އިނގިރޭސި ޕްރިމިއާ ލީގުގައި ޓޮޓްނަމް ހޮޓްސްޕާ އަތުން އިތުރު ވަގުތުގައި ކާމިޔާބުކުރި ލަނޑާއެކު ލިވަޕޫލް މޮޅުވެއްޖެއެވެ.
ލިވަޕޫލްގެ ދަނޑުގައި ރޭ ކުޅުނު މެޗް އެޓީމުން ކާމިޔާބުކުރީ ހަތަރު ލަނޑު ތިން ލަނޑުންނެވެ. ޕްރިމިއަރ ލީގުގައި ފަހަކަށް އައިސް ފެނިގެންދިޔަ އެންމެ ވާދަވެރި އަދި އެންމެ ފޯރިގަދަވި މި މެޗްގައި ގިނައިރު ބޯޅަ ގެންގުޅެ ގިނަ ހަމަލާ އުފެއްދީ ލިވަޕޫލުންނެވެ. އަދި މިމެޗް ލުވަޕޫލުން ފެށީ ވަރަށް ފޯރީގައެވެ. އެގޮތުން ލިވަޕޫލުން ވަނީ މެޗްގެ ތިންވަނަ މިނެޓްގައި ކާޓިސް ޖޯންސް ޖަހާދިން ލަނޑާއެކު ލީޑު ނަގާފައެވެ. އަދި އޭގެ ދެމިނެޓްފަހުން ލުއިސް ޑިއާޒްވަނީ ލިވަޕޫލްގެ ލީޑު ފުޅާކޮށްދީފައެވެ. މިމެޗްގައި ލިވަޕޫލްގެ ތިންވަނަ ލަނޑު މެޗްގެ 15 ވަނަ މިނެޓްގައި ޖަހާދިނީ ލިބުނު ޕެނަލްޓީއަކުން މުހަންމަދު ޞަލާހްއެވެ.
މި މެޗްގެ ފުރަތަމަ 15 މިނެޓްގެ ތެރޭގައި ލިވަޕޫލުން އަމިއްލަ ދަނޑުގައި ތިން ލަނޑުގެ ލީޑެއް ނެގުމާއެކު މިއީ އަނެއްކާވެސް ސްޕާސް ތަފާތު ބޮޑު ނަތީޖާ އަކުން ބަލިވެގެންދާނެ މެޗެއް ކަމަށް ހީވެގެންދިޔައެވެ. ނަމަވެސް ގިނަ ބަޔަކު ހީކުރި ގޮތާ ޚިލާފަށް ސްޕާސްއިން ހިތްވަރު އެލުވާނުލައި ކުރަމުންދިޔަ މަސައްކަތުގެ ނަތީޖާއަކަށް ވެގެންދިޔައީ މެޗްގެ 39 ވަނަ މިނެޓްގައި ކެޕްޓަން ހެރީ ކޭން، އެ ޓީމަށް ލަނޑެއް ޖަހައި ފަރަޤު ކުޑަކުރުމެވެ.
މިމެޗްގައި ސްޕާސްގެ ދެވަނަ ލަނޑު މެޗްގެ 77 ވަނަ މިނެޓްގައި ސޮން ހެއުން-މިން ކާމިޔާބު ކޮށްދިނުމާއެކު، މެޗްގެ ބަކީ އޮތް 13 ވަރަކަށް މިނެޓާއި އިތުރު ވަގުތުދިޔައީ ދެޓީމްގެ ސަޕޯޓަރުންވެސް ނޭވާ ހިފަހައްޓާލައިގެން ތިބެން ޖެހުނު ވަޤުތުކޮޅަކަށެވެ. މިގޮތުން މެޗްގެ އިތުރު ވަގުތުގެ ތިންވަނަ މިނެޓްގައި ލިބުނު ހިލޭ ޖެހުމަކުން ސްޕަރސްއިން ވަނީ މެޗްގެ ނަތީޖާ ހަމަހަމަކޮށްއެވެ. މިލަނޑު އެ ޓީމަށް ޖަހާދިނީ ރިޗާލިސަންއެވެ. މިލަނޑާއެކު މިމެޗު އެއްވަރުވެގެން ނިމިދާނެކަމަށް ބެލެވުނު ނަމަވެސް އޭގެ މިނެޓެއް ފަހުން ސްޕާސްގެ ޑިފެންސަށް ހެދުނު ގޯހެއްގެ ފައިދާ ނަގާ ޑިއޮގޯ ޖޮޓާ ވަނީ މިމެޗުން ލިވަޕޫލް މޮޅުކޮށްދިން ލަނޑު ކާމިޔާބުކޮށްދީފައެވެ.
މި ކާމިޔާބީއާއެކު ލިވަޕޫލް މިހާރު ވަނީ ކުޅުނު 33 މެޗުން ލިބިފައިވާ 56 ޕޮއިންޓާއެކު ތާވަލްގެ ފަސްވަނައަށް ކުރިއަށް ޖެހިލާފައެވެ. އަދި މިމެޗުން ބަލިވުމުން 54 ޕޮއިންޓާއެކު ސްޕާސް މިވަނީ ތާވަލްގެ ހަވަނައަށް ފަހަތަށް ޖެހިލާފައެވެ.
