އިނގިރޭސި ރަސްގެފާނު ޗާލްސްIII ރަސްމީ އިއްޒަތުގައި އިނގިރޭސި ތަޚުތުގައި ވަޑުވައިފިއެވެ.

ފާއިތުވި 70 އަހަރުގައިވެސް އިނގިރޭސި ރަސްކަލަކު ތަޚުތުގައި ވެޑުވުމަށް ބޭވޭ ފުރަތަމަ ރަސްމިއްޔާތު މިއަދު ބޭއްވިފައިވަނީ ލަންޑަންގެ ވެސްޓްމިންސްޓަރ އަބޭގައި ކުރިޔަށްދިޔަ އަޅުކަމުގެ ރަސްމިއްޔާތަކާއެކުއެވެ.

އިނގިރޭސީ ޝާޙީއާއިލާއިން، ފާއިތުވި 1،000 އަަހަރުގައި ރަނިންނާއި ރަސްކަލުން ރަނިކަމާއި ރަސްކަމުގެ ތަޚުތުގައި ވެޑުވުމަށް ގެންގުޅެފައިވާ ސަގާފަތާ އެއްގޮތަށް ޗާލްސްIII ތަޚުތުގައި ވަޑުވާފައިވަނީ ކުރިސްޓިއަންދީނުގެ އަޅުކަންތަކާއެކު، ގައުމަށާއި ދީނަށް ތެދުވެރިވުމަށް ޗާލްސް ކުރި ހުވަޔަކަށް ފަހުއެވެ.

އެއަށްފަހު ރަސްކަމުގެ ތާޖު ޗާލްސްގެ އިސްތަށިފުޅުގައި ވެޑުވުމުގެ ކުރިން، ސަގާފީ ގޮތުންނާއި އަދި ކުރިސްޓިއަން ދީނުގައި އަމަލު ކުރާ އުސޫލުގެ މަތިން، ޗާލްސް އިސްތަށިފުޅުގައި ޚާއްސަ ތެލެއް، އީސާއީ ދީނުގެ ފާދިރީއަކު ލައި ލައިދީފައެވެ. އެ ވަގުތުކޮޅު ކުރިޔަށް ގެންދެވުނީ، ވަށައިގެން ބަންދުކޮށް، ރަސްމިއްޔާތަށް ހާޒިރުވެ ތިބި މީހުންނަށްވެސް ނުފެންނަ ގޮތަށެވެ.

އެއަށްފަހު، ޗާލްސްއަށް ރަސްކަމުގެ ކަނޑިކޮޅު އަރުވާ، އަދި ރަސްކަމުގެ ތާޖު ޗާލްސްގެ އިސްތަށިފުޅުގައި ވަޑުވާފައި ވެއެވެ.

މި ރަސްމިއްޔާތުގައި ރަސްގެފާނު ޗާލްސް ރަސްކަމުގައި ތަޚުތުގައި ވެޑުވުމަށްފަހު، ޗާލްސްގެ އަނބިކަބަލުން ކެމިލާގެ އިސްތަށިފުޅުގައިވެސް ރަސްކަމުގެ ރާޖެއް ވަޑުވާފައި ވެއެވެ.

ދުނިޔޭގެ އެކި ގައުމުތަކުގެ 100 އަށްވުރެ ގިނަ އިސްވެރިން ބައިވެރިވެވަޑައިގެންނެވި މި ރަސްމިއްޔާތު 2 ގަޑިއިރަށް ކުރިޔަށް ގޮސްފައި ވެއެވެ.

ރަސްގެފާނު ތަޚުތުގައި ވެޑުވުމުގެ ރަސްމިއްޔާތު ކުރިޔަށްދިޔަ ހޯލުގައި، މިރަސްމިއްޔާތު ބެލުމަށް 2300 ގެސްޓުން ހާޒިރުވެ ތިއްބެވެ. އޭގެ ތެރޭގައި، ޝާހީ އާއިލާއާއި ވަރަށް ބޮޑަށް ޚިޔާލު ތަފާތުވެފައިވާ، ޗާލްސްIII ގެ ދެވަނަ ދަރިކަލުން ޕްރިންސް ހެރީވެސް ހިމެނެއެވެ.

ޕްރިންސް ޗާލްސް އިނގިރޭސި ރަސްކަމަށް ވަޑައިގެންނެވީ ފާއިތުވި އަހަރުގެ ސެޕްޓެމްބަރުމަހުގެ 14 ވަނަ ދުވަހު، ޗާލްސްގެ މަންމާފުޅު އަދި ކުއީން އެލިޒަބަތުII އަވަހާރަ ވުމާއި ގުޅިގެންނެވެ. ރާނީ އަވަހާރަވީ އެކަމަނާގެ ރަނިކަމަށް 70 އަހަރުވުމަށްފަހުއެވެ. މިއީ ލަންޑަނުގެ ވެސްޓްމިންސްޓަރ އަބޭގައި 1066އިން ފެށިގެން ބޭއްވޭ 40 ވަނަ ތަޚުތުގައި ވެޑުވުމުގެ ރަސްމިއްޔާތެވެ.