ޔޫކުރެއިންގައި އިންސާނިއްޔަތާ ޚިލާފް ޖަރީމާތައް ހިންގިކަމުގެ ތުހުމަތުގައި، ރަޝިއާގެ ރައީސް ލާޑީމިރު ޕުޓިން ހައްޔަރު ކުރުމުގެ އަމުރު ބައިނަލްއަގުވާމީ ޖިނާޢީ ކޯޓުން ނެރެފިއެވެ.

ބައިނަލްއަގުވާމީ ޖިނާޢީ ކޯޓުން ޕުޓިން ހައްޔަރު ކުރުމަށް ނެރުނު އަމުރުގައި އޭނާގެ އިތުރުން ރަޝިއާގެ އިތުރު އެހެން އިސް އޮފިޝަލަކުވެސް ހައްޔަރު ކުރުމަށް ވަނީ އަމުރު ކޮށްފައެވެ. އެ އޮފިޝަލަކީ ޕުޓިންގެ ސަރުކާރުގެ މެމްބަރެއް ކަމުގައިވާ މާރިއާ ލަވޯވާއެވެ. ޕުޓިންގެ ސަރުކާރުގައި އޭނާގެ މަގާމަކީ ރައީސްގެ އޮފީހުގެ "ކޮމިޝަނަރ އޮފް ޗިލްޑްރެންސް ރައިޓްސް" އެވެ.

ކޯޓުން ތުހުމަތު ކޮށްފައިވަނީ ޔޫކުރެއިން ގަދަކަމުން އެތައްހާސް ކުޑަކުދިން ރަޝިއާއަށް ހިޖުރަ ކުރުމަށް މަޖުބޫރުކޮށް ޚާއްސަ ސްކީމެއް ޕުޓިންއާއި މާރިއާ ލަވޯވާ ހިންގި ކަމުގެ ތުހުމަތެވެ. ކޯޓުގެ އަމުރުގައި ބުނެފައިވަނީ، ގާނޫނާއި ޚިލާފަށް މީހުން (ކުޑަކުދިން) ޑިޕޯޓު ކުރުމާއި، އަދި މީހުން (ކުޑަކުދިން) ގާނޫނާއި ޚިލާފަށް ޔޫކުރެއިންގެ ހިފާފައިވާ ސަރަހައްދުތަކުން ރަޝިއާއަށް ބަދަލު ކުރުމުގެ ޒިންމާ ޕުޓިންއާއި މާރިއާ ލަވޯވާ އުފުލަން ޖެހޭނެ ކަމަށެވެ.

ޔޫކުރެއިން ހަނގުރާމަ މީގެ އެއް އަހަރުކުރިން ފެށުނުފަހުން، ހުޅަނގުގެ ގައުމުތަކުން ދަނީ ރަޝިއާއިން ޔޫކުރެއިންގައި އިންސާނިއްޔަތާއި ޚިލާފް ޖަރީމާތައް ހިންގަމުންދާކަމުގެ ތުހުމަތު ކުރަމުންނެވެ.

ބައިނަލްއަގުވާމީ ޖިނާއީ ކޯޓުން ހުކުރު ދުވަހު ބުނެފައިވަނީ އެކޯޓުގެ އަމުރުގައި ބަޔާން ކޮށްފައިވާ ކުށް ކުރުމުގައި، ރަޝިއާގެ ރައީސް އަމިއްލަފުޅު ހައިސިއްޔަތުން ޒިންމާ އުފުއްލަވަން ޖެހޭކަމަށް ޔަގީން ކުރެވޭވަރުގެ ހެކިތައް ހުރި ކަމުގައެވެ. އަދި ހައްޔަރު ކުރުމަށް އަމުރު ނެރެފައިވާ ދެ ފަރާތަކީވެސް އެމީހުންގެ އަމުރު މައުރޫފުގެ ދަށުގައިވާ ފަރާތްތައް މެދުވެރިކޮށް ކުށް ކޮށްފައިވާ ފަރާތްތައް ކަމަށާއި، ޕުޓިންގެ އަމުރު މައުރޫފުގެ ދަށުގައިވާ މަދަނީ ފަރާތްތަކާއި އަދި އަސްކަރިއްޔާ މެދުވެރިކޮށް، އިންސާނިއްޔަތާއި ޚިލާފް ޖަރީމާތައް ހުއްޓުވުމަށް އެކަށީގެންވާ މަސައްކަތައް ކޮށްފައިވެސް ނުވާކަމުގެވެ.

މިއީ ޔޫކުރެއިން ހަނގުރާމަ ފެށުމުގެ ފަހުން ބައިނަލްއަގުވާމީ ކޯޓުން ކުރަމުންދިޔަ ތަހުގީގުތަކަށްފަހު އެކޯޓުން އަދި މިހާތަނަށް ނެރެފައިވާ މިފަދަ ފުރަތަމަ އަމުރެވެ.

ރަޝިއާއިން ކުރިން ބުނެފައިވަނީ އެކޯޓުގެ އެއްވެސް އަމުރަކަށް އެގައުމުން ކިޔަމަން ނުވާނެ ކަމުގައެވެ.