ގދ.މަޑަވެލީގައި ފިރިހެނަކު އޭނާ ލޯބީގެ ގޮތުން ގުޅިގެން އުޅޭ 18 އަހަރު ނުފުރޭ އަންހެން ކުއްޖަކަށް އަނިޔާ ކުރި މީހާ ކޯޓުން ދޫކޮށްލައިފިއެވެ.
މިއަހަރުގެ މާޗް 21 ވަނަ ދުވަހު ހިނގި މިހާދިސާއާއި ގުޅިގެން އާންމުވި ވީޑިއޯއިން ފެންނަ ގޮތުން އެފިރިހެން މީހާ ވަނީ އެއަންހެން ކުއްޖާގެ ގައިގައި ތަޅާ ވަރަށް ބޮޑަށް އަނިޔާކޮށްފައެވެ. އަދި އޭނާ އެކުއްޖާގެ ގައިގައި ތަޅާތަންވެސް ވީޑިއޯން ފެނިފައިވެއެވެ.
މިކަން ހިނގިއިރު ގިނަ އަދަދެއްގެ އަންހެނުން އެސަރަހައްދުގައިތިބެ އޭނާއަށް އެހެން ނެހެދުމަށް ގޮވަމުންދިޔައެވެ. ނަމަވެސް އެފިރިހެން މީހާ ކުރަމުންދިޔަ އަނިޔާ ހުއްޓާލިތަނެއް ނުފެނެއެވެ. އޭނާ ވަނީ ވަކި ހިސާބަކުން އަންހެން ކުއްޖާގެ އަތުގައި ހިފާ މަގު މަތިން ދަމާފައި ގެންގޮސްފައެވެ.
މި މައްސަލައިގައި 34 އަހަރުގެ އެ ފިިރިހެން މީހާ ހައްޔަރު ކޮށް, އޭނާ ޝަރީއަތް ނިމެންދެން ބަންދު ކުރަން އެރަށު ކޯޓުން އަމުރު ކުރިއެވެ. މި މައްސަލައާ ގުޅިގެން ހައްޔަރުގައި ހުރި މީހާގެ ބަންދުގެ މުއްދަތު ރިވިއު ކުރަން އިއްޔެ ކޯޓަށް ގެންދިއުމުން ކޯޓުން އޭނާ ވަނީ ދޫކޮށްލާފައެވެ.
