރު ވަމުންނެވެ. މިގޮތުން އެޕާޓީގެ ލީޑަރު ގާސިމް އިބުރާހިމް ވަނީ، ރިޔާސީ އިންތިޚާބަށް ވާންޖެހޭ ތައްޔާރީތައް ލަސް ނުކޮށްވުމަށް ޕާޓީގެ ލީޑަރޝިޕަށް އަންގަވާފައެވެ.
ކުރިޔަށް އޮތް ރިޔާސީ އިންތިޚާބަށް ޖުމުހޫރީ ޕާޓީންވަނީ، އެމްޑީޕީގެ ރައީސް މުހައްމަދު ނަޝީދު އިސްވެ ހިންގަވާ ފިކުރެއްގެ ދިރުން ސިޔާސީ ހަރަކާތާއި ކޯލިޝަންވެސް ހަދާފައެވެ. އަދި އެޕާޓީން ދަނީ ކޯލިޝަން ހެދުމަށް އިތުރު ސިޔާސީ ޕާޓީތަކާ ވާހަކަވެސް ދައްކަމުންނެވެ. އެހެންނަމަވެސް އެހެން އެއްވެސް ސިޔާސީ ޕާޓީއަކުން އަދި މިހާތަނަށް ޖޭޕިއާއެކު ކޯލިޝަން ހެދުމަށް ނިންމާފައެއް ނުވެއެވެ.
