ކުރިޔަށް އޮތް އެމްޑީޕީގެ ރިޔާސީ ޕްރައިމަރީން ބަލިވެއްޖެނަމަ ހައްދަވާނެ ގޮތެއް، މިއަދު އޮތް ނޫސްވެރިންގެ ބައްދަލުވުމުގައި ނޫސްވެރިން ތަކުރާރުކޮށް ސުވާލު ކުރުމުންވެސް، އެމްޑީޕީގެ ރައީސް މުހައްމަދު ނަޝީދު ވިދާޅެއް ނުވިއެވެ.

ކުރިޔަށްދާ އެމްޑީޕީގެ ރިޔާސީ ޕްރައިމަރީގެ ވާއްދަކުރައްވަމުން ގެންދަވާ އެޕާޓީގެ ރައީސް މުހައްމަދު ނަޝީދު ގެންދަވަނީ ރަށްރަށަށް ކުރައްވާ ދަތުރުފުޅުތަކުގައި އެބުރި މާލެ ވަޑައިގަންނަވާ ކޮންމެ ފަހަރަކުވެސް ނޫސްވެރިންނާއި ބައްދަލު ކުރައްވަމުންނެވެ.

މިގޮތުން ހުވަދޫ އޮތޮޅަށް ކުރެއްވި ކެމްޕޭން ދަތުރު ނިންމަވާލެއްވުމަށްފަހު މިއަދު މާލެ ވަޑައިގެން ބޭއްވި ނޫސްވެރިންގެ ބައްދަލުވުމުގައިވެސް ނޫސްވެރިން ނަޝީދާއި އެންމެ ގިނައިން އަމާޒުކުރި ސުވާލަކަށް ވެގެންދިޔައީ އިންތިޚާބުން ބަލިވެއްޖެނަމަ ދެން ހައްދަވާނީ ކިހިނަކުން ތޯއެވެ.

މިއަދުގެ ނޫސްވެރިންގެ ބައްދަލުވުމުގައި އެކިއެކި ނޫސްވެރިން ތަކުރާރުކޮށް މިސުވާލު ކުރުމުންވެސް ނަޝީދު ދެއްވި ޖަވާބަކީ އިންތިޚާބުން ބަލިނުވާނެކަމަށާއި އިންތިޚާބު ކާމިޔާބު ކުރައްވާނެ ކަމަށް ކަމަށެވެ.

އޮޕީނިއަން ޕޯލްސް އަޅުގަޑުމެންނަށް އެބަ ފެނޭ. އެތަން މިތަނުން. އެންމެ އޮޕީނިއަން ޕޯލެއްވެސް އަޅުގަޑަށް ދައްކަވާ އެހެން ގޮތަކަށް ނަތީޖާ ދައްކާފަ އޮއްވާ، އެންމެ އެންމެ ޚިޔާލު ހޯދުމުގެ އެއްވެސް ވޯޓެއް. އަދި އަޅުގަޑުމެން އެބަ ގެންދަން އަޅުގަޑުމެން އެކިއެކި ކޯލް ސެންޓަރުތައް މެދުވެރިކޮށްގެން މީހުންނާ ވާހަަކަ ދައްކަމުން. ހަމަ އެއްވެސް ތާކުންނެއް އެވިދާޅުވި ބަލި ފެންނާކަށެއް ނެތް. އަދި އަޅުގަޑުމެންގެ ކެމްޕޭން ޓީމުގެ އެއްވެސް މީހަކު ބޭނުމެއްވެސް ނޫން ބަލިވާ ވާހަކައެއްވެސް އަޅުމަޑުމެން ދައްކާކަށެއް.

ނަޝީދު ވިދާޅުވިއެވެ.

މި ނޫސްވެރިންގެ ބައްދަލުވުމުގައި ތަކުރާރުކޮށް ނޫސްވެރިން އެއް ސުވާލެއް ކުރުމުންވެސް ނަޝީދު ވިދާޅުވެފައިވަނީ ބަލިވާތަން ފެންނަމުން ނުދާކަމުގައެވެ. މިއަދު ނޫސްވެރިންގެ ބައްދަލުވުމުގެ ކުރިން ބޭއްވި ނޫސްވެރިންގެ ބައްދަލުވުމުގައިވެސް ހަމަ އެއް ސުވާލެއް ނޫސްވެރިން ތަކުރާރު ކުރުމުންވެސް ނަޝީދުވަނީ އިންތިޚާބުން ބަލިވެއްޖެ ހާލަތެއްގައި ހައްދަވާނެ ގޮތެއް ވިދާޅުވެ ދެއްވުމަށް ދެކޮޅު ހައްދަވާފައެވެ.

އެހެންނަމަވެސް ކުރިޔަށް އޮތް ޕްރައިމަރީގެ ވޯޓުން ބަލިވެއްޖެ ނަމަ ހުންނަވާނީ އެމްޑީޕީއާއެކީ ކަމަށް ރައީސް ސާލިހުވަނީ އެމަނިކްފާނު އެންމެ ފަހުން ބޭއްވި ނޫސްވެރިންގެ ބައްދަލުވުމުގައި ވިދާޅުވެފަައެވެ. އެހެންނަމަވެސް ރައީސް ސާލިހުވެސް ވިދާޅުވީ އިންތިޚާބު ތަފާތު ބޮޑުކޮށް ކާމިޔާބު ކުރައްވާނޭ ކަމުގައެވެ.