ފަތުރުވެރިންނާއި އަދި އަގްސާ މިސްކިތަށް ޒިޔާރަތްކުރާ ޔަހޫދީންނަށްވެސް މިހިނގާ ރަމަޟާންމަސް ނިމެންދެން ފަލަސްތީނުގެ ޖެރޫސެލަމްގައި ހުންނަ އަގްސާ މިސްކިތަށް ޒިޔާރަތްކުރުން އިސްރާއީލުން މަނާ ކޮށްފިއެވެ.
މުސްލިމުން ނޫން މީހުން އަގްސާ މިސްކިތަށް ޒިޔާރަތްކުރުން މަނާ ކޮށްފައިވާކަން ހާމަކޮށްފައިވަނި އިސްރާއީލުގެ ބޮޑުވަޒީރު ބެންޖަމިން ނަތަންޔާހޫގެ އޮފީހުން އަންގާރަދުވަހު ނެރުނު ބަޔާނެއްގައެވެ.
އިސްރާއީލުން ފާއިތުވި ހަފްތާގައި އަގްސާ މިސްކިތަށް ހަމަލާ ދިނުމާއި ގުޅިގެން ބޮޑެތި ހަމަނުޖެހުންތަކެއް ހިނގާ، ގާޒާއާއި ލުބުނާނު އަދި ސީރިއާއިންވެސް ވަނީ އިސްރާއީލަށް ރޮކެޓް ހަމަލާތައް އަމާޒު ކޮށްފައެވެ. މި ހަމަލާތަކުގެ ރައްދުގައި އިސްރާއީލުންވެސްވަނީ ގާޒާއާއި ލުބުނާނަށް އަދި ސީރިއާއަށްވެސް ރައްދުގައި މިސައިލް ހަމަލާތައް ދީފައެވެ.
މީގެ ކުރިން އާންމު ގޮތެއްގައި އިސްރާއީލުން އަގްސާ މިސްކިތަށް މުސްލިމުން ނޫން މީހުން ޒިޔާރަތްކުރުން މަނާކުރަނީ ހަމައެކަނި ރަމަޟާންމަހުގެ ފަހު ދިހައިގަ އެކަންޏެވެ.
މާތްވެގެންވާ އަލް އަގުސާ މިސްކިތް ހުންނަނީ އިރުމަތީ ޖެރޫސެލަމްގައެވެ. އިރުމަތީ ޖެރޫސެލަމް އިސްރާއީލުން ހިފާފައިވަނީ 1967 ވަނަ އަހަރުއެވެ. އެއަށްފަހު މިއީ އިސްރާއީލުގެ ބައެއްގެ ގޮތުގައި އެގައުމުން ކަނޑައަޅާފައި ވިނަމަވެސް، ބައިނަލް އަގުވާމީ ގޮތުން އިސްރާއީލުގެ މިނިންމުން ބަލައިގެންފައެއް ނުވެއެވެ.
އަލް އަޤްސާ މިސްކިތަކީ މުސްލިމުންގެ ތިންވަނައަށް އެންމެ މުޤައްދަސް ބިނާއެވެ. މި ބިނާގެ މިނިވަންކަން ދެމެހެއްޓުމަށް ވެވިފައިވާ އެއްބަސްވުމުގެ ދަށުން، މިސްކިތުގައި އަޅުކަން ކުރުމުގެ ފުރުސަތު އޮންނަގޮތަށް ހަމަޖެހިފައި އޮންނަނީ މުސްލިމުންނަށް އެކަންޏެވެ. އެހެންނަމަވެސް އިސްރާއީލުގެ ހައްދުފަހަނަ އަޅާފައިވާ ޔަހޫދީން މަސައްކަތް ކުރަމުންދަނީ މި އުސޫލު ބަދަލުކޮށް، މިސްކިތުގައި ޔަހޫދީންނަށްވެސް އަޅުކަން ކުރުމުގެ ފުރުސަތު ހޯދުމަށެވެ.
އެހެންނަމަވެސް އަލްޓްރާ އޯތޮޑޮކްސް ޔަހޫދީންގެ އިސް ރައްބީންވެސް ވަނީ މިސްކިތުގައި ޔަހޫދީން އަޅުކަން ކުރުމާއި ދެކޮޅު ހަދާފައެވެ.
ފަލަސްތީނުން ބުނަމުންދަނީ، މުސްލިން ނޫން މީހުންނަށް މިސްކިތުގައި އަޅުކަން ކުރުމުގެ ފުރުސަތު ދީފިނަމަ، މި މިސްކިތުގެ މިނިވަކަން ދެމެހެއްޓުމަށް ވެފައިވާ އުސޫލުތައް ބަދަލުވެ، އޭގެ ނަތީޖާއެއްގެ ގޮތުން ހައްދު ފަހަނައަޅާއި ކަނާތުފިޔައި ޔަހޫދީން މިސްކިތް ހުރި ތަނުގައި ޔަހޫދީންގެ ޓެމްޕްލްއެއް ބިނާކުރުމަށް ގޮވަމުންދާ ގޮވާލުންތަކަށް ބާރު ލިބިގެން ހިގައިދާނެ ކަމުގައެވެ.
އިސްރާއީލުގެ ކުރީގެ ބޮޑުވަޒީރު އެރިއެލް ޝެރޯން 2000 ވަނައަހަރު މިސްކިތް ހިމެނޭ ސަރަހައްދަށް ވަނުމާއެކު އުފެދުނު ހަމަނުޖެހުންތަކުގައި ފަލަސްތީނުގެ ދެވަނަ އިންތިފާޟާ ފެށިގެން ދިޔައެވެ.
