އެމްޑީޕީގެ ރައީސް މުހައްމަދު ނަޝީދު މިއަދު ވިދާޅުވާ އަޑު އިވެމުންދަނީ، އިންޑިއާ އައުޓު ފިޔަވާ އެހެން ހުރިހާ ކަމެއްވެސް ރައީސް ޔާމީނާއި އެމަނިކްފާނު މުޅިންވެސް އެއްގޮތްކަމަށް ޑިފެންސް މިނިސްޓަރ މާރިޔާ އަހުމަދު ދީދީ ވިދާޅުވެއްޖެއެވެ.
މިރޭ ބާއްވަމުންދާ އެމްޑީޕީގެ ރައީސް ސާލިހުގެ ފެކްޝަންގެ ޖަލްސާގައި ވާހަކަ ދައްކަވަމުން މާރިޔާ ވިދާޅުވީ ރައީސް ނަޝީދު ރަށްރަށަށް ވަޑައިގަންނަވާއިރު އިދިކޮޅު ޕީޕީއެމްގެ އެކްޓިވިސްޓުން ނަޝީދަށް މަރުހަބާ ދެންނެވުމަށް ގިޑިގެ ހެދުމާއި އަދި މަރުހަބާ ދެންނެވުމަށް ތިބޭތަން ފެންނަމުންދާ ކަމުގައެވެ.
އަދި މިހާރު ރައީސް ޔާމިނަކީ ވަރަށް ވިޝަނަރީ ލީޑަރެއްކަމަށް ނަޝީދު ވިދާޅުވަމުން ގެންދަވާ ކަމަށާއި، މިހާރު އެންމެ ބޮޑަށް ބިރުހީވަނީ ނަޝީދު ޔާމިންއާއި ކޯލިޝަން ހަދާފާނެތީ ކަމަށްވެސް މި ޖަލްސާގައި ވާހަކަ ދައްކަވަމުން މާރިއާ ވިދާޅުވިއެވެ.
މާރިޔާ ވިދާޅުވީ އެހެންނަމަވެސް ޔާމިން ރާއްޖޭގައި ކުރެއްވީ އަނިޔާވެރި ވެރިކަމެއް ކަމަށާއި، އެ ވެރިކަމުގައި އިދިކޮޅު ސިޔާސީ ހުރިހާ ވެރިން ނުހައްގުން ޖަލަށް ލެއްވި ކަމަށެވެ. އަދި އޭގެ އިތުރުން މުވައްސަސާތައް މުށުތެރެއަށް ލައްވާ، ސުޕްރީމް ކޯޓުގެ ފަނޑިޔާރުންނާއި، ޔާމީނާއި ޚިޔާލުތާފާތުވި މެމްބަރުން ޖަލަށްލާ، ޔާމިނު ތަންފީޒު ކުރި އަނިޔާވެރިވެރިކަމުގެ މަތިން ދިވެހިރައްޔިތުން ހަދާން ނުނެތޭނެ ކަމުގައިވެސް މާރިއާ ވިދާޅުވިއެވެ.
އިތުރަށް ވާހަކަ ދައްކަވަމުން މާރިޔާ ވިދާޅުވީ، ޔާމިން ވިޝަނަރީ ލީޑަރެއް ކަމަށް ދެކޭ ކެނޑިޑޭޓަކަށް އެމްޑީޕީގެ މެމްރުން ވޯޓު ދީގެން ނުވާނެކަމަށާއި، ނަޝީދަށް ތާއީދުކޮށްގެން ތިބި އެމްޑީޕީގެ ހުރިހާ މެމްބަރުންވެސް ރައީސް ސާލިހަށް ވޯޓު ދިނުމަށް މާރިޔާ ގޮވާލެއްވިއެވެ.
މާރިޔާ ވިދާޅުވީ އެމްޑީޕީގެ ފިކުރު ދިރުވީވެސް, ދެމެހެއްޓީވެސް, ކުރިއަރަން އޮތީވެސް ޓިކެޓް ރައީސަށް ދީގެންކަމަަށާއި، ރައީސް ސާލިހު ގެެނެސްދެއްވަމުން ގެންދަވާ ތަރައްގީއަށްޓަކާވެސް ރައީސް ސާލިހަށް ވޯޓު ދޭން ޖެހޭ ކަމުގައެވެ.
