މިމަހުގެ 28 ވަނަ ދުވަހު ބޭއްވުނު އެމްޑީޕީގެ ރިޔާސީ ޕްރައިމަރީ ކާމިޔާބު ކުރެއްވި، އެޕާޓީގެ އިސް ލީޑަރު، އަދި ރައީސުލްޖުމްހޫރިއްޔާ އިބުރާހިމް މުހައްމަދު ސާލިހާއި ރަސްމީކޮށް ރިޔާސީ ޓިކެޓް ހަވާލުކުރުން އަންނަ މަހުގެ މެދުތެރޭގައި އޮންނާނެކަން އެމްޑީޕީން ހާމަ ކޮށްފިއެވެ.

އެމްޑީޕީގެ ރިޔާސީ ޕްރައިމަރީގެ ވަގުތީ ނަތީޖާ އިއުލާންކޮށް، އަދި ވޯޓުލުން ކުރިޔަށް ދިޔަގޮތާއި ގުޅޭގޮތުން ނޫސްވެރިންނަށް މައުލޫމާތު ދިނުމަށް ބޭއްވުނު ނޫސްވެރިންގެ ބައްދަލުވުމުގައި ވާހަކަ ދައްކަވަމުން އެ ޕާޓީގެ ޑެޕިއުޓީ ޗެއާޕާސަން އިބްރާހިމް ވަހީދު ވިދާޅުވީ، ކުރިޔަށް އޮތް 5 ދުވަހުގެ ތެރޭގައި މި އިންތިޚާބުގެ ދާއިމީ ނަތީޖާ އިއުލާން ކުރާނެ ކަމުގައެެވެ.

އެމްޑީޕީގެ އޮފީހުގައި އެޕާޓީގެ އިންތިޚާބާބެހޭ ކޮމިޓީން ބޭއްވި ޕްރެސް ކޮންފަރެންސްގައި ޑެޕިއުޓީ ޗެއަރޕާރސަން އިބުރާހިމް ވަހީދު (އިބުރޭ) ވިދާޅުވި ގޮތުގައި މިމަހުގެ 28ވަނަ ދުވަހު ބޭއްވުނު އިންތިޚާބަކީ ވަރަށް އިންސާފުވެރިކޮށް ކުރިޔަށްދިޔަ އިންތިޚާބެއް ކަމުގައެވެ. މިގޮތުން ދެތިން ރަށެއްގައި ކޮންމެވެސް ވަރެއްގެ ހަމަނުޖެހުންތަކެއް ހިނގިނަމަވެސް އިބުރޭ ވިދާޅުވީ އެ ރަށްރަށުގައިވެސް ޖެހުނު މައްސަލަތައް ހަލުކޮށް ވޯޓުލުން ކުރިޔަށް ގެންދެވިފައި ވާކަމުގައެވެ.

މި ނޫސްވެރިންގެ ބައްދަލުވުމުގައި އޭނާ އިއުލާން ކުރެއްވި ވަގުތީ ނަތީޖާގައި ވާގޮތުން ރައީސް ސާލިހަށް އިއްޔެގެ އިންތިޚާބުގައި ލިބިލެއްވީ 24،573 ވޯޓެވެ. ރައީސް ސާލިހާއި ވާދަކުރެއްވި އެ ޕާޓީގެ ރައީސް މުހައްމަދު ނަޝީދަށް ލިބިލެއްވީ 15،631 ވޯޓެވެ.

އިންތިޚާބާބެހޭ ކޮމިޓީން އާންމު ކުރި ވަގުތީ ނަތީޖާގައި ވާގޮތުން މި އިންތިޚާބުގައި ވޯޓު ލާފައިވަނީ 40،887 މެމްބަރުންނެވެ. އެއީ ވޯޓު ލުމުގެ ހައްގު ލިބިފައިވާ މެމްބަރުން 71.41 އިންސައްތަ މީހުންނެވެ.

މި އިންތިޚާބުގައި 680 ބާތިލް ވޯޓު ލާފައިވާއިރު ސައްހަ ވޯޓުގެ ގޮތުގައި ލާފައިވަނީ 40،207 ވޯޓެވެ.

އިންތިޚާބުގެ ނަތީޖާއަށް ބަލާއިރު، ރައީސް ސާލިހުއަށް ލިބިލެއްވީ 61.10 އިންސައްތަ ވޯޓެވެ. ނަޝީދަށް ލިބިލެއްވީ 38.9 އިންސައްތަ ވޯޓެވެ.