މިއަހަރު ބާއްވާ ރިޔާސީ އިންތިޚާބުގައި ވެރިކަން ކުރާ ކޯލިޝަންގައި ހިމެނޭ އެމްއާރުއެމްއިން އިންތިޚާބުގައި ވާދަކުރާ އެމްޑީޕީއާއިއެކު މަޝްވަރާ ބައްދަލުވުމެއް ބާއްވައިފިއެވެ.

އެމްއާރުއެމްގެ އޮފީހުގައި އޮތް މިބައްދަލުވުމުގައި އެމްއާރުއެމްގެ ރައީސް ފާރިސް މައުމޫނާއި، ޕާޓީގެ އިސްވެރިން ބައިވެރިވިއެވެ. އެމްޑީޕީގެ ފަރާތުން އެމްޑީޕީގެ ޗެއާޕާސަން ފައްޔާޒު އިސްމާއިލާއި، ލީޑަރޝިޕް އިސްބޭފުޅުން ބައިވެރިވިއެވެ.

މިބައްދަލުވުމުގައި، އެމްއާރުއެމްއިން ވަނީ މުހިންމު 5 ކަމެއް އެމްޑީޕީއަށް ހުށަހަޅާފައެވެ.

މި ބައްދަލުވުމުގައި އެމް.އާރް.އެމްގެ ފަރާތުން ހުށަހެޅި މައިގަނޑު ކަންކަމަކީ:

1. ރާއްޖޭގެ މިނިވަންކަމާއި ސިޔާދަތާއި އަދި އިސްތިޤުލާލަށް ކިތަންމެ ކުޑަނަމަވެސް އުނިކަމެއް ނާންނާނެކަން ކަށަވަރު ކުރުމަށްޓަކައި މަޢުލޫމާތަށް އެދުން.
2. ދިވެހި ރައްޔިތުންގެ މަސްލަޙަތާއި އެމް.އާރް.އެމްގެ އުޞޫލުތައް ނެގެހެއްޓޭ ގޮތަށް ސަރުކާރު ހިންގޭނެކަން ކަށަވަރު ކުރުން.
3. ކޯލިޝަން އެއްބަސްވުމަށް އިޙްތިރާމުކޮށް އެއްބަސްވުމާއި އެއްގޮތަށް ދެފަރާތުން ވެސް ޢަމަލު ކުރާނެކަމުގެ ޔަޤީންކަން ދިވެހި ރައްޔިތުންނަށް ހޯދައި ދެވޭނެ ގޮތެއް ހޯދުން.
4. ސަރުކާރުގެ ސިޔާސަތުތަކާއި ޤައުމަށް ދިމާވެފައިހުރި ބޮޑެތި ގޮންޖެހުންތައް ރިފޯމް ކުރާނެ ގޮތްތައް.
5. ދިވެހިރާއްޖޭގެ ވެރިކަން ކުރާ ނިޒާމަކީ ރިޔާސީ ނިޒާމުގެ ގޮތުގައި ދަމަހައްޓާނެ ކަމުގެ ޔަޤީންކަން.

މިނުކުތާތަކާއި، އިތުރު ސިޔާސަތުތަކާއެކު ތަފްސީލީ މަޝްވަރާ ބައްދަލުވުންތަކެއް ކުރިއަށް ގެންދިޔުމަށް ވެސް ރޭގެ ބައްދަލުވުމުގައި ވަނީ ނިންމާފައެވެ.

އެމްއާރުއެމާ އެކު ދެވަނަ ދައުރަކަށް ކޯލިޝަން ހަދަން ރައީސް އިބްރާހިމް މުހައްމަދު ސޯލިހް ވެސް ވަނީ ދައުވަތު ދެއްވައިފައެވެ. އަދި އެކަމާ ގުޅޭ ގޮތުން ފުރަތަމަ ބައްދަލުވުން ބޭއްވި ނަމަވެސް، ނިމިފައި ވަނީ ކޮޅެއްގައި ނުޖެހިފައެވެ. އެކަމަކު، އިތުރު ބައްދަލުވުންތައް ބާއްވަން އެއްބަސްވެފައިވެއެވެ. އެމްއާރުއެމްއިން ވަނީ ޖޭޕީއާއިއެކުވެސް މަޝްވަރާ ކުރުމަށް ނިންމާފައެވެ.

ޖޭޕީން ރިޔާސީ އިންތިހާބަށް ތައްޔާރުވުމުގެ މަސައްކަތް ޕާޓީ އެތެރޭގައި ފަށާފައިވާ އިރު، އެމްޑީޕީގެ ރައީސް މުހައްމަދު ނަޝީދުގެ "ފިކުރެއްގެ ދިރުން" ފަޅިން ވަނީ ރިޔާސީ އިންތިހާބުގައި ޖޭޕީއާ އެކުގައި ކުރިއަށް ދިއުމަށް ނިންމައި، ކޯލިޝަން މަޝްވަރާތަކާއި ރިޔާސީ މެނިފެސްޓޯ އެކުލަވާލުމުގެ މަސައްކަތް ފަށައިފައެވެ.