ކޯން ފްލާ ބޯކިބާ ނުވަތަ ކުޑަކުދިންގެ މެދުގައި މަޝްހޫރު ހެލޭ ހެލޭ ބޯކިބާ އަކީ ވެސް ޒަމާނުން ސުރެ ދިވެހިންގެ މެދުގައި މަގުބޫލު އެއްޗެކެވެ. މި ބޯކިބަލަކީ ޒަމާނުން ސުރެ އެކި ގޮތް ގޮތަށް ތައްޔާރު ކުރަމުން އައި އެއްޗެއް ކަމަށް ވެއެވެ.

މި ބޯކިބަލަކީ ވަރަށް މީރު ޑެޒާޓެއްގެ ގޮތުގައިވެސް ބޭނުން ކުރެވޭނެ އެއްޗެކެވެ. މީ ކުޑަކުދިންގެ މެދުގައި ވަރަށް މަގުބޫލު އެއްޗެކެވެ. އަދި އުމުރުން ދުވަސް ވީ މީހުންގެ މެދުގައިވެސް ވަރަށް މަޝްހޫރު އެއްޗެކެވެ.

ބޭނުން ވާނެ ތަކެތި: 

4 ޖޯޑު ފެން

6 އިންޗީގެ 4 ރަނާބާ ފަތްކޮޅު

3 އިންޗީގެ ދެ ފޮނިތޮށި ކޮޅު

12 ކާފުރު ތޮޅި

1/2 ޖޯޑު ހަކުރު

2/3 ޖޯޑުގެ ކޯން ފްލާ

1 ޖޯޑު ކާށި ކިރު

3 މޭޒުމަތީ ސަމުސާ ރޯސްވޯޓަރ

ތައްޔާރު ކުރާނެ ގޮތް: 

އެންމެ ފުރަތަމަ 4 ޖޯޑު ފެން ތެއްޔަކަށް އެޅުމަށްފަހު އުދާށެވެ. ފެން ކެކެން ފެށުމުން ރާނބާ ފަތް، ފޮނި ތޮށި އަދި ކާފޫރު ތޮޅި އަޅައި ރަނގަޅަށް ކައްކައިލާށެވެ. 3 މިނިޓެއްހާ އިރު ރަނގަޅަށް ކައްކާލުމަށްފަހު އެހެން ތެއްޔަކަށް ފުރާނާލާށެވެ. މިހާރު ހުންނާނީ ކުރިން އަޅައިގެން ކެއްކި އެއްޗެހީގެ ރަހަގަނޑު ފެންގަޑުގައި ހިފާފައެވެ. އެފެން ގަނޑު އަލުން އުދުމަށްފަހު އެ ފެންގަޑު ދެބައިކޮށް އެއްބަޔަށް ހިނދުމުން ހަކުރާއި ކާށިކިރު އަޅާލުމަށްފަހު އުދުން މަޑު ކޮށްލާށެވެ. ހުރިހާ އެއްޗެއް ރަނގަޅަށް އެއްކޮށްލުމަށްފަހު ނިންވާލާށެވެ.

އެއަށްފަހު ރޯސްވޯޓަރ ކޮޅު އަޅައި އެއްކޮށްލާށެވެ. ދެން މަޑުމަޑުން ކޯންފްލާ އެއްކުރަމުން ހާކަމުން ދާށެވެ. އެއްވެސް ވަރަކަށް ލަމްބަސް ނާންނެހެން އެއްކުރަމުން ގޮސް ހިކެންދެން އެއްކުރާށެވެ. އެއަށްފަހު ޓްރޭއަކަށް އެއް ހަމައަކަށް އެޅުމަށްފަހު ބޭނުން ނަމަ ފިނި ކޮށްލާށެވެ. އޭރުން ހުންނާނީ ކޯންފްލާ ބޯކިބާ ތައްޔާރު ވެފައެވެ.