އިޓާލިއަން ކަޕްގެ ސެމީ ފައިނަލް ދެ ވަނަ ލެގުގައި ރޭ 1-0 އިން މޮޅުވެ، އިންޓަ މިލާނުން ޔުވެންޓަސް ކަޓުވާލައި ފައިނަލަށް ދަތުރުކޮށް، މުބާރާތުގެ ތަށި ދިފާއުކުރުމުގެ ފުރުސަތު ހޯދައިފިއެވެ.
އިންޓަރ މިލާން ފައިނަލްގެ ޖާގަ ހޯދީ ސެމީފައިނަލް ދެވަނަ ލެގު 1-0 ން ކާމިޔާބުކޮށް, 2-1 ގެ އެގްރިގޭޓުން ކުރި ހޯދައިގެންނެވެ. ޔުވެންޓަސްގެ ދަނޑުގައި ކުޅުނު ފުރަތަމަ ލެގު ނިމުނީ 1-1 ން އެއްވަރުވެގެންނެވެ. ދެވަނަ ލަގުގައި އިންޓަރ މިލާން ފައިނަލަށް ގެންގޮސްދިން ލަނޑު ޖެހީ ފެޑެރީކޯ ޑި މާކޯއެވެ. ފުރަތަމަ ލެގުގެ އިތުރު ވަގުތުގައި ޕެނަލްޓީއަކުން އިންޓަރ މިލާނަށް ލަނޑު ޖަހައިދިނުމަށްފަހު ޔުވެންޓަސްގެ ސަޕޯޓަރުންނާ ދިމާކުރުމުގެ ގޮތުން އުފާފާޅުކުރި ލުކަކޫއަށް ރޭގެ މެޗުގައި ފުރުޞަތު ދިނީ ބެންޗުންނެވެ.
އަންނަ މެއި މަހުގެ 24 ވަނަ ދުވަހު ކުޅޭ ފައިނަލްގައި އިންޓަރ މިލާން ވާދަކުރުން ގާތީ ފިއޮރެންޓީނާއާއެވެ. އެއީ ސެމީފައިނަލް ފުރަތަމަ ލެގުގައި ކްރެމޮނެެސޭއާ ވާދަކޮށް 2-0 ން ފިއޮރެންޓީނާ ކާމިޔާބުކޮށްފައިވާތީއެވެ.
އިޓާލިއަން ލީގުގައި އެންމެ އެކަށީގެންވާ ހިސާބެއްގައި ނެތް ކަމުގައި ވިޔަސް، އިންޓަ އިން އަންނަނީ ޗެމްޕިއަންސް ލީގުގެ ސެމީ ފައިނަލުގައި ވާދަވެރި އޭސީ މިލާނާ ކުޅެން ވެސް ތައްޔާރުވަމުންނެވެ. މިއީ، 2010 ވަނަ އަހަރު ޗެމްޕިއަންސް ލީގު ކާމިޔާބުކުރި ފަހުން އެ ޓީމުން ސެމީ ފައިނަލަށް ވެސް ދަތުރުކުރި ފުރަތަމަ ފަހަރެވެ.
