ކުރިއަށް އޮތް މޭމަހުގައި މޯލްޑިވްސް ސޮސައިޓީ ފޯރ ޕާފޮމިން އާޓްްސް (އެމް.އެސް.ޕީ.އޭ) ފަރާތުން، އެކްޓިން ވޯކްޝޮޕް އެއް ބާއްވަން ނިންމައި އެކަން އިއުލާން ކޮށްފިއެވެ.
މި ވޯކްޝޮޕް އަކީ އެމް.އެސް.ޕީ.އޭ އާއި ނޭޝަނަލް ސެންޓަރ ފޮރ ދި އާރޓްސް (އެން.ސީ.އޭ) އާއި ގުޅުގެން ބާއްވާ ވޯކްޝޮޕްއެކެވެ. އެކްޓިންގް ފޮރ ފިލްމް އެންޑް ތިއޭޓަރ ވޯކްޝޮޕް ކުރިއަށް ދާނީ މެއި މަހުގެ 12 އިން ޖޫން މަހުގެ 06 ގެ ނިޔަލަށެވެ.
އެކްޓިންގް ފޮރ ފިލްމް އެންޑް ތިއޭޓަރ ވޯރކްޝޮޕްކީ 2022 ވަނަ އަހަރު ބޭއްވުމަށް ކަނޑައަޅާ އިޢުލާނުކޮށްފައިވާ ވޯރކްޝޮޕެކެވެ. ނަމަވެސް ދިމާވި އެކި އެކި ސަބަބު ތަކާ ހުރެ މި ވޯކްޝޮޕް ވަނީ ބޭއްވޭގޮތް ނުވެފައިއެވެ. ނަމަވެސް އަނެއްކައިވެސް މި ވޯރކްޝޮޕް ބޭއްވުމަށް ނިންމައި އެކަން އާއްމުކޮށް އިޢުލާނުކޮށްފައިވަނީ މިމަހު 17 ވަނަ ދުވަހަށެވެ.
މި ވޯކް ޝޮޕްގެ މަގުސަދަކީ ފިލްމީ ދާއިރާގައި މަސައްކަތް ކުރާނެ ތަޖުރިބާ ކާރު ބަޔަކު އުފެއްދުމެވެ. ފިލްމީދާއިރާގައި، ޚާއްސަކޮށް ކެމެރާގެ ކުރިމަތީގައި މަސައްކަތްކުރާނެ އެކްޓަރުން އުފެއްދުމާއި އަދި މިހާރުވެސް އެކްޓިންގެ ދާއިރާއަށް އަލަށް ނުކުމެ އުޅޭ ފަރާތްތަކަށް ފުރިހަމަ ތަމްރީނު ލިއްބައިދުނުމުގެ މަޤުސަދުގައި އެކަމަށް ބޮޑަށް އަލިއަޅުވައިލާ މި ވޯކްޝޮޕް ކުރިއަށް ގެންދާނެއެވެ.
އެކްޓިންގް ފޮރ ފިލްމް އެންޑް ތިއޭޓަރ ވޯރކްޝޮޕްގައި ބައިވެރިވުމުގެ ފުރުސަތު ވަނީ މާރޗް މަހުގެ 17 އިން ފެށިގެން ހުޅުވާލާފަ އެވެ. ބައިވެރި ވުމުގެ އެންމެ ފަހު މުއްދަތަކީ އޭޕްރީލް މަހުގެ 30 ވަނަ ދުވަހުގެ ނިޔަލަށެވެ.
މި ވޯކްޝޮޕްގައި ބައިވެރިވުމުގެ ފީއަކީ -/500 ރުފިޔާ ކަމަށް އެމްއެސްޕީއޭ އިން ހާމަކޮށްފައިވެއެވެ. މި ވޯކްޝޮޕްގައި ހިމެނެނީ 25 ޖާގައެވެ. މި ވޯރކްޝޮޕްގައި ބައިވެރިވާން ބޭނުންވާ ފަރާތްތަކުން ފުރިހަމަ ނަމާއި އެޑްރެސް، އައި.ޑީ ކާޑް ނަމްބަރ އަދި ގުޅޭނެ ނަންބަރު ޖަހާފައި 7727264 އަށް ވައިބަރ ނުވަތަ ވަޓްސްއަޕް ކޮށްލުމުން ރެޖިސްޓްރީކޮށްލެވޭނެ އެވެ.
