މާފުށީ ސިއްހީ މަރުކަޒު ހޮސްޕިޓަލަކަށް ބަދަލުކުރަން މިހަފްތާގައި ޓެންޑަރަށް ހުޅުވާލެވާލާނެކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު ވިދާޅުވެއްޖެއެވެ.
ހޮނިހިރު ދުވަހު އޮންނަ ގުރައިދޫ ދާއިރާގެ ބައި އިލެކްޝަންގެ އެމްޑީޕީ ކެނޑިޑޭޓް ޝާޒުގެ ކެމްޕެއިންގައި މާފުއްޓަށް ވަޑައިގެން އެރަށުގެ ރައްޔިތުންނާއި ވާހަކަ ދައްކަވަމުން ރައީސް ވިދާޅުވީ ރާއްޖޭގައި ލޯކަލް ޓުވަރިޒަމް އެންމެބޮޑަށް ކުރިއަރާފައިވާ އެއްރަށަކީ މާފުށިކަމަށެވެ. މާފުށީގައި ރަނގަޅު ސިއްޚީ ޚިދުމަތް ލިބޭނެ އިންތިޒާމު ހަމަޖެއްސުމަކީ ސަރުކާރުގެ އަމާޒެއް ކަމަށާއި، އެގޮތުން މާފުށީ ސިއްޚީ މަރުކަޒު ހޮސްޕިޓަލަކަށް ބަދަލު ކުރުމަށް ހަމަޖެހިފައިވާކަމަށެވެ.
ރައީސް ވިދާޅުވީ އެކަންވެސް މިއަހަރުގެ ބަޖެޓުގައި ހިމަނައި ކުރިއަށް އޮތް ދެތިން ދުވަހުގެ ތެރޭގައި ޓެންޑަރއަށް ހުޅުވާލެވޭނެ ކަމަށެވެ.
އަޅުގަނޑުމެން ވެރިކަމަށް އައިއިރު މި ރަށުގެ ސިއްހީ މަރުކަޒުގައި ދެވޭ ހިދުމަތް ވަރަށް މަދު. މިރަށުގައި ދިރިއުޅޭ ރައްޔިތުންނާއި ޗުއްޓީ ހޭދަކުރަން އައިސް ތިބޭ ގެސްޓުންގެ އިތުރަށް، ޖަލުގައި އުޅޭ މީހުންނަށް ސިއްހީ ހިދުމަތް ފޯރުކޮށްދިނުމަށްޓަކައި އެއަށް ވުރެ ރަނގަޅަށް ހިންގާ ހޮސްޕިޓަލަކަށް ބަދަލުކުރަންޖެހޭ.
– ރައީސް ވިދާޅުވިއެވެ.
ރައީސް ވިދާޅުވީ މިހާރު ވެސް ސިއްހީ މަރުކަޒަށް ބޮޑެތި ބަދަލުތަކެއް ގެނެސްފައިވާކަން ފާހަގަ ކުރައްވައި ރައީސް ސޯލިހު ވިދާޅުވީ މާފުށީ ސިއްހީ މަރުކަޒު ހޮސްޕިޓަލަކަށް ބަދަލުކުރުމަށްޓަކައި އެތަނުގައި އޮޕަރޭޝަން ތިއޭޓަރެއް ގާއިމުކުރަން ނިންމައި ބަޖެޓު ހަމަޖެއްސުމަށް ޕްލޭނިން މިނިސްޓްރީން ފިނޭންސް މިނިސްޓްރީ އަށް ފޮނުވާފައިވާ ކަމަށެވެ.
މީގެ އިތުރުން ރައީސް ވަނީ މާފުށީގައި ހުރި އެހެން ގިނަ މައްސަލަތައްވެސް ހައްލު ކޮށްދެއްވުމަށް ވައުދުވެ ވަޑައިގެންފައެވެ. ގުރައިދޫ ދާއިރާގެ މަޖިލިސް އިންތިޚާބު އަންނަ ހޮނިހިރު ދުވަހު ބޭއްވުމަށް ހަމަޖެހިފައިވާއިރު އިންތިޚާބާއި ދިމާކޮށް ސަރުކާރުން ނުފޫޒު ފޯރުވާކަމުގެ ކަންބޮޑުވުން އިދިކޮޅު ޕީޕީއެމްއިން ދަނީ ފާޅު ކުރަމުންނެވެ.
ކޮމެންޓު ފޮނުވާ