2023 ވަނަ އަހަރަށް ރައްޔިތުންގެ މަޖިލިހުން ފާސްކުރި ބަޖެޓްގައި، ގެއްލުމުގެ ބަދަލު ދިނުމަށް ބަޖެޓް ކުރިން 101.2 މިލިއަން ރުފިޔާގެ ބޮޑުބައި މިއަހަރު ފެށުމާއެކު ސަރުކާރުން ހޭދަކޮށްފައިވާކަން ހާމަވެއްޖެއެވެ.
މިކަން ހާމަވެފައިވަނީ އެންމެ ފަހުން ފިނޭންސް މިނިސްޓްރީން ހާމަކޮށްފައިވާ ތަފާސް ހިސާބުތަކުންނެވެ. މިގޮތުން ފިނޭންސް މިނިސްޓްރީން އާންމު ކޮށްފައިވާ ތަފާސް ހިސާބުތަކުން ދައްކާ ގޮތުގައި، މިއަހަރު ފާއިތުވި ދޮޅު މަސްދުވަހުގެ ތެރޭގައި، މިމަހުގެ 09 ވަނަ ދުވަހުގެ ނިޔަލަށް 92.6 މިލިއަން ރުފިޔާ ސަރުކާރުންވަނީ އެކިފަރާތްތަކަށް ގެއްލުމުގެ ބަދަލުގެ ގޮތުގައި ދީފައެވެ.
އެހެންނަމަވެސް ގެއްލުމުގެ ބަދަލުގެ ގޮތުގައި ސަރުކާރުން ބޮޑެތި އަދަދުތަކުން ފައިސާ ދީފައިވަނީ ކޮން ފަރާތްތަކަކަށް ކަމެއް އަދި ސާފުވެފައެއް ނުވެއެވެ.
ފާއިތުވެދިޔަ ތަނުގައިވެސް ސަރުކާރުންވަނީ ބަދަލުގެ ގޮތުގައި ބައެއް ފަރާތްތަކަށް ބޮޑެތި އަދަދުތަކުން، ދައަލަތުގެ މާލިއްޔަތުން ފައިސާ ދޫކޮށްފައެވެ. އޭގެތެރޭގައި، ރައީސް ސާލިހުގެ ވެރިކަން ފެށުނުތަނާ ކަހަލަ ގޮތަކަށް، 2019ވަނަ އަހަރު ސަރުކާރުން ވަނީ ބަދަލުގެ ގޮތުގައި ނޫމަޑި ކުންފުންޏަށް 55 މިލިއަން ޑޮލަރު ދޫކޮށްފައެވެ.
ގެއްލުމުގެ ބަދަލު ދިނުމުގައި އެކައުންޓެބިލީ ނެތްކަމަށް ބުނެ އޭސީސީން މީގެ ކުރިންވަނީ ސަރުކާރަށް ފާޑުވެސް ކިހާޔަފައެވެ. އެއާއެކު، ސަރުކާރުގެ ކުރީކޮޅު ބައެއް ފަރާތްތަކަށް ގެއްލުމުގެ ބަދަލު ދީފައިވަނިކޮށް، ސަރުކާރުންވަނީ ބަދަލު ދިނުމުގެ ކަންކަން ބެލެހެއްޓުމަށް ޚާއްސަ ކޮމިޓީއެއްވެސް ފަހުން އުފައްދާފައެވެ.
އިދިކޮޅު ފަރާތްތަކުން ތުހުމަތު ކުރާ ގޮތުގައި، ގެއްލުމުގެ ސަރުކާރުން ދެމުންދަނީ، ސަރުކާރުގެ އިސް ބައެއް ފަރާތްތަކުގެ މަސްލަހަތު ހިމެނޭ ގޮތަށެވެ.
