މިއަދު ކުރިއަށްދާ ރައްޔިތުންގެ މަޖިލީހުގެ ގުރައިދޫ ދާއިރާގެ ބައި-އިލެކްޝަންގައި، ވޯޓުލާން ކަނޑައަޅާފައިވާ ވަގުތު ހަވީރު 5:00 ޖެހުމާއި ހަމައަށް އިތުރު ކުރުމުން ވޯޓު ގުނުން އޮންނަނީ ރޯދަ ވީއްލައިގެންކަމަށް އިލެކްޝަންސް ކޮމިޝަނުން ބުނެފިއެވެ.
އިލެކްޝަންސް ކޮމިޝަނުން ކުރިން ކަނޑައަޅާފައި އޮތީ ވޯޓްލުން ހެނދުނު 8:00 އިން ހަވީރު 4:00 ޖެހުމާއި ހަމައަށް ކުރިއަށްގެންދިއުމަށެވެ.
އިލެކްޝަންސް ކޮމިޝަނުން ބުނީ ވޯޓް ނެގުމަށް ހަމަޖެހިފައިވާ ވަގުތުގައި މޫސުން ގޯސްވުމުގެ ސަބަބުން ވޯޓުލާން ދާން ބައެއް މީހުންނަށް ދަތިވެފައިވާކަމަށެވެ. އެހެންކަމުން ވޯޓުލުމުގެ ވަގުތު ހަވީރު 5:00 އަށް އިތުރުކޮށްފައިވާކަމަށް އިލެކްޝަންސް ކޮމިޝަނުން ބުނެއެވެ.
އިލެކްޝަން ކޮމިޝަނުން ވަނީ ވަގުތު އިތުރު ކުރުމަށް ނިންމި ނިންމުމާއިއެކު، ވޯޓު ގުނުން މިއަދު ރޯދަ ވީއްލުމަށްފަހު ގުނަ ގޮތަށް ހަމަޖައްސާފައެވެ. އަދި ކޮންމެ ވޯޓުފޮއްޓެއްވެސް ގުނާ ގަނޑިއެއް ކަނޑައެޅާނީ އެފޮއްޓެއްގެ ވެރިއެކެވެ. ފޮށިތައް ގުނަން ފައްޓާނީ 6:46 ގައިކަމަށް މައުލޫމާތު ލިބިފައިވެއެވެ.
މި އިންތިޚާބުގެ ވޯޓުލުން ކުރިއަށްދަނީ ގުރައިދޫ ދާއިރާގައި ހިމެނޭ 3 ރަށްކަމަށްވާ ގުރައިދޫ، މާފުށި، ގުޅީގެ އިތުރުން މާލެ ސިޓީގައެވެ. މިއަދު ކުރިއަށްދާ ބައި އިލެކްޝަންގައި މައްސަލަތަކެއް ދިމާވެ، ނުވަތަ ހަމަނުޖެހުމެއް ހިންގުމުގެ އެއްވެސް ކަމެއް ހިނގާފައެއް ނުވެއެވެ. ވޯޓްލުން ކުރިއަށްދާ 4 ސަރަހައްދުގައިވެސް ވޯޓްލުން ކުރިއަށްދަނީ އަމާންކޮށެވެ.
