އެޑްވާންސްޑް ޑިޕްލޮމާ އިން ނާސިން ސްކޮލާޝިޕުތަކެއް އޭޑީކޭ ހޮސްޕިޓަލުން ހެލްތު މިނިސްޓްރީއަށް ދީފިއެވެ.
އޭޑީކޭ ހޮސްޕިޓަލްގައި ހުންނަ ޝާފިޔާ އިންސްޓިޓިއުޓްގައި ބޭއްވި ރަސްމިއްޔާތެއްގައި ސްކޮލާޝިޕުތައް މިނިސްޓްރީއަށް ދެއްވީ ޝާފިޔާ އިންސްޓިޓިއުޓްގެ ޑިރެކްޓަރު ޑރ. އަހުމަދު ޒިޔާންއެވެ. ސްކޮލާޝިޕުތަކާއި މިނިސްޓްރީގެ ފަރާތުން ހަވާލުވެލެއްވީ ޕާމަނަންޓް ސެކެޓްރީ އާއިޝަތު ސާމިޔާއެވެ.
މިއީ ރާއްޖޭގައި ސިއްހީ ހިދުމަތްދޭ ހޮސްޕިޓަލަކުން މިފަދަ ކޯހެއް ހިންގާ ފުރަތަމަ ފަހަރެވެ. ކޯހުގެ ފުރަތަމަ އިންޓޭކަށް 15 ކުދިންނާއި 20 ކުދިންނާ ދެމެދުގެ އަދަދަކަށް ކުދިން ނަގާނެއެވެ. ސިއްހީ ދާއިރާއިން މީހުން ތަމްރީނުކުރުމުގެ ގޮތުން ފެށުމަށް ހަމަޖެހިފައިވާ އެޑްވާންސްޑް ޑިޕްލޮމާ އިން ނާސިން ސްކޮލާޝިޕުން ތިން ފުރުސަތު ދީފައިވަނީ ހެލްތު މިނިސްޓްރީއަށެވެ. ސްކޮލާޝިޕުން ފަސް ފުރުސަތު ދޭނީ ޝާފިޔާ އިންސްޓިޓިއުޓުންނެވެ.
ސްކޮލާޝިޕަށް ކުރިމަތިލާ ދަރިވަރަކީ ޖީސީއީ އޯލެވެލްގެ ތިން މާއްދާއިން ދަށްވެގެން ސީ ފާސް ލިބިފައިވާ އަދި ޖީސީއީ އޭލެވެލް ދެ މާއްދާއިން ފާސްވެފައިވާ ދަރިވަރަކަށް ވާންޖެހެއެވެ. ނުވަތަ މޯލްޑިވްސް ނާސިން ކައުންސިލުން ގަބޫލުކުރާ ލެވެލް ހަތަރެއްގެ ސަނަދެއް ހާސިލުކޮށް ޖީސީއީ އޯލެވެލްގެ އިނގިރޭސި މާއްދާއިން ދަށްވެގެން ސީ ފާސް ނުވަތަ އެ ފެންވަރުގެ އެހެން ސެޓިފިކެޓެއް އިނގިރޭސި މާއްދާއިން ހޯދާފައިވާ ދަރިވަރަކަށް ވާންޖެހެއެވެ.
Scholarship Awarding Ceremony held today at @ShafiaInstitute to handover 3 scholarships of Advanced Diploma in Nursing to @MoHmv #ShafiaInstituteofHealth #ADK35 pic.twitter.com/dboNVR7W7K
— ADK Hospital (@ADKHospital) March 14, 2023
އޭޑީކޭ ހޮސްޕިޓަލުން ބުނި ގޮތުގައި ސްކޮލާޝިޕުން ފުރުސަތު ލިބޭނީ އެންމެ ފެންވަރު ރަނގަޅު ކުދިންނަށެވެ. ކޯސް ފުރިހަމަކުރާ ދަރިވަރުންނަށް އޭޑީކޭއިން ވަޒީފާގެ ފުރުސަތު ކަށަވަރުވާނެ ކަމަށްވެސް އެ ހޮސްޕިޓަލުން ވަނީ ބުނެފައެވެ. އޭޑީކޭ ހޮސްޕިޓަލުން ބުނި ގޮތުގައި ތިން އަހަރު ދުވަހަށް ކުރިއަށް ގެންދާ ކޯހުގެ އަގަކީ 96،500 ރުފިޔާއެވެ. ފަސޭހައިން ފައިސާ ދެއްކޭނެ އިންތިޒާމު ހަމަޖެއްސުމަށްޓަކައި މަހުން މަހަށް ބަހާލައިގެން ފައިސާ ދެއްކޭނެ އިންތިޒާމު ވަނީ ހަމަޖައްސާފައެވެ.
ސްކޮލާޝިޕުގައި ބައިވެރިވުމަށް ފުރަންޖެހޭ ފޯމު އޭޑީކޭ ހޮސްޕިޓަލުގެ ވެބްސައިޓް އާއި ހޮސްޕިޓަލުގެ އެޑްމިން އޮފީހުން ލިބެން ހުންނާނެއެވެ.
