ރޯދަމަހުގެ ދުވަސްތައް ހަލުވިކަމާއި އެކުގައި ކުރިއަށްދާއިރު މިއަދު އަޅުގަނޑުމެއް މަރުހަބާ މި ކިޔަނީ 7 ވަނަ ރޯދައަށެވެ. ފާއިތުވި ހަފްތާއެއްހާ ދުވަހުގައި ތަފާތު ގިނަ ބާވަތްތަކެއް ސުފުރާމަތިން މިހާރުވެސް ވާނީ ފެނިގެން ގޮސްފައި ކަމާއި މެދުގައި ޝައްކެއް ނެތެވެ.

މިއަދަކީވެސް ސުކޫލާއި އޮފީސްތައް ހުޅުވާފައި ހުންނަ ދުވަހެއް ކަމުން މިއަދުވެސް މި ގެނެސްދެނީ ވަރަށް ފަސޭހައިން ކުޑަ ވަގުތު ކޮޅެއްގެ ތެރޭގައި ތައްޔާރު ކޮށްލެވިދާނެ ބާވަތަކެވެ. މިއަދު މި ގެނެސްދނީ އޮމްލެޓް ކޭސެޑިއާ އެވެ.

ބޭނުންވާނެ ތަކެތި: 

2 ބިސް

1/4 ޖޯޑު ފިޔާ (ޑައިސްކޮން ކޮށާފައި)

2 މޭޒުމަތީ ސަމްސާ ކޮރިއަންޑާ (ކުދިކޮން ކޮށާފައި)

1 ތިޅި މިރުސް (ކުދިކޮން ކޮށާފައި)

1/4 ސައި ސަމުސާ ރީދޫ

1/4 ސައިސަމުސާ ޗިލީ ޕައުޑަރު

1/4 ސައިސަމުސާ ދިރި އަދި އަސޭމިރުސް

1/4 ސައިސަމުސާ ގަރަމް މަސާލާ

1/4 ސައިސަމުސާ ލޮނު

1/4 ސައި ސަމުސާ ލޮނުމެދު ޕައުޑައު

1 ފަރާޓާ

2 މޭޒުމަތީ ސަމުސާ ތެޔޮ

ތައްޔާރު ކުރާނެ ގޮތް:

އެންމެ ފުރަތަމަ ތައްޓަކަށް ދެބިސް އަޅައިލާށެވެ. ދެން ފަރާޓާ އަދި ތެޔޮ ފިޔަވާ  ބާކީ ހުރި ހުރިހާ އެއްޗެއް ބިހުގެ ތެރެއަށް އަޅައި ރަނގަޅަށް އެއްކޮށްލާށެވެ. ތަތް ނުލަވާ ތަވާއެއް އުދުން މައްޗަށް އުދާށެވެ. އެއަށް ފަހު ފަރާޓާ ފިހެލާށެވެ. ފިހެވުމުން ނަގާށެވެ. އެއަށް ފަހު ހަމަ އެ ތަވައަށް ތެޔޮފޮދު އަޅައިލާށެވެ. އަދި ތައްޔާރު ކުރި ބިސް އަޅައިގެން ބިސްގަނޑެއް އަޅައިލާށެވެ.

ބިސްގަނޑު ފިހެވުމުން އޭގެ މައްޗަށް ފަރާޓާ ލާށެވެ. އަދި ބޭނުން ނަމަ ސޯސް ކޯޅެއް އަޅައި ފައް ޖަހާލާށެވެ. ނޫން ނަމަ އޮތްގޮތަށް ފައް ޖަހާލާށެވެ. މިހާރު ހުންނާނީ އޮމްލެޓް ކޭސެޑިއާ ތައްޔާރު ވެފައެވެ. ބޭނުންނަމަ ސޯސް އާއެކު ސާވް ކުރާށެވެ.