ދިވެހިރާއްޖެއިން ފަލަސްތީނަށް ކަނޑައެޅުއްވި ނޮން ރެސިޑެންސް ސަފީރު، މުހައްމަދު ޚަލީލް، ފަލަސްތީނުގެ ރައީސް މަހުމޫދު އައްބާސަށް މަގާމުގެ ފަތްކޮޅު އަރުވައިފިއެވެ.
އައްބާސަށް މަގާމުގެ ފަތްކޮޅު އެރުވުމުގެ ރަސްމިއްޔާތު ބޭއްވުނީ އުރުދުންގައި ހުންނަ ފަލަސްތީނު އެމްބަސީގައި ބުދަ ދުވަހުއެވެ. ފަތްކޮޅު އެރުވުމަށްފަހު ވާހަކަ ދައްކަވަމުން ފަލަސްތީނުގެ ރައީސް މަހުމޫދު އައްބާސްވަނީ ސަފީރު ޚަލީލަށް މަރުހަބާ ވިދާޅުވެ، އަދި ކާމިޔާބީއަށްވެސް އެދިވަޑައިގަނަންނަވާކަމަށް ވިދާޅުވެފައެވެ.
މި ރަސްމިއްޔާތުގައި ސަފީރު ޚަލީލްވަނީ، ރައީސް ސާލިހުއާއި އަދި ދިވެހި ރައްޔިތުންގެ ފަރާޓުން ފަލަސްތީނުގެ ރައްޔިތުންނަށާއި ސަރުކާރަށް މުބާރިކުބާދީ އަރިސްކުރައްވާ، ދިވެހިރާއްޖެ އަބަދުވެސް ފަލަސްތީނުގެ މިނިވަންކަމަށް ތާއީދު ކުރުންމަތީ ދެމި އޮންނާނޭކަމުގެ ޔަގީންކަން ފަލަސްތީނުގެ ރައީސް މަހުމޫދު އައްބާސްއަށް އަރުވާފައެވެ.
އަދި މި ރަސްމިއްޔާތުގައި ޚަލީލުވަނީ، 1967ގެ ކުރިން އެކަށައަޅާފައިވާ ބޯޑަރުތަކާއި އެއްގޮތަށް، ޖެރޫސެލަމް ވެރިރަށެއްގެ ގޮތުގައި، ފަލަސްތީނުގެ މިނިވަން ދައުލަތެއް ގާއިމް ކުރުމަށް ދިވެހިރާއްޖެއިން އަބަދުވެސް ތާއީދު ކުރާނެކަމުގެ ޔަގީންކަންވެސް ފަލަސްތީނުގެ ރައީސް މަހުމޫދު އައްބާސްއަށް އަރުވާފައެވެ.
މި ބައްދަލުވުމުގައި ފަލަސްތީނުގެ ރައީސް މަހުމޫދު އައްބާސްވަނީ، ރާއްޖެއިން އަބަދުވެސް ފަލަސްތީނާއެކު ބާއްވަމުންދާ ގާތް ގުޅުން ފާހަގަކޮށް، ރައީސް ސާލިހަށް ޝުކުރު އަދާކުރައްވާފައެވެ.
މިއީ ދިވެހިރާއްޖެއިން ފަލަސްތީނަށް ސަފީރަކު ކަނޑައެޅުއްވި ފުރަތަމަ ފަހަރެވެ. ފަލަސްތީނާއި ދިވެހިރާއްޖެއާދެމެދި ސިޔާސީ ގުޅުން ގާއިމް ކުރެވުނޫ 4 އެޕްރިލް 1982 ގައެވެ.
