ސަރުކާރުން މަސްވެރިންނަށް ތަސައްލީ ހޯދާދިނުމަށް ކުރާމަސައްކަތަށް ޝުކުރުހައްގު ކަމަށް ރައްޔިތުންގެ މަޖިލީހުގެ އިހަވަންދޫ ދާއިރާގެ މެމްބަރު މުހައްމަދު ޝިފާއު ވިދާޅުވެއްޖެއެވެ.
މެމްބަރު ޝިފާއު މިހެން ވިދާޅުވީ މިފްކޯއިން ގަނތް މަސްކިރާ ބޯޓު "ޖަޒީރާ 103″ ރާއްޖެ އައުމާއި ގުޅިގެން ކުރެއްވި ޓުވީޓެއްގައެވެ. މެމްބަރު ޝިފާއު ވިދާޅުވީ މި ބޯޓާއިއެކު ރާއްޖޭގެ މަސްވެރިން މަސްކިރުވުމަށް ދިމާވެފައިވާ ދަތިތަކަށް އިތުރު ތަސައްލީއެއް ލިބިގެންދާނެކަމަށެވެ.
ސަރުކާރުން މަސައްކަތް ކުރަމުންދަނީ މަސްވެރިން ބާނާ މަހަށް ހަމަ އަގު ހޯދައި ދިނުމަށް ކަމަށް ޝިފާއު ވިދާޅުވިއެވެ. މިއީ އޭގެ ތެރެއިން މަސައްކަތެއްކަން ފާހަގަކޮށް ޝިފާއު ވިދާޅުވީ މަސްވެރިން ކުރާ މަސައްކަތަށް ލިބޭ ކޮންމެ ކުރިއެރުމަކީ މުޅި އިންޑަސްޓްރީއަށް ލިބިގެންދާނެ އިތުރު ކުރިއެރުމެއްކަމަށެވެ.
މިއުޅަނދުގެ ސަބަބުން މަސްވެރިން މަސްކިރުމަށް ދިމާވެފައިވާ ގޮންޖެހުންތަކަށް ލުޔެއްލިބި، ސަރުކާރުން މަސްވެރިންނަށް ފުރިހަމައަގު ހޯދާދިނުމަށް ކުރާ މަސައްކަތަށް ކުރިއެރުންތަކެއް ލިބިގެންދާނެކަން ޔަގީން. ސަރުކާރުން މަސްވެރިންނަށް ތަސައްލީ ހޯދާދިނުމަށް ކުރާމަސައްކަތަށް ޝުކުރުހައްގު.
– ޝިފާއު ވިދާޅުވިއެވެ.
މިފްކޯއަށް ދިމާވެފައިވާ މަސް ކިރުވުމުގެ މައްސަލަ ހައްލުކުރުމުގެ ގޮތުން އެ ކުންފުނިން އަންނަނީ ގިނަ މަސައްކަތްތަކެއް ކުރައްވަމުންނެވެ. އެގޮތުން މިފްކޯގެ މަސްކިރުމުގެ ކެޕޭސިޓީ އިތުރުކުރުމަށް ގެންނަ 4 ބޯޓުގެ ތެރެއިން ފުރަތަމަ ބޯޓު މިހާރު ވަނީ ރާއްޖެ އައިސްފައެވެ. މި ބޯޓު ރާއްޖެ އައިސްފައިވަނީ ކޮރެއާއިން ފުރައިގެން 16 ދުވަހުންނެވެ. މިއީ ޖަޕާނުގެ ޕޯލް އެންޑް ލައިން ވެސަލްއެކެވެ. މީގެކުރިންވެސް މިފްކޯއިން ވަނީ މަސްކިރުމަށް މީގެ ބޯޓެއް ގެންގުޅެފައެވެ.
މިފްކޯއިން ބުނީ ކުރިއަށްއޮތް ހަފްތާއެއްހާ ދުވަހުގެ ތެރޭގައި މި ބޯޓު ބޭނުންކުރަން ފެށޭވަރު ވާނެކަމަށެވެ. މަސްކިރުމުގެ ކެޕޭސިޓީ އިތުރުކުރުމަށް މިފްކޯއިން ގެންނަ އަނެއް 3 ބޯޓުވެސް މިހާރު ވަނީ ރަޖިސްޓްރީކޮށް ނިންމައި، ތައިލޭންޑުގައި ޑޮކުކޮށްފައެވެ. މި ބޯޓުތައްވެސް ވަރަށް އަވަހަށް ރާއްޖެ އަންނާނެކަމަށް އެ ކުންފުނިން ވިދާޅުވެއެވެ.
