މިއަދު ހަބަރުގެ ކިޔުންތެރިންނަށް މި ގެނެސްދެނީ ރިހާކުރު ފޮޅި ތައްޔާރު ކުރެވިދާނެ ގޮތެވެ. ރިހާކުރު ފޮޅި އަކީ ޒަމާނުން ސުރެވެސް ދިވެހިންގެ މެދުގައި ވަރަށް މަގުބޫލު އެއްޗެކެވެ.

އެގޮތުން މިއަދު މި ގެނެސްދެނީ ރިހާކުރު ފޮޅީ ތައްޔާރު ކުރެވިދާނެ ގޮތެވެ. ރޯދަ މަސް ނިމުމުގެ ކުރިން ސުފުރާ ފަޅުފިލުވައިލުމަށް ރިާކުރު ފޮޅި ތައްޔާރު ކޮށްލުން ކިހިނެއް ވާނެތޯއެވެ. މީ ރޯދަ ވިއްލާ ގަޑިގައި ސުފުރާ ފަޅުފިލުވައިލުމަށް ތައްޔާރުު ކޮށްލެވިދާނެ އެއްޗެކެވެ.

ބޭނުން ވާނެ ތަކެތި:

½ ޖޯޑު ރާޅު ހަނޑޫފުށް

1/3 ޖޯޑު ފެން (ހަނޑޫފުށް ފޯކުރަން)

1 ކުޑަ ފިޔާ

1/3 ގިތެޔޮމިރުސް (ނޫނީ ބޭނުން ވަރަކަށް)

½ އިންޗީގެ އިނގުރު

10 ހިކަނދިފަތް

¼ ސައިސަމުސާ ރީނދޫ

1/3 ސައިސަމުސާ ތެޅި މިރުސް

½ ސައިސަމުސާ މުގުރި ދިރި

¼ ސައިސަމުސާ ނުމުގުރާހުރި އަސޭމިރުސް

½ ލުންބޯ

2/3 ޖޯޑު ހުނި

5 ސައިސަމުސާ ފެން

5 ސައިސަމުސާ ރިހާކުރު

2 މޭޒުމަތީ ސަމުސާ ފުށް

ތައްޔާރު ކުރާނެ ގޮތް:

ހަނޑޫފުށާއި ފެން ބޯތަށްޓަކަށް އަޅާ އެއްކޮށްލާފައި އެހަށް ބަހައްޓާށެވެ.

ފިޔާ (ކުޑަކޮށްކޮށާލާފައި)، ގިތެޔޮމިރުސް، އިނގުރު، ހިކަނދިފަތް، ރީނދޫ، ތެޅިމިރުސް، ދިރި، އަސޭމިރުސް، ލުނބޯ ހުތް، ހުނި، އަދި ފެން މިކްސަރުގެ މުގުރާ އެއްޗަށް އަޅާފައި މުގުރާލާށެވެ. މުގުރާނީ ހުރިހާ އެއްޗެއް ކުދިކުދިވެ އެއްވަންދެނެވެ. ކޮންމެހެން މާ އޮމާން ވާވަރަށް މުގުރާކަށް ނުޖެހޭނެއެވެ.

މިކްސަރުން މުގުރި ތަކެތި ބޯތަށްޓަކަށް އަޅާލާށެވެ. ދެން ފޯކުރަން ބެހެއްޓި ހަނޑޫފުށާއިއެކު ރިހާކުރުކޮޅު ވެސް އެ ބޯތަށްޓަށް އަޅާފައި ހުރިހާ އެއްޗެއް ރަނގަޅަށް އެއްކުރާށެވެ. ރަހަ ބަލާލާފައި ބޭނުން ގޮތަކަށް ރަހަ ހެޔޮވަރު ކޮށްލާށެވެ. އަހަރުމެން އިތުރު 1/3 ސައިސަމުސަލުގެ ލޮނުކޮޅެއް މިގަޑީގައި އެޅީމެވެ.

ދެން ބޯތަށީގެ ތެރެއަށް ފުށްކޮޅު އަޅާލާފައި އަނެއްކާވެސް ރަނގަޅަށް އެއްކޮށްލާށެވެ. އެއަށްފަހު ތަވައެއް ހޫނު ކުރަން އުދާފައި އޭގައި ޓިޝޫކޮޅެއް ބޭނުން ކޮށްގެން ކުޑަ ތެޔޮ ކޮޅެއް އުނގުޅާލާށެވެ. ތަވާ ރަނގަޅަށް ހޫނު ވުމުން އެއްކުރި ސާމާނުގެ 2 މޭޒުމަތީ ސަމުސާ ވަރު އެތިކޮޅެއް ތަވާގެ ތެރެއަށް އަޅައި ވަށް ބައްޓަން އަންނާނެ ގޮތަށް ސަމުސަލުން ފަތުރާލާށެވެ. މެދު ގިނީގައި ބަހައްޓައިގެން އަޑީގައި އޮތް ފަޅިއަށް ރަން މުށި ކުލަ އަރަންދެން ފިހާށެވެ. ފިހެވުނީމައި މަތި އޮންނާނީ ތެތްކަން ކެނޑިފައެވެ.

ދެން ދޭފަތެއް ބޭނުން ކޮށްގެން ފުށުން ޖަހާލާފައި މިހާރު ދަށުގައި އޮތް ފަޅިއަށްވެސް ރަން މުށި ކުލަ އަރަންދެން ފިހެލާށެވެ. ފިހެވުނީމައި ތަށްޓަކަށް ނަގާށެވެ. އަދި 5 އަދި 6 ގައިވާ ގޮތަށް ފަތަފޮޅިތައް ފިހަމުން ގޮތް އެއްކުރި ސާމާނު ހުސްކޮށްލާށެވެ.