ގުރައިދޫ ދާއިރާއަށް ކުރިމަތިލީ، ޕީޕީއެމް، އެމްޑީޕީ، އެމްއެންޕީން

ރައްޔިތުންގެ މަޖިލީހުގެ ހުސްވެފައިވާ ގުރައިދޫ ދާއިރާއަށް ކުރިމަތިލުމަށް ހުޅުވާލި މުއްދަތުގައި ކުރިމަތިލާފައިވަނީ ތިން ކެނޑިޑޭޓަކު ކަމަށް އިލެކްޝަންސް ކޮމިޝަނުން ބުނެފިއެވެ.

ގުރައިދޫ ދާއިރާގެ މެންބަރުކަމުގައި 3 ދައުރުގައި ހުންނެވި އިބްރާހީމް ރިޒާ ކެންސަރުގެ އާލާސްކަންފުޅެއްގައި މިދިޔަ މަހުގެ 23 ވަނަ ދުވަހު އަވަހާރަ ވުމާއި ގުޅިިގެން ވަނީ ކުރިމަތިލުމަށް ހުޅުވާލާފައެވެ. ރިޒާ އަވަހާރަވުމާއި ގުޅިގެން ގުރައިދޫ ދާއިރާގެ ބައި-އިލެކްޝަން އަންނަ އޭޕްރީލް މަހުގެ 15ގައި ބާއްވަން އިލެކްޝަންސް ކޮމިޝަނުން ވަނީ ނިންމާފައެވެ. އަދި އިންތިޚާބުގައި ވާދަކުރުމުގެ ފުރުޞަތު މިމަހުގެ 13އާއި ހަމައަށް ވަނީ ހުޅުވާލާފައެވެ.

މިއަދު މުއްދަތު ހަމަވިއިރު ކުރިމަތި ލާފައިިވަނީ އެމްޑީޕީންނާއި، ޕީޕީއެމް އަދި އެމްއެންޕީންނެވެ. މިދާއިރާއަށް އެމްޓީޑީން ވާދަކުރާނެކަމަށް ބުނި ނަމަވެސް އެޕާޓީން ކުރިމަތިލުމަށް ފޯމު ހުށަހަޅާފައި ނުވެއެވެ.

ކުރިމަތިލާފައިވާ ކެނޑިޑޭޓުން:

1. ޙުސައިން ރިޒާ، ޕީޕީއެމް
2. މުހައްމަދު ޝާޒު، އެމްޑީޕީ
3. އަލީ އާރިފް، އެމްއެންޕީ

މިބައި އިލެކްޝަނަކީ އެމްޑީޕީއާއި، ދިއިކޮޅު ޕީޕީއެމްއަށްވެސް އަދި މި އިންތިޚާބުގައި ވާދަކުރާ އެމްއެންޕީއަށްވެސް މުހިންމު ބައި އިލެކްޝަނެކެވެ. އެއް ސަބަބަކީ، މި އިންތިޚާބު ކާމިޔާބު ނުކުރެވިއްޖެނަމަ، ރައްޔިތުންގެ މަޖިލިހުގައި އިދިކޮޅުން ފުރަމުން އައި ގޮނޑިތަކުގެ ތެރެއިން އެއް ގޮނޑި އެޕާޓީއަށް ގެއްލިގެން ދާނެތީއެވެ. އަދި ކުރިޔަށް އޮތް ރިޔާސީ އިންތިޚާބުގެ ކުރިން އެޕާޓީއަށް އޮތް ތާއީދު މި އިންތިޚާބުގެ ޒަރިއާއިން ވަޒަން ކޮށްލުމުގެ ފުރުސަތު ލިބިގެން ދާނެތީވެސްމެއެވެ.

ހަމަ އެއާއެކު، އެމްއެންޕީއަކީވެސް ކުރިޔަށް އޮތް ރިޔާސީ އިންތިޚާބުގައި ވާދަކުރާނެކަމަށް އިއުލާން ކޮށްފައިވާ ޕާޓީއަކަށް ވާއިރު، މި އިންތިޚާބު އެޕާޓީއަަށް ކާމިޔާބު ކުރެވިއްޖެނަމަ އެއީ އެޕާޓީގެ ސިޔާސީ ހަޔާތުގައި މިހާތަނަށް ލިބިގެންދާނެ އެންމެ ބޮޑު ކާމިޔާބީއަށް ވެގެން ދިއުމުގެ އިތުރުން، އެފަދަ ކާމިޔާބީއެއް ވެގެންދާނީ ރިޔާސީ އިންތިޚާބުގައި ރަގަޅު ކާމިޔާބީއެއް ނެރުމަށް އެޕާޓީއަށް ލިބިގެންދާނެ ވަރަށްވެސް ބޮޑު ހިތްވަރެއް ކަމުގައެވެ.

އެހެންކަމުން، ކުރިޔަށް އޮތް މަޖިލިސް ބައި އިލެކްޝަންވެސް ވެގެންދާނީ، ސިޔާސީ ވަރުގަދަ، ގަދަ ހިފުމަކަށް ކަމުގައި ގަބޫލުކުރާން ޖެހެއެވެ. އަދި ފާއިތުވެދިޔަ ބައި އިލެކްޝަންތަކާއި ޚިލާފަށް، މި ބައި އިލެކްޝަންއަކީ، އިންތިޚާބުގައި ވާދަކުރާ 3 ކެނޑިޑޭޓުންގެ އިތުރުން، އެމްޑީޕީގެ "ފިކުރެއްގެ ދިރުން" ސިޔާސީ ހަރަކާތްވެސް ހިމެނޭގޮތުން، ސިޔާސީ 4 ފަރާތެއްގެ ގަދަ ހިފުމަކަށް ވެގެންދިއުމަކީ އެކަށީގެންވާ ކަމެކެވެ.