ސްރީލަންކާއަށް މަސްތުވާތަކެތި އެތެރެކުރުމުގެ ކުށް ސާބިތުވި ދިވެއްސަކު ހަތް އަހަރަށް ޖަލަށްލުމަށް ހުކުމްކޮށްފިއެވެ.
ލަންކާގެ ނޫސސްތަކުން ބުނީ، މަސްތުވާތަކެތީގެ ބާވަތެއް ކަމަށްވާ އެމްޑީއެމްއޭ (އެކްސްޓަސީ) ލަންކާއަށް އެތެރެ ކުރި ދިވެއްސަކު ހަތް އަހަރަށް ޖަލަށް ލުމަށް ހުކުމް ކޮށްފައިވާ ކަަމަށެވެ. މިއީ މަސްތުވުމަށް ބޭނުން ކުރާ މަނާ ބޭހެކެވެ. މިއީ ޕާޓީ ކުރަން ބޭނުން ކުރާ ބާވަތުގެ މަސްތުވާ އެއްޗެކެވެ. މި ހުކުމް އިއްވީ ހައިކޯޓުގެ ފަނޑިޔާރު އަމާލް ރަނަރާޖާއެވެ.
އަދަބު ލިބިފައިވަނީ ޒިދާން އިބްރާހިމް ނަމަކަށް ކިޔާ ދިވެއްސަކަށެވެ. ޒިދާން އަށް ދައުވާކުރީ މޭ 16، 2018 ގައި މަސްތުވާތަކެތީގެ ބާވަތެއް ކަމަށްވާ އެކްސްޓަސީ ލަންކާއަށް އެތެރެކުރުމުގެ ކުށުގަ އެެވެ.
ލަންކާގައި އެންމެ ގިނައިން ދިވެހިން ދިރިއުޅޭ ދޭހިވާލާގެ ނެދިމާލާއިން އޭނާ ހައްޔަރުކުރީ ލަންކާގެ ސްޕެޝަލް ޓާސްކްފޯސް އޯގަނައިޒްޑް ކްރައިމް ޑިވިޒަނުން ކުރިއަށް ގެންދިޔަ ހާއްސަ އޮޕަރޭޝަނެއްގެ ތެރެއިންނެވެ. ރާއްޖެއިން ބޭރުގައި އެންމެ ގިނަ އަދަދަކަށް ދިވެހިން ދިރިއުޅޭ ލަންކާގައި މަސްތުވާތަކެތީގެ މައްސަލަތަކުގައި އާއި ވިސާގެ މައްސަލަތަކުގައި މީގެކުރިން ވެސް އެތައް ދިވެއްސަކު ހައްޔަރުކޮށްފައިވެއެވެ.
މިފަދަ މައްސަލަތައް ލަންކާގައި އިތުރުވުމާ ގުޅިގެން ލަންކާގައި ދިރިއުޅޭ ދިވެހިން އެ ގައުމުގެ ގާނޫނުތަކާއި ގަވައިދުތަކާ އެއްްގޮތަށް އަމަލުކުރުމަށްވެސް މީގެކުރިން ދިވެހި ސަރުކާރުން އިލްތިމާސްކޮށްފައިވެއެވެ.
