އަނަބަކީ މިހާރު ކޮންމެވެސް ވަރަސް ބާޒަރުން ލިބެން ހުރި އެއްޗެކެވެ. އަދި އަތްފޯރާ ފަށުގައި އަނބު ހުރި ކަން ފާހަގަ ކޮށްލެވެއެވެ. އަނބުގެ ފަންޏަކީ ޒަމާނުން ސުރެވެސް އަހަރުމެން ދިވެހިންގެ މެދުގައި ވަރަށް މަގުބޫލޫ އެއްޗެކެވެ.

ނަމަވެސް މިއަދު މިގެނެސްދެނީ އަނބުގައި ރިހަ ކައްކާނެ ގޮތެވެ. މީ ދޮންއަނބު ރިހައެވެ. މީ ވަރަށް މީރު އެއްޗެކެވެ. ކުޑ ފޮނި ކުޅި މި ރިހަގަނޑު މި ރޯދަ މަހުގައި އަޅެ ކައްކައިލަ ބަލާށެވެ.

ބޭނުން ވާނެ ތަކެތި:

4 ދިވެހި ދޮން އަނބު

2 މޭޒުމަތީ ސަމުސާ މުގުރި ކޮތަނބިރި

1 މޭޒުމަތީ ސަމުސާ މުގުރި ދަވިއްގަނދު

½ މޭޒުމަތީ ސަމުސާ މުގުރި ދިރި

½ މޭޒުމަތީ ސަމުސާ ތެޅި މިރުސް (ނޫނީ ބޭނުން ވަރަކަށް)

½ ގިތެޔޮ މިރުސް (ނޫނީ ބޭނުން ވަރަކަށް)

1 ފިޔާ

2 ލޮނުމެދު

½ އިނޗީގެ އިނގުރު ކޮޅެއް

10 ހިކަނދިފަތް

6 އިންޗީގެ ރާނބާފަތް ކޮޅެއް

4 ކާފޫރުތޮޅި

3 އިންޗީގެ ފޮނިތޮށި ކޮޅެއް

½ ޖޯޑު ކާށިކިރު (އަހަރުމެން ބޭނުންކުރީ ޕެކެޓުގައި ހުންނަ ދިޔާ ވައްތަރު)

½ ޖޯޑު ފެން

½ ޖޯޑު ތުނިކޮށް ކޮށާފައި ހުރި ހިކިމަސް

2 މޭޒުމަތީ ސަމުސާ ތެޔޮ

½ ސައިސަމުސާ ލޮނު (ނޫނީ ބޭނުން ވަރަކަށް)

ތައްޔާރު ކުރާނެ ގޮތް:

ފިޔާ ތުނިކޮށް ކޮށާށެވެ. ކާފޫރުތޮޅިތައް ކޮޅުން ހުޅުވާލާށެވެ. އަދި އިނގުރާއި ލޮނުމެދުކޮޅު ސަމުސަލެއްގެ އަނެއްފުށް ފަދަ އެއްޗެއް ބޭނުން ކޮށްގެން ރަނގަޅަށް ޗަސްކޮށްލާށެވެ.

އަނބުތައް މަށާށެވެ. ބައެއް މީހުން ދޮން އަނބު ރިހަ ކައްކާއިރު އަނބު މެށުމަށްފަހު އެ އޮތްގޮތަށް ނުކޮށާ ބޭނުން ކުރެއެވެ. އަނެއްބައި މީހުން ރިހަ ކައްކަނީ އަނބު ކޮށައިގެންނެވެ. އެހެންވީމާ މިދެގޮތުން ކުރެ ބޭނުން ގޮތެއް ހަދާށެވެ. އަހަރުމެންނަށް ބޮޑަށް ކަމުދަނީ އަނބު އޮތްގޮތަށް ހެދީމައެވެ.

ތެއްޔަކަށް ތެޔޮކޮޅު އަޅައި އެ ރަނގަޅަށް ހޫނުކުރުމަށްފަހު ތެއްޔަށް ފިޔާކޮޅާއި ކާފޫރުތޮޅިކޮޅާއި ފޮނިތޮށިކޮޅާއި ރާނބާފަތްކޮޅާއި ގިތެޔޮމިރުހާއި ހިކަނދިފަތްކޮޅު އަޅާލާށެވެ. ދެން ފިޔާކޮޅު ރަތްވާން ފަށްޓަންދެން ކައްކާލާށެވެ. ގިނި ބަހައްޓާނީ މެދު މިނެއްގައެވެ. ދެން ޗަސްކުރި ލޮނުމެދާއި އިނގުރުކޮޅު ތެއްޔަށް އަޅައި ރަނގަޅަށް އެއްކޮށްލާފައި ތިރީހަކަށް ސިކުންތު ކައްކާލާށެވެ.

ދެން އެޔަށްފަހު ކޮތަނބިރި، ދަވިއްގަނދު، ދިރި އަދި ތެޅިމިރުސްކޮޅު ތެއްޔަށް އަޅާލާ އެއްކޮށްލުމަށްފަހު ތިރީހަކަށް ސިކުންތު ކައްކާލާށެވެ. ދެން ދޮންއަނބުކޮޅާއި ކާށިކިރާއި ލޮނާއި ފެނާއި ހިކިމަސްކޮޅު ތެއްޔަށް އަޅައި ރަނގަޅަށް އެއްކޮށްލުމަށްފަހު ތެލީގެ މަތިޖަހައި ގިނިމަޑުކޮށްލާށެވެ. ދެން 15 މިނެޓެއް ހާއިރު އެގޮތަށް ބައިންދައިގެން ކައްކާލާށެވެ.

އުނދުން ނިވާލުމުގެ ކުރިން ރަހަބަލާލާފައި ކަމުދާގޮތަކަށް ރަހަ ހެޔޮވަރުކޮށްލާށެވެ. ފޮނި މަޑިއްޔާ ހަކުރު ކޮޅެއްވެސް އަޅާލާށެވެ.