އެމްއެމްޕީއާރުސީގެ ޚިޔާނާތާއި ގުޅިގެން 20 އަހަރުގެ ޖަލު ހުކުމެއް ގޭގައި ތަންފީޒު ކުރަމުންދާ ކުރީގެ ނައިބް ރައީސް އަހުމަދު އަދީބު ސީރިއަސް އާލާސްކަންފުޅެއްގައި އިއްޔެ ޚާއްސަ ޑޮކްޓަރަކަށް ދައްކައިފިއެވެ.

އެމްއެމްޕީއާރުސީގެ ކޮރަޕްޝަނާއި ގުޅިގެން އަދީބު މައްޗަށް ދައުލަތުން އުފުލި 7 ދައުވާ ސާބިތުވެ 20 އަހަރަށް ޖަލަށްލުމަށް ހުކުމްކޮށްފައިވާއިރު ކޯޓުގެ ހުއްދައާއިއެކު އޭނާގެ ބަލި ހާލަތު ހުރިގޮތުން ގެއަށް ބަދަލުކޮށްފައިވަނީ 2020 ވަނަ އަހަރުގެ އޮކްޓޯބަރު މަހުގެ 3 ވަނަ ދުވަހުއެވެ. އޭގެ ފަހުން އަދީބު ހުކުމް ތަންފީޒު ކުރައްވަމުން ގެންދަވަނީ ގޭގައެވެ.

އަދީބުގެ ޕާޓީ އެމްޓީޑީން ބުނެފައިވަނީ އެމްޓީޑީގެ ރައީސް އަހުމަދު އަދީބު އިއްޔެގެ ވަގުތެއްގައި ވަނީ ސީރިއަސް އަލާސްކަންފުޅަކާއި ގުޅިގެން ހާއްސަ ޑޮކްޓަރެއްގެ ފަރުވާ ހޯއްދަވާފައިވާކަމަށެވެ. އެޕާޓީން ވަނީ ނިމިދިޔަ ވެރިކަމުގައި އަދީބު ބޭސްފަރުވާއިން މަހުރޫމްކޮށް ޖަލުގައި ބަންދުކޮށް ގެނެވުނު އަނިޔާތަކާއި ގުޅިގެން ސިއްޚީ އެތައްކަމެއް އަދީބަށް ދިމާވެފައިވާކަމަށެވެ.

2015 އިން 2018 އަށް ބޭސްފަރުވާއިން މަހްރޫމުކޮށް އައިސޮލޭޝަން ޖަލެއްގައި 24 ގަޑިއިރު ތަޅުލައިގެން ދެވުނު އަނިޔާގައި ސިއްހީ އެތައްކަމެއް އަދީބަށް ވަނީ ދިމާވެފަ.

– އެމްޓީޑީން ބުނެފައިވެއެވެ.

ކުރީގެ ނާއިބު ރައީސް އަހުމަދު އަދީބު ޖަލުގެ ބަދަލުގައި ގޭގައި ހުރުމަށް ފުރުޞަތު ދެއްވާފައިވުމުން ގިނަ ބައެއްގެ ފާޑުކިޔުން މިސަރުކާރަށް އަމާޒުވެސް ވިއެވެ. އަދި އެފާޑުކިޔުންތަކާއި ގުޅިިގެން ހޯމް މިނިސްޓަރ އިމްރާން ވަނީ އަދީބު ގޭގައި ބަހައްޓަން ޖެހުނު ސަބަބުވެސް ސާފުކޮސް ދެއްވާފައެވެ.

އިމްރާން ވިދާޅުވީ އަދީބު ނިދުމުގައި މައްސަލަތަކެއް ހުންނަކަމަށާއި، ފުއްޕާމެއާއި ގުޅުންހުރި ނޭވާލުމުގެ މައްސަލަތަކެއް ހުރިކަމަށް ޑޮކްޓަރުން ދެއްވާފައިވާ ލިޔެކިއުންތަކުގައި ވާކަމަށެވެ. އަދި އަދީބު ނިދުމުގައި ވަކި ޚާއްސަ މެޝިނެއް ބޭނުންކުރަންޖެހޭ ކަމަށާއި، އެމެޝިނަކީ ޖަލުގައި ބޭނުން ކުރެވޭނެ މެޝިނަކަށް ނުވާތީ އެކަމަށް ރިޔާޢަތްކޮށް އަދީބު ގެއަށް ބަދަލު ކުރީކަމަށެވެ.

އެމްއެމްޕީއާރުސީގެ ކޮރަޕްޝަނާއި ގުޅިގެން އަދީބު މައްޗަށް ދައުލަތުން އުފުލި 7 ދައުވާއަށް އަދީބު ވަނީ އިއުތިރާފުވެޑައިގެންފައެވެ. އަދީބު ޝަރީއަތުގެ މަޖިލީހުގައި ވަނީ އެމްއެމްޕީއާރުސީގެ ކޮރަޕްޝަނާއި ގުޅޭ ތަފްސީލުތައް ކިޔާދެއްވާފައެވެ. އަދި ރާއްޖޭގައި ފަހުގެ ތާރީޚެއްގައި ހިނގި އެންމެ ބޮޑު ޚިޔާނާތްކަމަށްވާ އެމްއެމްޕީއާރުސީގެ ބޮޑު ހިޔާނާތަކީ ކުރީގެ ރައީސުލްޖުމްހޫރިއްޔާ ޔާމީންގެ އިރުޝާދުގެ ދަށުން އޭރުގެ ސަރުކާރުން ގުޅިގެން ހިންގި ޖަރިމާއެއްކަމަށް ކުރީގެ ނާއިބު ރައީސް އަޙްމަދު އަދީބު ވަނީ ތުހުމަތުކުރައްވާފައެވެ.